‘புரொஜெக்ட் ஐசி’ பற்றித் தாம் அறிந்திருக்கவில்லை என்றது முழுப் பொய் என்று குறை சொல்வோர், அன்வார் இப்ராகிம் அந்த விவகாரம் தொடர்பில் மெளனமாக இருக்கிறாரே அவரிடம் அதைப் பற்றிக் கேட்க வேண்டியதுதானே என்று காட்டமாக உரைத்தார்.

தாம் பிரதமராக இருந்த காலத்தில் ‘புரொஜெக்ட் ஐசி’ நடந்திருந்தால் அப்போது துணைப் பிரதமராக இருந்த “பக்காத்தான் தலைவர் ஒருவர்”   அதைத் தடுத்திருக்கலாமே என்று செய்தியாளர்களிடம் கூறினார்.   அன்வாரின் பெயரை அவர் குறிப்பிடவில்லை.

“அவரும் அரசாங்கத்தில்தான் இருந்தார். அரசின் கொள்கையை அறிவார்.  அரசு அப்படியொரு கொள்கையைக் கொண்டிருந்தால் அவர் ஏன் அதைத் தடுக்கவில்லை”, என்று வினவினார்.

அன்வாரைக் குறிப்பிடுகிறாரா என்று கேட்டதற்கு “இருக்கலாம்” என்றார்.

நேற்று சாபா கள்ளக்குடியேறிகள் மீதான அரச ஆணையத்திடம் சாட்சியம் அளித்தபோது ‘புரொஜெக்ட் ஐசி’ பற்றித் தமக்குத் தெரியாது என்று மகாதிர் குறிப்பிட்டிருந்தார்.