13வது பொதுத் தேர்தலில் பிஎன் இழப்புக்கு மசீச-விலும் கெராக்கானிலும் நிலவிய ‘உட்பூசலும்’ காரணம் என முன்னாள் தகவல், தொடர்பு, பண்பாட்டு அமைச்சர் ராயிஸ் யாத்திம் கூறுகிறார்.

“உண்மையாகச் சொன்னால் பாரிசான் நேசனல் இழப்புக்கு மசீச-வும் கெராக்கானும் ஒரு பகுதி காரணம்,” என அவர் சொன்னார்.

“உட்பூசல், புரிந்துணர்வு இல்லாதது, கூட்டு நிலை இல்லாதது ஆகியவை காரணமாக பாரிசான் நேசனல் பல இடங்களை தனது எதிரிகளிடம் இழக்க நேர்ந்தது,” என ராயிஸ் நேற்றிரவு கோலா கிளாவாங்கில் ஜெலுபு மாவட்ட மன்ற மண்டபத்தில் நிகழ்ந்த நன்றி தெரிவிக்கும் நிகழ்வுக்குப் பின்னர் நிருபர்களிடம் பேசினார்.

அண்மைய தேர்தலில் ஜெலுபுவில் பிஎன் வெற்றி அடைந்ததைக் கொண்டாடும் வகையில் அந்த நிகழ்வுக்கு ஏற்பாடு செய்யப்பட்டிருந்தது.

அமைச்சரவையில் பதவிகளை ஏற்றுக் கொள்வதில்லை என்பது போன்ற மேலோட்டமான முடிவுகளை மசீச எடுத்திருக்கக் கூடாது என்றும் ராயிஸ் கருதுகிறார்.

பிரதமர் நஜிப் அப்துல் ரசாக் புதிய கூட்டரசு அரசாங்கத்தை அமைக்கும் போதும்  மாநில அளவிலும் ஆட்சி மன்றங்கள் அமைக்கப்படும் போதும் மசீச அந்த முடிவை அறிவித்திருக்கக் கூடாது என்றார் அவர்.

“கலந்தாய்வுகள் நடத்தப்பட வேண்டும். ஆனால் அது தொடக்கத்திலிருந்தே நிராகரித்து வந்துள்ளனர். அந்த போக்கு சந்தேகத்தை அளிக்கிறது.”

அண்மைய தேர்தலில் மோசமான அடைவு நிலையைப் பெற்றதால் எந்த அரசாங்கப் பதவிகளையும் ஏற்கப்  போவதில்லை என மசீச அறிவித்துள்ளது. அது தான் போட்டியிட்ட 37 நாடாளுமன்றத் தொகுதிகளில் 7ல்

மட்டுமே வெற்றி பெற்றது. போட்டியிட்ட 90 சட்டமன்றத் தொகுதிகளில் 11ஐ மட்டுமே பிடித்தது.

கெராக்கான் தான் போட்டியிட்ட 11 நாடாளுமன்றத் தொகுதிகளில் ஒன்றிலும் 31 சட்டமன்றத் தொகுதிகளில் மூன்றிலும் மட்டுமே வெற்றி பெற்றது.

மசீச தனது நிலையை அறிவிக்கும் முன்னர் பிரதமருடன் ஆலோசனை நடத்தியிருக்க வேண்டும் என்றும் ராயிஸ் கருதுகிறார்.

மசீச தலைவர் சுவா சொய் லெக் அமைச்சரவையில் சேருவது பரிசீலிப்பார் என அவர் நம்புகிறார். மசீச பேராளர்கள் அமைச்சரவையில் இல்லாவிட்டால் இந்த நாட்டின் ஒற்றுமையும் சமூக அமைப்பும் சீர்குலையக் கூடிய நிலை ஏற்படும் என அவர் எண்ணுகிறார்.

“மசீச வழியாகவோ அல்லது வேறு எந்த வழியாகவோ சீன சமூகம் அமைச்சரவையில் பிரதிநிதித்துவம் பெற்றிருக்க வேண்டும். அது போன்று இந்திய சமூகமும் சபா, சரவாக்கில் உள்ள சிறுபான்மை சமூகங்களும் அமைச்சரவையில் இருக்க வேண்டும். பிஎன் அதனை பின்பற்றி வருகின்றது. நாம் அந்தப் பொறுப்பிலிருந்து விலக முடியாது,” என்றார் ராயிஸ்.

பெர்னாமா