பூலாய் செபாதாங் சட்டமன்ற உறுப்பினர் டீ சியு கியோங்,  அரசாங்கப் பதவிகளை ஏற்பதில்லை என்ற கட்சியின் தீர்மானத்தை மீறும் முதலாவது மசீச சட்டமன்ற பிரதிநிதியாகியுள்ளார்.

அவர், இன்று காலை ஜோகூர் மாநில ஆட்சிக்குழு உறுப்பினராக பதவி உறுதிமொழி எடுத்துக்கொண்டார். ஆட்சிகுழுவில் சுற்றுலா, உள்ளூர் வர்த்தகம், பயனீட்டாளர் விவகாரம் ஆகியவற்றுக்குப் பொறுப்பாளராக அவர் நியமனம் செய்யப்பட்டிருக்கிறார். அவரது செயலால்  மசீச தலைவர் டாக்டர் சுவா சொய் லெக் சங்கடமடையலாம்.  ஏனென்றால், அரசியலில் சுவாவால் வளர்த்துவிடப்பட்டவர் டீ. சுவா அமைச்சராக இருந்தபோது டீ அவரின் அரசியல் செயலாளராக இருந்தார். பின்னர் சுவா தலைவரானதும் கட்சியின் ஏற்பாட்டுக் குழுச் செயலாளராக நியமனம் செய்யப்பட்டார்.

பொதுத் தேர்தலில்,  2008-இல் அடைந்ததைவிட மிக மோசமான அடைவுநிலையைக் கண்டால் அரசாங்கப் பதவி எதனையும் ஏற்பதில்லை என மசீச பொதுப்பேரவை ஏற்கனவே தீர்மானித்திருந்தது.  அம்முடிவைக் கடந்த சனிக்கிழமை சுவாவின் தலைமையில் கூடிய அதன் தலைமை மன்றமும் உறுதிப்படுத்தியது.

“13வது பொதுத் தேர்தலில் அடைவுநிலை மோசமாக இருந்தால் அரசாங்கப் பதவிகளை ஏற்பதில்லை என்று  2011, 2012 பொதுப்பேரவையில் செய்த தீர்மானங்களின்படி கட்சி நடந்துகொள்ளும்”, என சுவா கூறியிருந்தார்.

ஆனால், ஜோகூரைப் பொறுத்தவரை  கட்சி அதன் தீர்மானத்தை  விட்டுக்கொடுக்க வேண்டியிருக்கும். ஏனென்றால், ஜோகூர் சுல்தான் மாநில ஆட்சிக்குழுவில் சீனர் பிரதிநிதித்துவம் இருப்பதை விரும்புகிறார்.

ஜோகூரில் 16 சட்டமன்றத் தொகுதிகளில் போட்டியிட்ட மசீச இரண்டு இடங்களில் மட்டுமே வென்றது. ஒன்று பூலாய் செபாத்தாங், மற்றது பாலோ. டீ, மலாய்க்காரர்களைப் பெரும்பான்மையாகக் கொண்ட பூலாயில் 3,412 வாக்குகள் வேறுபாட்டில் வென்றார்.

பெமானிஸில் கெராக்கான் வேட்பாளர் லாவ் சின் ஹூன் வெற்றி பெற்றார். ஆனால், அவர் மாநில ஆட்சிக்குழுவுக்கு நியமிக்கப்படவில்லை.