ஹிண்ட்ராஃப்-உடன் செய்து கொண்ட ஒப்பந்தத்திற்கு பிரதமர்தான் பதில் சொல்ல வேண்டுமே அல்லாமல், மூன்றாம் தரப்பினர் அல்லர் என்கிறார் ஹிண்ட்ராஃப் இயக்கத்தின் தேசிய ஆலோசகர் நா. கணேசன்.

மலேசியாவில் நலிந்த நிலையில் உள்ள இந்தியர்களின் பொருளாதார மேம்பாட்டிற்காக ஹிண்ட்ராஃப் இயக்கத்துடன் தேசிய முன்னணி சார்பில் புரிந்துணர்வு ஒப்பந்தத்தை பிரதமர் செய்து கொண்டார். ஆனால், அதை பின்பற்ற அவர் தவறி விட்டார். இது சார்பாக ஹிண்ட்ராஃப் தேசிய முன்னணி அரசாங்கத்தின் மீது வழக்கு தொடுக்க ஆலோசித்து வருகிறது.

இதற்கு பதிலடி கொடுக்கும் வகையில், ‘கடந்த 58 ஆண்டுகளாக அரசு, மக்களுக்காக ஏராளமானதை செய்துவிட்டது’ என்று இடைத்தரப்பினர் இதில் தலையிடுவதும் கருத்துரைப்பதும் இந்தியர்கள் எதிர்நோக்கும் பிரச்சினைகளை நீர்த்துப் போகச்செய்வதாகும். அத்துடன், இந்த இடைத்தரப்பினர், தங்களைத்  தாங்களே தாழ்த்திக் கொள்ளவும் முற்படுகின்றனர் என்று வருத்தப்பட்டு கொண்டார் கணேசன்.

குறைந்த வருமானம் பெரும் இந்தியர்களுக்காக, குடும்ப மாத ஊதியமாக 3,000 வெள்ளிவரை பெறுவோர், தங்களின் வருமானத்தை இரட்டிப்பாக்க ஆவன செய்யப்படும்; அவர்களுக்காக பொருளாதார மேம்பாட்டுத் திட்டங்கள் தீட்டப்படும் என்று செய்து கொண்ட ஒப்பந்தம் 2013 பொதுத் தேர்தலுக்குப் பின் அதற்காக மேற்கொண்ட நடவடிக்கைகள்  என்னென்ன என்று அரசு பட்டியலிட முடியுமா என்று கணேசன் வினவிகிறார்.

ஹிண்ட்ராஃப் ஒப்பந்தத்தின்படி, இடம்பெயர்ந்த தோட்டத் தொழிலாளர்களுக்காக தேசிய அளவில் 100,000 வீடுகள் 2018-ஆம் ஆண்டுக்குள் வழங்கப்பட வேண்டும். குறைந்தபட்சம் கடந்த இரண்டாண்டுகளில் 40,000 வீடுகளாவது வழங்கப்பட்டிருக்க வேண்டும்.

அதைப்போல, தோட்டங்களில் இருந்து இடம்பெயர்ந்த இளைஞர்களின் மேம்பாட்டிற்காக, நாடு முழுவதும் உள்ள 176 ‘கியாட்மாரா மையங்கள்’, 78 சமூகக் கல்லூரிகள், ஏனைய தொழிற் பயிற்சி நிலையங்களில் எல்லாம் வாய்ப்பு வழங்கப்பட வேண்டும்.

நாட்டில் உள்ள ஆலயங்கள், தேவாலயங்கள்,  இடுகாடுகள் யாவும் நிரந்தர நிலத்தில் நீடிக்க வேண்டும்; மாறாக, இடமாற்றம் செய்யப்படக்கூடாது என்றும் ஒப்பந்தத்தில் வலியுறுத்தப்பட்டிருந்தது. ஆனால், ஆலயங்கள் அவ்வப்பொழுது இடிக்கப்படுவது தொடர்கின்றன.

“ஹிண்ட்ராஃப் இயக்கமும் தேசிய முன்னணி அரசும் கையொப்பமிட்டுக் கொண்ட புரிந்துணர்வு ஒப்பந்தத்தைப் பற்றி வினா எழுப்பினால், ‘7 புதிய தமிழ்ப் பள்ளிகளுக்கு தேசிய முன்னணி அரசு அங்கீகாரம் அளித்துள்ளது; மெட்ரிகுலேஷன் பயில 1,500 இடங்கள் அளிக்கப்பட்டுள்ளன; தமிழ்ப் பள்ளிகளுக்கு நிதி அளிக்கப்பட்டுள்ளது; இணைக்கட்ட வசதி, பாலர் கல்வி வசதி என்றெல்லாம் கல்வித்துறை துணை அமைச்சர் ப. கமலநாதனும் தமிழ்ப் பள்ளிகள் உருமாற்ற செயல் திட்ட பொறுப்பாளர் பேராசிரியர் டத்தோ என்.எஸ்.இராஜேந்திரனும் அறிக்கை விடுவது மக்களைக் குழப்பும் நடவடிக்கையாகும்.”

“எத்தனை ஆண்டுகள் அதையே தொடர்ந்து சொல்லி மக்களைக் குழப்புவீர்கள். அரசு ஒவ்வொரு ஆண்டும் ரிமா 50 பில்லியனை மேம்பாட்டுக்காக மட்டுமே செலவழிக்கிறது. அமைச்சர் ப. கமலநாதனும் பேராசிரியர் டத்தோ என்.எஸ்.இராஜேந்திரனும் சொல்லும் இந்த விசயங்கள் அனைத்தையும் அரசாங்கம் உண்மையிலேயே செய்ய ஒப்புக் கொண்ட திட்டங்களுடன் ஒப்பிடக்கூடாது.”

“தயவு செய்து மக்களைக் குழப்புதை நிறுத்துங்கள்” என்ற கணேசன், பிரதமர்தான் இதற்கு நேரடியாகப் பதில்கூற வேண்டும் என்கிறார்.