அரசாங்கத்தில் இருப்பதால் ஒதுக்கப்பட்ட சமூகத்தின் தலைவர் என்னும் முறையில்  அக்கறையில்லாத பார்வையாளராக மட்டும் தாம் இருக்க முடியாது என மலேசிய  ஹிண்டராப் சங்கத் தலைவர் பி வேதமூர்த்தி சொல்கிறார்.

அரசாங்கம் வகுத்த பாதையில் வேதமூர்த்தி செல்ல வேண்டும் என உள்துறை  அமைச்சர் அகமட் ஸாஹிட் ஹமிடி கூறியுள்ளதற்கு பிரதமர் துறை துணை  அமைச்சருமான அவர் பதில் அளித்தார்.

ஸாஹிட் ஹமிடி தமது எண்ணங்களைத் தவறாகப் புரிந்து கொண்டு விட்டதாகவும்  அவர் சொன்னார்.

“அடித்தட்டு மக்களுடைய உண்மையான உணர்வுகளை நான் எடுத்துச் சொல்வது  அரசாங்கத்துக்குச் சாதகமான விஷயமாகும். நல்ல அரசாங்க ஆளுமைக்கும்  குறிக்கோளுக்கும் நான் ஆக்கப்பூர்வமாக பங்காற்ற அது உதவுகின்றது,” என  வேதமூர்த்தி இன்று விடுத்த அறிக்கையில் கூறப்பட்டுள்ளது.

வேதமூர்த்தி அரசு சார்பற்ற அமைப்பு ஒன்றைப் போல செயல்படக் கூடாது  என்றும் அரசாங்கக் கொள்கைக்கு முரணான அறிக்கைகளை விடக் கூடாது  என்றும் ஸாஹிட் அண்மையில் அவரைச் சாடியிருந்தார்.