கெடா மாநில மந்திரிபுசார் முக்ரிஸ் மகாதிர் பழிவாங்கும் மந்திரிபுசார் என்பதற்கான அறிகுறிகள் வெளிப்படுகின்றன. பாரிசானுக்கு எதிரான வாக்களித்ததால் சீனர்களை தண்டிக்கும் எண்ணத்தில் செயல்படுகிறார்  என்று செபுத்தே நாடாளுமன்ற உறுப்பினர் தெரசா கோ கூறுகிறார்.

கெடா மாநில சீனப்பள்ளிகளிடமிருந்து வரும் எந்தக் கோரிக்கையையும் தாம் ஏற்றுக்கொள்ளப்போவதில்லை என்று முக்ரீஸ் விடுத்துள்ள அறிக்கை “ஒரு மந்திரிபுசாரின் தகுதிக்கு ஏற்றதல்ல”, என்று கோ இன்று விடுத்த ஓர் அறிக்கையில் கூறியுள்ளார்.

“யாருக்கு ஆதரவு அளிக்க விரும்புகின்றனர் என்று தேர்வு செய்யும் உரிமை மக்களுக்கு உண்டு என்பதை முக்ரீஸ் ஏற்றுக்கொள்ள வேண்டும் என்பதோடு சீன வாக்காளர்களும் வரி கட்டுகிறவர்கள் என்பதையும் அவர் உணர வேண்டும்”, என்று தெரசா மேலும் கூறினார்.

தமது நிருவாகம் தேசியப்பள்ளிகள் மீது கவனம் செலுத்தும் ஏனென்றால் பாரிசானுக்கு வாக்களித்து கெடாவில் மீண்டும் ஆட்சியில் அமர்த்தியவர்களை தாம் உதாசீனம் செய்ய முடியாது என்று செப்டெம்பர் 24 இல் ஷா அலாமில் செய்தியாளர்களிடம் முக்ரீஸ் கூறியுள்ளார்.

“நான் நியாயமாக நடந்து கொள்ள விரும்புகிறேன். நானும் மனிதன்தானே. இறுதியில் எனக்கு முன்பு உதவியவர்களுக்கு உதவும் கட்டாயத்திற்கு ஆளாகியிருக்கிறேன்”, என்றாரவர்,

முக்ரீஸ் இவ்வாறு கூறியிருப்பது இது முதல்தடவை அல்ல. தேசிய ஒற்றுமையை வளர்ப்பதற்காக தாய்மொழிப்பள்ளிகளை தேசியப்பள்ளிகளாக மாற்ற வேண்டும் என்று முன்பே அவர் கூறியுள்ளதை கோ சுட்டிக் காட்டினார்.

முக்ரீஸ் மகாதிரி முன்பு அம்னோ துணைத் தலைவர் பதவிக்குப் போட்டியிட்ட போதும் தாய்மொழிப்பள்ளிகளை மூட வேண்டும் என்று அறிக்கை விடுத்திருந்தார்.

சீன சமூகத்தினர் தெரிவித்த கடும் எதிர்ப்பைத் தொடர்ந்து தாம் அவ்வாறு கூறவில்லை என்று மழுப்பியவர்தான் இந்த முக்ரீஸ். இவர் கடுமையாக கண்காணிக்கப்பட வேண்டியவர். இது என்ன ஒரு சிறிய விசயம்தான் என்று கூறுவதற்கு தயாரக துணைக் கல்வி அமைச்சர் இருக்கும் வரையில் முக்ரீஸ் இதுவும் கூறுவார், இன்னமும் கூறுவார்.