கோலாலம்பூர், பிரிக்பீல்ட்ஸில் உள்ள ஜாலான் துன் சம்பந்தனில் அமைந்துள்ள நகைக்கடை ஒன்றில், பகல் நேரத்தில் அரங்கேறிய துணிகரக் கொள்ளையில் ஆயுதம் ஏந்திய கொள்ளையர்கள் 21 தட்டுகள் தங்கத்துடன் தப்பினர்.

சில நிமிடங்களுக்குள் நடந்த இந்தச் சம்பவத்தில் ஏற்பட்ட மொத்த இழப்பு சுமார் 9.7 மில்லியன் ரிங்கிட் என மதிப்பிடப்பட்டுள்ளது.

காலை 11 மணியளவில் நடந்த இந்தச் சம்பவத்தில், நான்கு ஆண்கள் கடைக்குள் நுழைந்து இரண்டு துப்பாக்கிகளைக் காட்டி மிரட்டியதாக கோலாலம்பூர் காவல்துறைத் தலைவர் பாடில் மார்சூஸ் தெரிவித்தார்.

“சந்தேக நபர்கள் சுமார் 15 கிலோ எடை கொண்ட 21 தட்டுகள் தங்கத்துடன் தப்பிச் சென்றனர்”.

“இந்தச் சம்பவத்தில் கடையின் பாதுகாப்புப் பணியாளருக்குச் சொந்தமான ஒரு துப்பாக்கி மற்றும் ஒரு தோட்டா காணாமல் போனதாகவும் புகாரளிக்கப்பட்டுள்ளது,” என்று சினார் ஹரியான் செய்தி வெளியிட்டுள்ளது.

முன்னதாக, இந்தக் கொள்ளைச் சம்பவம் தொடர்பான மூன்று நிமிட சிசிடிவி காட்சிகள் சமூக வலைதளங்களில் வைரலாகின.

அந்தக் காணொளியில், தலைக்கவசம் அணிந்த மற்றும் துப்பாக்கி ஏந்திய நபர்கள் நகைக்கடைக்குள் புகுந்து ஒருங்கிணைந்த முறையில் கொள்ளையடிப்பது தெரிந்தது.

இந்தச் சம்பவத்தின் போது, கொள்ளையர்கள் பாதுகாப்புப் பணியாளரைத் தாக்கிவிட்டு, சில நிமிடங்களிலேயே விலையுயர்ந்த பொருட்களை எடுத்துக் கொண்டு தப்பிச் சென்றனர்.

இந்த வழக்கு தண்டனைச் சட்டத்தின் பிரிவு 395/397-ன் கீழ் விசாரிக்கப்பட்டு வருவதாக பாடில் கூறினார்.

இந்தப் பிரிவுகள் ஆயுதமேந்திய கொள்ளை தொடர்பானவை. பிரிவு 395-ன் கீழ் கூட்டுக்கொள்ளைக்கு 20 ஆண்டுகள் வரை சிறைத்தண்டனை மற்றும் பிரம்படி விதிக்கப்படலாம், அதே சமயம் பிரிவு 397 உயிருக்கு ஆபத்தான ஆயுதங்களுடன் செய்யப்படும் கொள்ளையை உள்ளடக்கியது.

இந்த வழக்கு தொடர்பான தகவல் தெரிந்த பொதுமக்கள் முன்வந்து விசாரணைக்கு உதவுமாறு காவல்துறை கேட்டுக்கொண்டுள்ளது.

பொதுமக்கள் பிரிக்பீல்ட்ஸ் காவல்துறை ஹாட்லைன் 03-2297 9222 அல்லது கோலாலம்பூர் காவல்துறை ஹாட்லைன் 03-2115 9999 ஆகிய எண்களைத் தொடர்பு கொள்ளலாம் அல்லது அருகிலுள்ள காவல் நிலையத்தை அணுகலாம்.