அன்வாரைத் தொடர்ந்து குறை கூறுவதை நிறுத்துங்கள்; கோயில் நிர்வாகமே பொறுப்பேற்க வேண்டும் – டிஏபி செனட்டர் வலியுறுத்தல்

பிரதமர் அன்வார் இப்ராஹிம், பிரான்ஸ் ஜனாதிபதி இமானுவல் மக்ரோனுடன் கோலாலம்பூரில் உள்ள வரலாற்றுச் சிறப்புமிக்க இந்துக் கோயிலுக்குச் சென்றபோது, கோயிலுக்குள் நுழைவதற்கு முன்பு காலணிகளைக் கழற்ற வேண்டும் என்ற மத வழக்கத்தைப் பின்பற்றாமல் இரு தலைவர்களும் காலணிகளை அணிந்திருந்த சம்பவத்தைத் தொடர்ந்து விமர்சனங்களுக்கு உள்ளாகியுள்ளார்.

இந்நிலையில், DAP செனட்டர் ஒருவர் அன்வாருக்கு ஆதரவாகக் குரல் கொடுத்துள்ளார். இந்தச் சம்பவம் தொடர்பாக அன்வாரை விமர்சிப்பவர்களைக் குறை கூறிய அவர், இந்த விவகாரத்தை இதோடு முடித்துக்கொண்டு முன்னோக்கிச் செல்லுமாறும் வலியுறுத்தியுள்ளார்.

இந்தச் சம்பவம், அன்வாருக்கும் பக்காத்தான் ஹராப்பானுக்கும் மிகவும் நெருக்கடியான காலகட்டத்தில் இடம்பெற்றுள்ளது. இந்திய மலேசிய சமூகத்தினரிடையே கூட்டணிக்கான ஆதரவு குறைந்து வருவதாகக் கூறப்படும் நிலையில், ஏற்கெனவே பல்வேறு கேள்விகளை அக்கூட்டணி எதிர்கொண்டு வருகிறது.

“பிரதமர் அன்வாரை (PMX) விமர்சிப்பதற்கும் அரசியல் ரீதியாகத் தாக்குவதற்கும் வாய்ப்புகளைத் தேடுவதற்குப் பதிலாக, மலேசியாவின் கலாசாரப் பன்முகத்தன்மையையும் பாரம்பரியத்தையும் உலகத் தலைவர்களுக்கு அறிமுகப்படுத்த அவர் மேற்கொண்ட முயற்சியை நாம் பாராட்ட வேண்டும்.

“கோயில் நிர்வாகமே இதுகுறித்து விளக்கமளித்து, இந்த வருகையை வரவேற்றுள்ளது. எனவே, இந்த விவகாரம் போதும். சர்ச்சைக்கு முற்றுப்புள்ளி வைத்து நாம் முன்னோக்கிச் செல்வோம்,” என்று பினாங்கு இந்து அறக்கட்டளை வாரியத்தின் துணைத் தலைவருமான டாக்டர் ஆர்.ஏ. லிங்கேஸ்வரன் (மேலே) தெரிவித்தார்.

இந்த விவகாரத்தை அனைத்துத் தரப்பினரும் ஊகங்களின் அடிப்படையில் அணுகாமல், உண்மைகளின் அடிப்படையில் பகுத்தறிவுடனும் நியாயமாகவும் அணுக வேண்டும் என்றும் அவர் கூறினார்.

ஸ்ரீ மகா மாரியம்மன் கோயில் நிர்வாகக் குழுத் தலைவர் ஆர். நடராஜா வெளியிட்டிருந்த ஓர் அறிக்கையையும் லிங்கேஸ்வரன் சுட்டிக்காட்டினார்.

அந்த அறிக்கையில், இரு தலைவர்களின் வருகையும் முன்கூட்டியே திட்டமிடப்படாத திடீர் வருகை என்றும், அவர்கள் கோயிலின் ராஜகோபுரத்தின் கீழ் அமைந்துள்ள வெளிப்புற மண்டபத்திலேயே இருந்ததாகவும், பிரதான பிரார்த்தனைக் கூடத்திற்கோ அல்லது சன்னிதானத்திற்கோ செல்லவில்லை என்றும் நடராஜா தெரிவித்திருந்தார்.

ஸ்ரீ மகா மாரியம்மன் கோயில் நிர்வாகக் குழுத் தலைவர் ஆர். நடராஜா

“எனவே, இணையத்தில் பரவி வரும் புகைப்படங்கள் அல்லது காணொளிகளை மட்டுமே அடிப்படையாகக் கொண்டு, இந்து மதத்தை அவமதித்துவிட்டதாக இரு தலைவர்களையும் நாம் குற்றம் சாட்டவோ, அவசரப்பட்டு முடிவெடுக்கவோ கூடாது,” என்றும் அவர் கூறினார்.

அதேவேளை, வழிபாட்டுத் தலத்தின் விதிமுறைகளும் பாரம்பரிய நடைமுறைகளும் பின்பற்றப்படுவதை உறுதிப்படுத்த வேண்டிய பொறுப்பு அதன் நிர்வாகத்தையே சாரும் என்றும் லிங்கேஸ்வரன் குறிப்பிட்டார்.

மகா மாரியம்மன் கோயில் நிர்வாகக் குழுவின் கீழ் இயங்கும் பத்துமலை முருகன் கோயிலை மறைமுகமாகக் குறிப்பிட்டுப் பேசிய அவர், உடற்பயிற்சிக்காகப் படிக்கட்டுகளைப் பயன்படுத்தும் இந்தியச் சமூகத்தைச் சேர்ந்தவர்கள் உட்பட சிலர் விளையாட்டுக் காலணிகளை அணிந்திருப்பதைத் தாம் பார்த்துள்ளதாகக் கூறினார்.

பிரதமர் அன்வார் இப்ராஹிம் மற்றும் பிரான்ஸ் ஜனாதிபதி இமானுவல் மக்ரோன் கோயிலில்

குறிப்பிட்ட விதிமுறைகள் இருந்தால், அவை அனைத்து வருகையாளர்களுக்கும் தெளிவாகத் தெரிவிக்கப்பட வேண்டும். இனம், அந்தஸ்து அல்லது பதவி ஆகியவற்றைப் பொருட்படுத்தாமல், அனைவரிடமும் அவை ஒரே மாதிரியாகவும் தொடர்ச்சியாகவும் அமல்படுத்தப்பட வேண்டும்.

“நிர்வாகத்திலும் விதிமுறைகளை அமல்படுத்துவதிலும் உள்ள குறைபாடுகள் இன்னும் சரிசெய்யப்படாத நிலையில், மற்ற சமூகத்தினரைக் குறை கூறிக்கொண்டே இருக்க முடியாது,” என்றும் அவர் தெரிவித்தார்.

‘உணர்வுபூர்வமான விவகாரங்களைக் கையாள்வதில் முதிர்ச்சியுடன் செயல்பட வேண்டும்’

பிரான்ஸ் ஜனாதிபதியின் வருகை என்பது சாதாரணமான ஒரு நிகழ்வு அல்ல என்றும், அந்தச் சமூகத்தின் பாரம்பரியம், கலாசாரம் மற்றும் வழிபாட்டுத் தலங்களை அவருக்கு அறிமுகப்படுத்த மலேசியப் பிரதமர் எடுத்த முயற்சியும் சிறிய விடயமல்ல என்றும் லிங்கேஸ்வரன் வலியுறுத்தினார்.

இத்தகைய உணர்வுபூர்வமான விவகாரங்களைக் கையாள்வதில் நாம் அதிக முதிர்ச்சியுடன் செயல்பட வேண்டும். அனைத்து மதங்களையும் மதிக்க வேண்டும். குற்றச்சாட்டுகளை முன்வைப்பதற்கு முன்னர் உண்மைகளை ஆராய வேண்டும். சிறிய விடயங்களைச் சமூகத்தைப் பிளவுபடுத்தும் கருவிகளாக மாற்றக்கூடாது.

“குறுகிய அரசியல் நலன்களைவிட ஒற்றுமையும் பரஸ்பர மரியாதையுமே மிகவும் முக்கியமானவை,” என்று அவர் வலியுறுத்தினார்.

இதற்கிடையில், அன்வார், மக்ரோன் மற்றும் அவர்களுடன் வந்த பாதுகாப்புப் பணியாளர்கள் உள்ளிட்ட குழுவினர் கோயிலுக்கு காலணிகளை அணிந்துகொண்டு சென்றதற்கு மலேசிய இந்து சங்கம் (MHS) நேற்று வருத்தம் தெரிவித்திருந்தது.

“இந்து மரபில், கோயிலுக்குள் நுழைவதற்கு முன்பு காலணிகளைக் கழற்றுவது வெறும் கலாசார சம்பிரதாயம் மட்டுமல்ல. அது தூய்மை, பணிவு, பக்தி மற்றும் வழிபாட்டுத் தலத்தின் புனிதத்தன்மைக்கு மதிப்பளித்தல் ஆகிய அடிப்படைக் கொள்கைகளில் வேரூன்றிய முக்கியமான மத நடைமுறையாகும்,” என்று அதன் தலைவர் தங்க கணேசன் தெரிவித்தார்.

மலேசிய இந்து சங்கத் தலைவர் தங்க கணேசன்

இரண்டு நாள் உத்தியோகபூர்வ பயணமாக கோலாலம்பூர் வந்திருந்த பிரான்ஸ் ஜனாதிபதி மக்ரோனுடன், கோயில் அமைந்துள்ள பெட்டாலிங் வீதி பகுதியில் அன்வார் நடைப்பயணம் மேற்கொண்டிருந்தார்.

இரு நாடுகளையும் சேர்ந்த பிரதிநிதிகள் குழுக்கள், மூத்த அரசாங்க அதிகாரிகள் மற்றும் பாதுகாப்புப் பணியாளர்களும் இந்த நிகழ்வில் கலந்துகொண்டனர். பிரதமர் துறை (கூட்டரசுப் பிரதேசங்கள்) அமைச்சர் ஹன்னா இயோவும் இதில் பங்கேற்றிருந்தார்.