அகமது சம்சூரி மொக்தாரை பிரதமராக முன்மொழிந்த பாஸ் இளைஞர் அணியின் ஆலோசனையை பெர்சத்து தலைவர் ஒருவர் நிராகரித்துள்ளார். இத்தகைய முடிவுகளை முதலில் கட்சிக்குள்ளேயே இறுதி செய்ய வேண்டும் என்று அவர் தெரிவித்துள்ளார்.

இது குறித்து பெர்சத்து தகவல் தொடர்புத் தலைவர் துன் பைசால் இஸ்மாயில் அஜிஸ், தளத்திற்கு அளித்த பேட்டியில் கூறியிருப்பதாவது:

“பாஸ் இளைஞர் அணி தங்களது பிரதமர் வேட்பாளரை முதலில் கட்சியின் மகாநாட்டில்தான் முன்மொழிய வேண்டும்; நேரடியாகப் பெரிக்காத்தான் நேசனல் கூட்டணியில் அல்ல.”

“அவ்வாறு செய்வதன் மூலமே பெர்சத்து, கெராக்கான் மற்றும் மலேசிய இந்திய மக்கள் கட்சி (MIPP) ஆகிய கூட்டணிக் கட்சிகளுக்கு அளிக்கப்படும் மரியாதையை பாஸ் வெளிப்படுத்த முடியும். அதன் பின்னரே, இக்கோரிக்கை குறித்து பெரிக்காத்தான் உச்சமன்றத்தில் ஆலோசிக்கப்பட வேண்டும்,” என்று அவர் குறிப்பிட்டார்.

திராங்கானு மந்திரி பெசார் சம்சூரி, பெரிக்காத்தான் தலைவராக நியமிக்கப்பட்ட இரண்டு நாட்களிலேயே, அவரைப் பிரதமர் வேட்பாளராகப் பாஸ் இளைஞர் அணி தனது முகநூல் பதிவில் முன்மொழிந்திருந்தது குறிப்பிடத்தக்கது.

பாஸ் இளைஞர் அணி தனது பரிந்துரையில், சம்சூரி ஒரு அமைதியான மற்றும் முடிவுகளில் கவனம் செலுத்தும் ஒரு தொழில்நுட்ப வல்லுநர் என்றும், அவரது தலைமையின் கீழ் திராங்கானு மாநிலம் புதிய உயரங்களை எட்டியுள்ளதாகவும் தெரிவித்தது.

கடந்த செப்டம்பர் மாதம் நடைபெற்ற பெர்சத்து கட்சியின் பொதுச் சபையில், அதன் தலைவர் முகிதின் யாசின் ஒருமனதாகப் பிரதமர் வேட்பாளராகப் பரிந்துரைக்கப்பட்டார்.

அச்சமயத்தில், பெரிக்காத்தான் கூட்டணியின் பெயரில் முக்கிய அரசியல் முடிவுகளை எடுப்பதில் பெர்சத்து அதிக ஆர்வம் காட்ட வேண்டாம் என்று பாஸ் தேர்தல் இயக்குனர் சனுசி நோர் அறிவுறுத்தியிருந்தார்.

இருப்பினும், துன் பைசால் கூறுகையில், முகிதினின் தகுதிகள் மற்றும் முன்னாள் பிரதமராக அவருக்குள்ள அனுபவத்தைக் கருத்தில் கொண்டு, கட்சியின் விதிமுறைகள் மற்றும் அரசியலமைப்புச் சட்டத்தின் படியே இந்தத் தீர்மானம் நிறைவேற்றப்பட்டதாகத் தெரிவித்தார்.

மேலும், இந்தப் பரிந்துரை இறுதி முடிவுக்காக பிஎன் தலைவர் மன்றத்திற்கு கொண்டு செல்லப்பட வேண்டும் என்றும் அவர் குறிப்பிட்டார்.

அக்டோபர் மாதம் நடைபெற்ற தனது வருடாந்திர பொதுக்கூட்டத்தின் போது, மலேசிய இந்திய மக்கள் கட்சியும் பெரிக்காத்தான் நேசனல்  கூட்டணியின் பிரதமர் வேட்பாளராக முகிதின் யாசினையே முன்மொழிந்தது.

-fmt