வாக்களிப்பு நடைமுறைக்கு உதவியாக சட்டப்பூர்வ வாக்காளர்களை விமானத்தில் கொண்டு வருவதாகவும்  பிகேஆர் சொல்வது போல சட்ட விரோத வாக்காளர்கள் அல்ல எனத் தான் சொல்வதற்கு பிஎன்  ஆதாரத்தைக் காட்ட வேண்டும் என நடப்பு பிகேஆர் சுபாங் எம்பி ஆர் சிவராசா கேட்டுக் கொண்டுள்ளார்.

அந்த வாக்காளர்கள் சட்டப்பூர்வமானவர்கள் என்றும் அவர்களை கொண்டு வரும் வாடகை  விமானங்களுக்கான கட்டணத்தை ‘பிஎன் நண்பர்கள்’ செலுத்துவதாகவும் பிஎன் தலைமைச் செயலாளர் தெங்கு  அட்னான் தெங்கு மான்சோர் கூறியதாக அறிவிக்கப்பட்டுள்ளது.

“அப்படி என்றால் அவர்கள் சட்டப்பூர்வ வாக்காளர்கள் என்பதற்கு எங்களுக்கு ஆதாரத்தைக் காட்டுங்கள்.  பெரும் எண்ணிக்கையில் அதுவும் எல்லோரும் கிழக்கு மலேசியாவிலிருந்து கோலாலம்பூருக்கு வரும் அவர்கள்  யார் ? என சிவராசா இன்று நிருபர்கள் சந்திப்பில் கேள்வி எழுப்பினார்.

சபா, சரவாக்கிலிருந்து சந்தேகத்துக்குரிய வாக்காளர்களைக் கொண்டு வரும் நடவடிக்கை எனக் கூறப்படும் அந்த விவகாரம் மீது பிகேஆர் மேலும் தகவல்களைத் திரட்டி வருவதாகவும் அதிகமான ஆதாரங்களையும் ஆவணங்களையும் நாளை அது வெளியிடும் என்றும் அவர் தெரிவித்தார்.