சமீபத்திய மாதங்களில் பல்வேறு பொதுப் போக்குவரத்து சேவைகளில் பயணிகளுக்கு இடையூறு ஏற்படுத்திய தொழில்நுட்பச் சிக்கல்களின் தொடர்ச்சியாகவே இந்த முறிவு அமைந்துள்ளதாக பெரிகாத்தான் நேஷனல் பொதுச்செயலாளர் தக்கியுதீன் ஹசன் சுட்டிக்காட்டினார்.

விமான நிலையங்கள், நகர்ப்புற இரயில் அமைப்புகள் அல்லது அது தொடர்பான செயல்பாடுகள் என பல போக்குவரத்து முறைகளில் இடையூறுகள் ஏற்படும்போது, அது செயல்பாட்டு மேலாண்மை, பராமரிப்புத் தரநிலைகள், முறைமை மீள்தன்மை மற்றும் அவசரக்காலத் திட்டங்களின் செயல்திறன் ஆகியவற்றில் உள்ள விரிவான சவால்களைச் சுட்டிக்காட்டுகிறது.

“இவற்றைத் தனித்தனியான தொழில்நுட்பத் தோல்விகளாகக் கருதாமல், அவசர நடவடிக்கை மற்றும் விரிவான அணுகுமுறை தேவைப்படும் ஆழமான முறையான பலவீனங்களின் குறிகாட்டிகளாகக் கருத வேண்டும்,” என்று அவர் ஒரு அறிக்கையில் தெரிவித்துள்ளார்.

நம்பகத்தன்மை மற்றும் தரம் குறித்த கேள்வி

மலேசியாவின் முக்கியமான பொதுப் போக்குவரத்து உள்கட்டமைப்புகளின் நிர்வாகத்தில் நம்பகத்தன்மை மற்றும் தரத்தின் நிலை குறித்து கே.எல்.ஐ.ஏ 1-இல் நடந்த இந்தச் சம்பவம் கடுமையான கேள்விகளை எழுப்பியுள்ளதாக தக்கியுதீன் கூறினார்.

நாட்டின் முக்கியமான சொத்துகளாக இருப்பதால், இந்த உள்கட்டமைப்புகள் திறமையாகவும் சீராகவும் செயல்பட வேண்டும், குறிப்பாக கே.எல்.ஐ.ஏ போன்ற முக்கிய நுழைவு வாயில்களில் இது அவசியம் என்று அவர் குறிப்பிட்டார்.

போக்குவரத்து அமைச்சர் அந்தோனி லோக்

“எனவே, அதன் கீழ் உள்ள முகமைகள் உள்ளிட்ட சிக்கல்கள் குறித்து வெளிப்படையான மற்றும் விரிவான விளக்கத்தை அளிக்குமாறு அமைச்சகத்தை பெரிகாத்தான் நேஷனல் வலியுறுத்துகிறது”.

இந்தத் தோல்விகளுக்கான மூலக் காரணங்களை அமைச்சகம் வெளிப்படுத்த வேண்டும். தடுப்பு பராமரிப்பு முறைகள் போதுமானதாக இருக்கிறதா, முறைமை மேம்படுத்தல்கள் சீராக நடக்கிறதா மற்றும் செயல்பாட்டு இடையூறுகளைக் கையாள்வதில் தற்போதுள்ள அவசரக்காலத் திட்டங்கள் உண்மையிலேயே பயனுள்ளதாக இருக்கிறதா என்பது இதில் அடங்கும்,” என்று தக்கியுதீன் கூறினார்.

போக்குவரத்து அமைச்சர் அந்தோணி லோக் நேற்று வெளியிட்ட அறிக்கையின்படி, இந்த இடையூறு சனிக்கிழமை மாலை ஏற்பட்டது.

அன்றைய தினமே பயணப்பொதி கையாளும் முறைமை சீரமைக்கப்பட்டாலும், இந்தத் தொழில்நுட்பச் சீரமைப்புடன் இந்த விவகாரம் முடிந்துவிடவில்லை என்றும், இது குறித்து விசாரணை நடத்த சிவில் விமானப் போக்குவரத்து ஆணையத்திற்கு உத்தரவிட்டுள்ளதாகவும் லோக் வலியுறுத்தினார்.

மேலும், “சேவை வழங்கலில் தோல்வி” அடைந்ததற்காக மலேசியா ஏர்போர்ட்ஸ் ஹோல்டிங்ஸ் பெர்ஹாட் (MAHB) மீது தண்டனை நடவடிக்கை எடுக்கப்பட வேண்டுமா என்பது குறித்து ஆராயுமாறு விமானப் போக்குவரத்து ஒழுங்குமுறை ஆணையத்திற்கு அவர் உத்தரவிட்டார்.

இது தவிர, சம்பந்தப்பட்ட முகமைகளுடன் இன்று அவசரக் கூட்டத்தைக் கூட்டுமாறு அமைச்சகப் பொதுச்செயலாளருக்கு உத்தரவிடப்பட்டுள்ளதாக லோக் கூறினார்.

“எங்கள் விமான நிலையங்களில் முறிவுகளைக் கையாள்வது தொடர்பான தற்போதைய நிலையான செயல்பாட்டு நடைமுறைகளை (SOP) இந்தக் கூட்டம் முழுமையாக ஆய்வு செய்யும். குறிப்பாகப் பதில் அளிக்கும் நேரம், பயணிகளுடனான தகவல் தொடர்பு மற்றும் அவசரக்கால நெறிமுறைகளில் கவனம் செலுத்தும்,” என்று அவர் மேலும் கூறினார்.

இயல்பு நிலைக்குத் திரும்புதல்

நேற்று வெளியிடப்பட்ட ஒரு தனி அறிக்கையில், முதன்மை முனையத்தின் செயல்பாடுகள் சீராகி இயல்பு நிலைக்குத் திரும்பியுள்ளதாக சிவில் விமானப் போக்குவரத்து ஆணையம் உறுதிப்படுத்தியுள்ளது.

விமானப் போக்குவரத்து ஒழுங்குமுறை ஆணையமாக, சிவில் விமானப் போக்குவரத்து ஆணையம் மீட்புச் செயல்பாடுகளைக் கூர்ந்து கவனித்தது. செயல்பாட்டு நிலைத்தன்மை மற்றும் அனைத்து பாதுகாப்பு மற்றும் சேவைத் தரங்களுக்கு இணங்குவதை உறுதிப்படுத்த Malaysia Airports Holdings Bhd மற்றும் விமான நிறுவனங்களுடன் தொடர்ந்து தொடர்பு கொண்டு வருகிறது.

பயணிகளின் பொதிகளை சரியான நேரத்தில் மற்றும் திறமையாகக் கையாளுவது உள்ளிட்ட நிர்ணயிக்கப்பட்ட சேவைத் தரங்களுக்கு (Quality of Service) மலேசியா ஏர்போர்ட்ஸ் ஹோல்டிங்ஸ் பெர்ஹாட் இணங்க வேண்டியது கட்டாயமாகும்.

இதற்கு இணங்க, சிவில் விமானப் போக்குவரத்து ஆணையம் இந்தத் தேவைகளை அமல்படுத்தி வருகிறது. ஏதேனும் விதிமீறல்கள் ஏற்பட்டால் தகுந்த ஒழுங்குமுறை மற்றும் அமலாக்க நடவடிக்கைகளை எடுக்கும்,” என்று அந்த முகமை தெரிவித்துள்ளது.

மேலும், MAHB திருத்த மற்றும் தடுப்பு நடவடிக்கைகளை மேற்கொள்ள வேண்டும் என்றும் கோரப்பட்டுள்ளது.