கடந்த மே 16 ஆம் தேதி பேரரசரால் அமைச்சராகப் பதவிப் பிரமாணம் செய்யப்பட்டு நியமனக் கடிதம் பெற்றவர்களில் ஒருவரான  முன்னாள் டிரான்ஸ்பேரன்சி இண்டர்நேசனல்-மலேசியா தலைவர் பால் லோ கெங் சுவான் மலேசிய அரசமைப்புச் சட்டத்தின் எந்தப் பிரிவின் கீழ் அமைச்சராக நியமிக்கப்பட்டார் என்ற கேள்விக்கு “புத்ராஜெயாவை கேளுங்கள்” என்று மிகச் சாதாரணமாக பதில் அளித்தார்.

அவர் தற்போது புத்ராஜெயாவின் ஓர் அங்கமாக இருக்கிறார் என்பதை அவருக்கு நினைவுறுத்தி அவர் எந்தச் சட்டத்தின் கீழ் அமைச்சராக நியமிக்கப்பட்டார் என்பதைக் கூறுமாறு செம்பருத்தி.கோம் அவரைத் தொடர்பு கொண்ட போது வலியுறுத்தியது.

ஆனால், அவரது பதில் மீண்டும் “புத்ராஜெயாவை கேளுங்கள்” என்பதுதான்.

அமைச்சராக நியமிக்கப்படுவதற்கு முன்பு செனட்டராக இருந்தீர்களா அல்லது  தற்போது செனட்டராக இருக்கிறீர்களா என்று மேலும் வினவப்பட்டதற்கு, “இல்லை. நான் பதில் அளிக்க முடியாது. நீங்கள் புத்ராஜெயாவைத்தான் கேட்க வேண்டும்”, என்றாரவர்.