மலேசிய மருத்துவச் சங்கம், இதுபோன்ற சட்டவிரோதச் செயல்பாடுகள் வேறு இடங்களில் மீண்டும் உருவாவதைத் தடுக்கும் வகையில், தற்போதைய அமலாக்கம் போதுமான காலம் நீடிக்குமா என்பதில் சந்தேகம் எழுப்பியுள்ளது.

மலேசிய மருத்துவச் சங்கம் (MMA), இந்த ஆண்டில் மட்டும் மீண்டும் மீண்டும் கண்டுபிடிக்கப்பட்ட சட்டவிரோத கிளினிக்குகள் மற்றும் பதிவு செய்யப்படாத மருந்துகள் மீது, சுகாதாரத் துறை அதிகாரிகள் தீவிரமான, தொடர்ச்சியான மற்றும் உளவுத் துறை தகவல்கள் அடிப்படையிலான நடவடிக்கைகளை எடுக்க வேண்டும் என்று கோரியுள்ளது.

சட்டவிரோத கிளினிக்குகளை மூடுவதுடன் மட்டும் அமலாக்க நடவடிக்கைகள் முடிந்துவிடக் கூடாது, ஏனெனில் குற்றவாளிகள் வேறு இடங்களில் மீண்டும் அதைத் தொடங்கக்கூடும் என்று MMA தலைவர் டாக்டர் எல். சிவனேசன் தெரிவித்துள்ளார்.

சந்தேகத்திற்குரிய இடங்களில் ஒருங்கிணைந்த ஆய்வுகளை மேற்கொள்ள வேண்டும் என்றும், முன்பு சட்டவிரோதமாக செயல்பட்டதாகக் கண்டறியப்பட்ட இடங்களில் வழக்கமான தொடர் ஆய்வுகளை நடத்த வேண்டும் என்றும் சிவனேசன் வலியுறுத்தினார்.

பதிவு செய்யப்படாத மருந்துகள் நாட்டிற்குள் எவ்வாறு கொண்டு வரப்படுகின்றன, மற்றும் அவற்றின் விநியோகத்திற்குத் தெரிந்தே உடந்தையாக இருப்பவர்கள் உட்பட, விநியோகச் சங்கிலி (supply chain) முழுவதையும் கண்காணித்து நடவடிக்கை எடுக்க வேண்டும்.

“பதிவு செய்யப்படாத மருந்துகள் மலேசியாவிற்குள் நுழைவதை முதன்முதலில் தடுப்பதற்கு நாட்டின் எல்லைப் புள்ளிகளில் கடுமையான சோதனைகள் நடத்தப்பட வேண்டும்,” என்று அவர் ஒரு அறிக்கையில் தெரிவித்துள்ளார்.

கோலாலம்பூரில் பதிவு செய்யப்படாத மருந்துகளை விற்பனை செய்தும் சேமித்து வைத்தும் வந்த நான்கு இடங்களைச் சுகாதார அமைச்சு கண்டுபிடித்ததைத் தொடர்ந்து இந்தக் கோரிக்கை எழுந்துள்ளது. அவற்றில் இரண்டு இடங்கள் சட்டவிரோத கிளினிக்குகள் என்று கூறப்படுகிறது.

அவை வெளிநாட்டினரால் நடத்தப்பட்டு வந்ததாக நம்பப்படுகிறது.

துணி விற்பனை மற்றும் பயண முகவர் நிலையங்கள் நடத்துவது போல நடித்து இந்த இடங்கள் செயல்பட்டு வந்ததாகக் கோலாலம்பூர் மற்றும் புத்ராஜாயா சுகாதாரத் துறை தெரிவித்துள்ளதாக ‘தி ஸ்டார்’ செய்தி வெளியிட்டுள்ளது.

இருப்பினும், சுகாதார அதிகாரிகளின் ஆய்வுகளின் போது, இரத்த அழுத்தம் மற்றும் இரத்த சர்க்கரை பரிசோதனை கருவிகள் மற்றும் அமைச்சைச் சார்ந்த அனுமதி பெறப்படாத மருந்துகள் அங்கு இருந்தது கண்டுபிடிக்கப்பட்டது.

தற்போதைய அமலாக்க நடவடிக்கைகள் இதுபோன்ற செயல்பாடுகள் வேறு இடங்களில் மீண்டும் உருவெடுப்பதைத் தடுக்கும் அளவிற்குத் தொடர்ச்சியாக இருக்கிறதா என்று சிவனேசன் கேள்வி எழுப்பினார்.

தகுதியற்ற அல்லது பதிவு செய்யப்படாத நபர்களால் பதிவு செய்யப்படாத மருந்துகள், நுண்ணுயிர் எதிர்ப்பிகள் (antibiotics) மற்றும் மருத்துவ உபகரணங்கள் பயன்படுத்தப்படுவது நோயாளிகளுக்கும் பொது சுகாதாரத்திற்கும் கடுமையான ஆபத்தை விளைவிக்கும் என்று அவர் எச்சரித்தார்.

குறிப்பாக, நுண்ணுயிர் எதிர்ப்பிகளைத் தவறாகப் பயன்படுத்துவது ‘நுண்ணுயிர் எதிர்ப்புத் திறன்’ (antimicrobial resistance) உருவாக வழிவகுக்கும் என்பதால் அது மிகவும் கவலையளிப்பதாக உள்ளது என்றும், இது ஒட்டுமொத்த மக்களுக்கும் அச்சுறுத்தலாக அமையும் என்றும் அவர் எச்சரித்தார்.

“இது முதன்மையான முக்கியமான நோயாளிகளின் பாதுகாப்பு தொடர்பான பிரச்சனையாகும். சுகாதாரப் பாதுகாப்பு என்பது தகுதியான மற்றும் பதிவு செய்யப்பட்ட வல்லுநர்களால், சம்பந்தப்பட்ட அதிகாரிகளிடம் பதிவு செய்யப்பட்ட சுகாதார மையங்களில் வழங்கப்பட வேண்டும். மேலும் நோயாளிகளுக்கு சிகிச்சையளிப்பதில் அங்கீகரிக்கப்பட்ட மருந்துகள் மற்றும் மருத்துவ உபகரணங்கள் மட்டுமே பயன்படுத்தப்பட வேண்டும்,” என்று அவர் கூறினார்.