அதிவேக மற்றும் கவனக்குறைவாக வாகனம் ஓட்டுவதால் பாதிக்கப்படுபவர்களுக்கு இழப்பீடு வழங்கும் பொறிமுறையை அமல்படுத்துவதற்கான தனது திட்டத்தைத் தொடர்ந்து, போக்குவரத்து அமைச்சகம் இந்த முன்மொழியப்பட்ட மசோதாவை நாடாளுமன்றத்தில்  (Dewan Rakyat) முதல் மற்றும் இரண்டாம் வாசிப்புகளுக்குப் பிறகு, நாடாளுமன்ற சிறப்புக் குழுவின் (PSSC) பரிசீலனைக்கு அனுப்ப உத்தேசித்துள்ளது.

முன்மொழியப்பட்ட இந்த சட்டத்திருத்தம் நிறைவேற்றப்படுவதற்கு முன்பு, அதுகுறித்து விரிவான ஆய்வுகளை மேற்கொள்வதற்கும், அனைத்துக் கட்சிகளின் ஆதரவைப் பெறுவதற்கும் இந்த நடவடிக்கை நோக்கமாகக் கொண்டுள்ளது என்று போக்குவரத்து அமைச்சர் அந்தோணி லோக் தெரிவித்தார்.

“சாலைப் பயன்பாட்டை நிர்வகிக்கும் சட்டக் கட்டமைப்பை இது மாற்றுவதால், இந்த மசோதா நீண்ட காலத்திற்கு ஒரு குறிப்பிடத்தக்க தாக்கத்தை ஏற்படுத்தும் என்று நான் நம்புகிறேன்”.

போக்குவரத்து அமைச்சகம் இயல்பாகவே சாலைப் பயனாளர்களைப் பாதுகாக்கும் மற்றும் நீண்ட காலத்திற்கு சாதகமான முடிவுகளைத் தரும் நடவடிக்கைகளை அமல்படுத்துவதையே நோக்கமாகக் கொண்டுள்ளது.

“எனவே, இந்த மசோதாவை வரைவு செய்வதிலும் உருவாக்குவதிலும் நாங்கள் மிகுந்த கவனத்துடன் செயல்படுவோம்,” என்று இன்று அமைச்சகத்தில் நடைபெற்ற செய்தியாளர் சந்திப்பின் போது அவர் கூறினார்.

அமைச்சரவை கொள்கை அளவில் ஒப்புதல்

முன்மொழியப்பட்ட இந்த சட்டத்திருத்தங்களுக்கு அமைச்சரவை கொள்கை அளவில் ஒப்புதல் அளித்துள்ளதாகவும், தற்போது இது அடுத்த கட்டத்திற்கு கொண்டு செல்லப்படும் என்றும் லோக் மேலும் கூறினார்.

1987ஆம் ஆண்டு சாலைப் போக்குவரத்துச் சட்டத்தில் செய்யப்படவுள்ள இந்தத் திருத்தங்கள், கவனக்குறைவாக வாகனம் ஓட்டுவதால் பாதிக்கப்படுபவர்கள் அல்லது அவர்களின் வாரிசுகள், குற்றவாளிகளிடமிருந்து இழப்பீடு கோருவதற்கு அனுமதிக்கும் ஒரு புதிய பொறிமுறையை அறிமுகப்படுத்த முயல்கின்றன.

அரசாங்கம் இந்த இழப்பீட்டுத் தொகையை தானாகவோ அல்லது நிர்வாக ரீதியாகவோ நிர்ணயம் செய்ய உத்தேசிக்கவில்லை என்றும், மாறாக ஒவ்வொரு வழக்கின் பின்னணி மற்றும் தகுதியின் அடிப்படையில் நீதிமன்றங்களே இதனைத் தீர்மானிக்கும் என்றும் அவர் கூறினார்.

இதில் குற்றத்தின் தீவிரம், காயம் அல்லது உயிரிழப்பின் அளவு, பாதிக்கப்பட்டவர்கள் அல்லது அவர்களது குடும்பத்தினர் சந்தித்த இழப்புகள் மற்றும் குற்றவாளியின் செலுத்தும் திறன் ஆகியவை அடங்கும்.

“தற்போது, குற்றவாளிகளுக்கு சிறைத்தண்டனை அல்லது அபராதம் மட்டுமே விதிக்கப்படுகிறது. இருப்பினும், பாதிக்கப்பட்டவரின் குடும்பத்திற்கு இழப்பீடு வழங்குவதற்கான எந்தவொரு விதியும் இல்லை”.

“எனவே, நீதிமன்றம் ஒருவரைக் குற்றவாளி என்று கண்டறிந்ததும், பாதிக்கப்பட்டவரின் குடும்பத்திற்கு இழப்பீடு வழங்கவும் அனுமதிக்கும் ஒரு புதிய பொறிமுறையை நமது சட்டத்திற்குள் நிறுவ நாங்கள் இலக்கு வைத்துள்ளோம். இதன் மூலம் நமது சட்டத்தை மேலும் வலுப்படுத்தவும் மேம்படுத்தவும் நாங்கள் உத்தேசித்துள்ளோம்,” என்று அவர் கூறினார்.

தற்போதுள்ள சட்ட வழிமுறைகள் மூலம் காப்பீட்டுத் கோரிக்கைகள் (insurance claims) அல்லது சிவில் நடவடிக்கைகளைத் தொடருவதற்கான பாதிக்கப்பட்டவர்கள் அல்லது அவர்களின் குடும்பத்தினரின் உரிமைகளை இந்த முன்மொழியப்பட்ட பொறிமுறை பாதிக்காது என்றும் அமைச்சர் குறிப்பிட்டார்.

காலக்கெடு எதுவும் நிர்ணயிக்கப்படவில்லை

இந்த சட்டத்திருத்தம் எப்போது நாடாளுமன்றத்தில் சமர்ப்பிக்கப்படும் என்று கேட்கப்பட்டதற்கு, இந்த செயல்முறையை அவசரப்படுத்த தான் விரும்பவில்லை என்றும், ஒவ்வொரு தரப்பினரின் கருத்துகளையும் கருத்தில் கொள்ள வேண்டும் என்பதால் தற்போது எந்த காலக்கெடுவும் நிர்ணயிக்கப்படவில்லை என்றும் லோக் கூறினார்.

“நேரம் அனுமதித்தால், இந்த ஆண்டின் பிற்பகுதியில் நடைபெறும் நாடாளுமன்றக் கூட்டத்தொடரில் இதனைச் சமர்ப்பிக்க நாங்கள் நிச்சயமாக உத்தேசித்துள்ளோம். ஒருவேளை நவம்பர் மாதம் நடைபெறும் வரவுசெலவுத் திட்டம் (Budget) மீதான விவாதத்திற்குப் பிறகு இது நடக்கலாம்”.

“இது மசோதாவின் வரைவை சரியான நேரத்தில் உறுதி செய்ய முடியுமா என்பதைப் பொறுத்தது, ஏனெனில் இதில் பல விவரங்கள் அடங்கியுள்ளன,” என்று அவர் கூறினார்.

நடைமுறை சவால்கள்

முக்கியமான வரையறைகளைத் தெளிவுபடுத்துவது மற்றும் முன்மொழியப்பட்ட இழப்பீட்டுப் பொறிமுறையைச் சுற்றியுள்ள நடைமுறைச் சிக்கல்களைக் கையாளுவது ஆகியவை இதில் அடங்கும். உதாரணமாக, ஒரு குற்றவாளியால் இழப்பீடு செலுத்த முடியாத பட்சத்தில், அந்த இழப்பீட்டு உத்தரவுகள் எவ்வாறு நடைமுறைப்படுத்தப்படும் என்பது போன்ற சவால்கள் இதில் உள்ளன.

இந்தச் சட்டத்தை வரைவு செய்வதற்கு முன், காப்பீட்டு நிறுவனங்கள் உட்பட சம்பந்தப்பட்ட முகமைகள், அமைச்சகங்கள் மற்றும் பங்குதாரர்களுடன் இணைந்து கலந்துரையாடல்களை மேற்கொள்ளுமாறும், அமலாக்கச் சவால்களைக் கண்டறியப் பயிலரங்குகளை நடத்துமாறும் போக்குவரத்து அமைச்சகத்திற்கு உத்தரவிட்டுள்ளதாக லோக் தெரிவித்தார்.

“பல நாடாளுமன்ற உறுப்பினர்கள் இந்த விவகாரத்தை எழுப்பியுள்ளனர், ஆனால் நாம் இதன் விவரங்களையும் இந்த பொறிமுறையையும் கூர்ந்து கவனிக்க வேண்டும். எல்லாவற்றிற்கும் மேலாக, ஒரு சட்டத்தை நடைமுறைப்படுத்த முடியாவிட்டால் அது பயனற்றதாகிவிடும்”.

பொதுமக்களும், பங்குதாரர்களும் மற்றும் நிபுணர்களும் இந்த முன்னேற்றங்களைக் கண்காணித்து, அரசாங்கத்துடன் தங்களது கருத்துக்களைப் பகிர்ந்து கொள்ள முன்வருவார்கள் என்று நாங்கள் நம்புகிறோம்,” என்று அவர் கூறினார்.