கடந்த ஏப்ரல் மாதத்தில் இந்த முன்மொழிவை மீண்டும் கையில் எடுத்த தேசிய ஒற்றுமை அமைச்சு, தற்போது தேசிய நல்லிணக்க ஆணையத்தை அமைக்கும் திட்டத்தைக் கைவிட முடிவு செய்துள்ளது.

முன்மொழியப்பட்ட இந்த ஆணையத்தின் நோக்கம், தாக்கங்கள், சவால்கள் மற்றும் அதன் சாத்தியக்கூறுகள் குறித்து சிவில் சமூகக் குழுக்கள், அரசு முகமைகள், கல்வியாளர்கள், சமூகத் தலைவர்கள் மற்றும் பிற பங்குதாரர்களுடன் இரண்டு அமர்வுகள் கொண்ட கலந்துரையாடலை நடத்திய பின்னரே இந்த முடிவு எடுக்கப்பட்டதாகத் தேசிய ஒற்றுமைத் துறை அமைச்சர் ஆரோன் அகோ தகாங் தெரிவித்தார்.

அனைத்து தரப்பினரின் கருத்துக்களையும் பரிசீலித்த பின்னர், ஒரு புதிய அமைப்பாகத் தேசிய நல்லிணக்க ஆணையத்தை அமைக்கும் திட்டத்தை மேற்கொண்டு தொடர்வதில்லை என அமைச்சு முடிவு செய்துள்ளது, என்று அவர் கூறினார்.

தேசிய ஒற்றுமை மற்றும் ஒருங்கிணைப்புத் துறை, அந்தந்தப் பகுதிகளின் ருக்குன் தெத்தாங்கா மற்றும் சமூக மத்தியஸ்தர்கள் ஆகிய தற்போதைய அமைப்புகளை வலுப்படுத்துவதில் மட்டுமே அமைச்சு இனி கவனம் செலுத்தும்.

சமூக நல்லிணக்க நிர்வாகத்தை வலுப்படுத்துவதற்கான ஒரு நடைமுறை, உடனடி மற்றும் செலவு குறைந்த அணுகுமுறையின் ஒரு பகுதியாக, சமூக நல்லிணக்கத்தை நிர்வகிக்கும் முகவர்களாக இந்த அமைப்புகள் செயல்படும், என்று அவர் நாடாளுமன்ற எழுத்துப்பூர்வ பதிலில் தெரிவித்துள்ளார்.

இத்தகைய புதிய ஆணையம் அமைக்கப்பட்டால், அது தற்போது செயல்பாட்டில் இருக்கும் அமைப்புகளின் பணிகளோடு மேலெழும்பி நின்று முரண்படுவதோடு, தேவையற்ற கூடுதல் செலவுகளுக்கே வழிவகுக்கும்.

கடந்த 2015-ஆம் ஆண்டில், தேசிய ஒற்றுமை ஆலோசனைக் குழுவானது ‘தேசிய நல்லிணக்கம் மற்றும் மறுசீரமைப்பு ஆணைய மசோதா உள்ளிட்ட மூன்று வரைவு மசோதாக்களைத் தயாரித்திருந்தது குறிப்பிடத்தக்கது.

கடந்த 2019ஆம் ஆண்டில், தேசிய நல்லிணக்கம் மற்றும் மறுசீரமைப்பு ஆணைய மசோதாவிற்கு அரசாங்கம் கொள்கையளவில் உடன்பட்டிருந்த போதிலும், காவல்துறை மற்றும் மனித உரிமைகள் ஆணையமான சுஹாகாம் ஆகியவற்றுடன் அதிகார வரம்புகளில் ஏற்பட்ட முரண்பாடுகள் காரணமாக அதன் செயலாக்கம் தாமதமானது என்று ஆரோன் முன்னதாகக் குறிப்பிட்டிருந்தார்.

2020 ஏப்ரல் மாதத்தில், பெரிகாத்தான் நேஷனல் (Perikatan Nasional) தலைமையிலான அரசாங்கம் இந்த மசோதாவை மேற்கொண்டு தொடர்வதில்லை என முடிவு செய்தது. இருப்பினும், ‘தேசிய நல்லிணக்கத்திற்கு அச்சுறுத்தலாக விளங்கும் ஒற்றுமை தொடர்பான விவாதங்கள் மற்றும் சர்ச்சைகளின் அதிகரிப்பைக்’ காரணம் காட்டி, இந்த ஆண்டின் ஏப்ரல் மாதத்தில் ஆரோனின் அமைச்சகம் இந்த முன்மொழிவை மீண்டும் கையில் எடுத்தது குறிப்பிடத்தக்கது.

 

 

-fmt