மாஸ்கோ: கஜகஸ்தானில் இராணுவ விமானம் விபத்துக்குள்ளானதில் அதில் பயணம் செய்த 27 பேர் உயிரிழந்தனர்.
கஜகஸ்தான் நாட்டு இராணுவத்திற்குச் சொந்தமான ஏ.என்.-72 விமானம் உஸ்பெகிஸ்தான், கஜகஸ்தான் எல்லையில் 12 மைல் தொலைவில் உள்ள ஷைம்கென்ட் நகர் அருகே வந்து கொண்டிருந்தது. அப்போது விமானம் திடீர் என்று வெடித்து சிதறியது.
விபத்துக்கான காரணம் குறித்து உடனடியாக எதுவும் தெரியவரவில்லை. இந்த விபத்தில் கஜகஸ்தான் நாட்டு எல்லை பாதுகாப்பு படையின் தற்காலிக தலைவர் மற்றும் எல்லை பாதுகாப்புப்படை வீரர்கள் உள்பட 27 பேர் பலியாயினர்.
கடந்த சில வாரங்களாக வடக்கு கஜகஸ்தான் பகுதியில் பனிப்பொழிவு அதிகமாக இருந்தது. மோசமான வானிலைக் காரணமாக விமானப் போக்குவரத்து நிறுத்தப்பட்டிருந்தது. இந்த நிலையில் இராணுவ விமானம் விபத்துக்குள்ளாகியுள்ளது குறிப்பிடத்தக்கது.
