விமான நிலையங்களில் பாதுகாப்பை மேலும் வலுப்படுத்தும் நோக்கில், ஜகார்த்தாவில் போதைப்பொருள் கடத்தல் குற்றச்சாட்டில் மலேசியா ஏர்லைன்ஸ் விமானி ஒருவர் கைது செய்யப்பட்டதைத் தொடர்ந்து, விமானப் பாதுகாப்பு (Aviation Security) குழுக்களுடன் இணைந்து காவல்துறை அதிகாரிகளும் பணியமர்த்தப்படுவார்கள்.

அரசாங்கத்தின் பேச்சாளர் பஹ்மி பட்சில் கூறுகையில், உள்துறை மற்றும் போக்குவரத்து அமைச்சகங்கள் இன்று அமைச்சரவைக்கு உடனடியாக மேற்கொள்ள வேண்டிய பல மேம்பாடுகள் குறித்து விளக்கம் அளித்ததாக தெரிவித்தார்.

முதலாவது, விமானப் பாதுகாப்பு தொடர்பாக, தற்போது இந்தப் பொறுப்பை துணை காவல்துறையினர் (Auxiliary Police) மேற்கொண்டு வருகின்றனர். இனி அவர்களுடன் சேர்த்து காவல்துறை அதிகாரிகளையும் பணியில் அமர்த்த வேண்டும்,” என்று அவர் புத்ராஜெயாவில் நடைபெற்ற வாராந்திர அமைச்சரவை செய்தியாளர் சந்திப்பில் கூறினார்.

மேலும், மலேசியா ஏர்லைன்ஸ் குழுமம் (Malaysia Airlines Group) தனது விமானிகள் மற்றும் இணை விமானிகளுக்கான பின்னணி ஆய்வு (Background Check) மற்றும் உடல்நல பரிசோதனை நடைமுறைகளை மறுபரிசீலனை செய்யுமாறும் கேட்டுக்கொள்ளப்படும் என்றார்.

அதோடு, காவல்துறையினரும் மலேசிய எல்லைக் கட்டுப்பாடு மற்றும் பாதுகாப்பு முகமை (MCBA) அதிகாரிகளும் பாதுகாப்பு அமைப்பில் தவறாக பயன்படுத்தப்படக்கூடிய பலவீனங்கள் மற்றும் ஓட்டைகளை (Loopholes) கண்டறிந்து உடனடியாக சரிசெய்யுமாறு உத்தரவிடப்பட்டுள்ளதாகவும் அவர் தெரிவித்தார்.

“தவறாகப் பயன்படுத்தப்படக்கூடிய சாத்தியமுள்ள அம்சங்கள், அதில் காணப்படும் ஏதேனும் இடைவெளிகள் அல்லது குறைபாடுகள் உட்பட அனைத்தையும் ஆராயுமாறு காவல்துறையும் MCBA-வும் கேட்டுக்கொள்ளப்பட்டுள்ளனர்; மேலும் இவற்றுக்கு உடனடியாகத் தீர்வுகாணப்பட்டு அடைக்கப்பட வேண்டும்,” என்று அவர் கூறினார்.

இந்த வழக்கைப் பற்றிய முழுமையான எழுத்துப்பூர்வ அறிக்கை இன்னும் அமைச்சரவைக்கு சமர்ப்பிக்கப்படவில்லை என்றும், தற்போது வாய்மொழி விளக்கமே வழங்கப்பட்டுள்ளதாகவும் அவர் தெரிவித்தார்.

“இந்தோனேசியாவில் விசாரணை இன்னும் நடைபெற்று வருவதால், முழுமையான அறிக்கையைப் பெற்ற பிறகே அடுத்த கட்ட நடவடிக்கைகள் குறித்து முடிவு செய்யப்படும்”.

அறிக்கை கிடைத்ததும், இதில் வேறு யாரெல்லாம் தொடர்புடையவர்கள் என்பதை ஆராய வேண்டும்.

“தொடர்புடைய அனைவரும் சட்டத்தின் முன் நிறுத்தப்பட வேண்டும். இதுபோன்ற சம்பவங்கள் மீண்டும் நடைபெறாத வகையில், பாதுகாப்பு அமைப்பில் உள்ள குறைபாடுகளை முழுமையாக சரிசெய்ய வேண்டியது அவசியம்,” என்றார்.

சிறப்பு காவல்துறை பிரிவுகளை மீண்டும் அமைப்பது குறித்து அமைச்சரவையில் விவாதம் இல்லை

முன்னாள் மூன்று சிறப்பு காவல்துறை பிரிவுகளை மீண்டும் செயல்படுத்த வேண்டும் என்ற கோரிக்கை குறித்து கேட்கப்பட்டபோது, அது குறித்து அமைச்சரவையில் இன்று எந்த விவாதமும் நடைபெறவில்லை என்று பஹ்மி தெரிவித்தார்.

“இந்த விவகாரம் குறித்து உள்துறை அமைச்சரிடம் கேட்கலாம்,” என்றும் அவர் கூறினார்.

இதற்கு முன்னதாக, MCA துணைத் தலைவர் லாரன்ஸ் லோ, கீழ்க்கண்ட மூன்று சிறப்பு காவல்துறை பிரிவுகளையும் மீண்டும் அமைக்க அரசாங்கம் நடவடிக்கை எடுக்க வேண்டும் என்று வலியுறுத்தினார்

விபச்சாரம், சட்டவிரோத சூதாட்டம் மற்றும் கும்பல் குற்றங்களை ஒழிக்கும் சிறப்பு பணிக்குழு (Special Task Force for Anti-Vice, Gaming and Gangsterism)

போதைப்பொருள் தொடர்பான சிறப்பு தந்திரோபாய உளவுத்துறை (Special Tactical Intelligence Narcotics Group)

ஒழுங்கமைக்கப்பட்ட குற்றங்களை எதிர்க்கும் சிறப்பு பணிக்குழு (Special Task Force on Organised Crime)

“இதுபோன்ற சம்பவங்கள், போதைப்பொருள் கடத்தல் மற்றும் ஒழுங்கமைக்கப்பட்ட குற்றக் கும்பல்கள் தற்போது மிகவும் துணிச்சலாக செயல்படுகின்றன என்பதையும், தற்போதைய சட்ட அமலாக்க அமைப்பை அவை அஞ்சவில்லை என்பதையும் காட்டுகின்றன,” என்று லோ தெரிவித்தார்.

இந்த மூன்று பிரிவுகளும் 2014-ஆம் ஆண்டு உருவாக்கப்பட்டவை. ஆனால், 2018 ஜூன் மாதத்தில் பக்காத்தான் ஹராப்பான் அரசின் காவல்துறை மறுசீரமைப்பின் போது அவை கலைக்கப்பட்டன.

அப்போது உள்துறை அமைச்சகம், அந்தப் பிரிவுகளின் பணிகள் புக்கிட் அமான் காவல்துறை பிரிவுகளின் பணிகளுடன் ஒத்துப்போவதாகவும், அதனால் அந்தப் பிரிவுகளில் இருந்த அதிகாரிகளும் பொறுப்புகளும் பிற காவல்துறைகளில் இணைக்கப்பட்டதாகவும் விளக்கியது.

ஜகார்த்தாவில் கைது செய்யப்பட்ட மலேசியா ஏர்லைன்ஸ் விமானி மற்றும் சுரபயாவின் ஜுவாண்டா சர்வதேச விமான நிலையத்தில், உடலுக்குள் அணியும் கோர்செட் (Corset) உடையில் மெத்தாம்பெட்டமின் (Methamphetamine) மற்றும் எக்ஸ்டஸி (Ecstasy) மாத்திரைகளை மறைத்து கடத்த முயன்றதாக கைது செய்யப்பட்ட மற்றொரு மலேசியரை எடுத்துக்காட்டாக லோ குறிப்பிட்டார்.

அந்த விமானி ஜூலை 28-ஆம் தேதி ஜகார்த்தாவில் கைது செய்யப்பட்டார். அவரது வசம் 70,000-க்கும் அதிகமான எக்ஸ்டஸி மாத்திரைகளும், 2.7 கிராம் மெத்தாம்பெட்டமினும் இருந்ததாக இந்தோனேசிய அதிகாரிகள் தெரிவித்துள்ளனர்.

விசாரணைக்காக அவர் ஜூலை 30 முதல் ஆகஸ்ட் 18 வரை 20 நாட்கள் தடுப்புக் காவலில் வைக்கப்பட்டுள்ளார்.

இதற்கிடையில், திங்கட்கிழமை புக்கிட் அமான் போதைப்பொருள் குற்ற விசாரணைத் துறை இயக்குநர் ஹுசைன் ஓமர் கான், ஜகார்த்தா மற்றும் சுரபயா கைது சம்பவங்கள் இரண்டையும் மலேசியா மற்றும் இந்தோனேசிய அதிகாரிகள் இணைந்து விசாரித்து வருவதாகவும், இவை பெரிய அளவிலான எல்லைத் தாண்டிய போதைப்பொருள் கடத்தல் கும்பலுடன் தொடர்புடையதா என்பது குறித்து விசாரணை நடைபெற்று வருவதாகவும் உறுதிப்படுத்தினார்.