இலங்கையில் தமிழ் மக்களுடைய அரசியல் உரிமை பிரச்சினைக்கு நிரந்தரமானதும், நியாயமானதுமான தீர்வினை பெற்றுக் கொள்வதற்கான சரியான சந்தர்ப்பம் அமைந்திருக்கின்றது. இந்தச் சந்தர்ப்பத்தை நாங்கள் சரியான முறையில் ஒற்றுமையாக நின்று பயன்படுத்திக் கொள்ளவேண்டும் என எதிர்க் கட்சித் தலைவர் இரா. சம்பந்தன் தெரிவித்துள்ளார்.

இன்றைய தினம் யாழ்.மருதனார் மடம் இராமநாதன் கல்லூரியில் இடம்பெற்ற தமிழ்த் தேசிய மே நாள் நிகழ்வில் கலந்து கொண்டு உரையாற்றும் போதே அவர் மேற்கண்டவாறு குறிப்பிட்டுள்ளார்.

அங்கு தொடர்ந்து உரையாற்றிய அவர்,

இலங்கையில் தமிழ், சிங்கள இனப்பிரச்சினைக்கு தீர்வு காண்பது தமிழ் மக்களுக் கு மட்டுமல்ல. இலங்கைக்கே அது முக்கியமான ஒன்றாகும்.

இந்த நாடு கடன் சுமையில் இருந்து நீங்கவேண்டுமானால், இந்த நாட்டில் வெளிநாட்டவர்கள் முதலீடுகளை செய்யவேண்டுமானால், இந்த நாடு அபிவிருத்தியடைய வேண்டுமானால், இந்த நாட்டு மக்களுடையவாழ்க்கை தரம் உயர்வடையவேண்டுமானால் இனங்களுக்கிடையில் நல்லிணக்கம் உருவாக வேண்டும்.

இனப்பிரச்சினைக்கு தீர்வு காணப்படவேண்டும். இனப்பிரச்சினைக்கு தீர்வினை காணாமல் இந்த நல்லாட்சி அரசாங்கம் அல்ல வேறு எந்த அரசாங்கமாக இருந்தாலும் தங்கள் இலக்கினை ஒருபோதும் அடைய முடியாது. என்பதை நாம் திட்டவட்டமாக சொல்லவிரும்புகிறோம்.

மேலும் இனப்பிரச்சினையை தீர்ப்பதற்கான ஒரு சரியான சந்தர்ப்பம் தற்போது அமைந்திருப்பதாக நான் நம்புகிறேன். இந்தச் சந்தர்ப்பம் சாதாரணமாக அமையவில்லை. இதற்காக எங்களுடைய மக்கள் பல அழிவுகளை சந்தித்திருக்கிறார்கள், பல துன்பங்களை கண்டிருக் கிறார்கள். பல உயிர் தியாகங்களை செய்திருக்கின்றார்கள்.

அவ்வாறு கிடைக்கப்பெற்றிருக்கும் சந்தர்ப்பத்தை நாங்கள் சரியான முறையில் பயன்படுத்திக் கொள்ளவேண்டும். இந்தக் கருமத்தில் வேற்றுமை என்ற கருத்துக்கே இடமில்லை.

நாம் அனைவரும் ஒன்றிணைந்து இந்த விடயத்தில் செயலாற்றவேண்டும். 2009ற்கு பின்னர் வந்த காலங்களில் ஐ.நா மனித உரிமைகள் கூட்டத்தொடரில் பல தீர்மானங்கள் நிறைவேற்றப்பட்டிருக்கின்றன. எமக்காக அவற்றில் இறுதியாக நிறைவேற்றப்பட்ட தீர்மானத்திற்கு இலங்கை அரசாங்கம் ஒப்புதல் தெரிவித்திருக்கின்றது.

இதனடிப்படையில் உண்மைகள் கண்டறியப்படவேண்டும், பாதிக்கப்பட்ட மக்களுக்கு நீதி கிடைக்கவேண்டும், மேலும் இவ்வாறான சம்பவங்கள் இனிமேலும் நடக்காமல் பாதுகாத்துக் கொள்ளவேண்டும். இவை நடக்கவேண்டுமானால் எமக்கு அரசியல் தீர்வு கிடைக்கவேண்டும்.

இந்த விடயத்திற்கும் இங்கே முன்வைக்கப்பட்ட தொழிலாளர்களுடைய பிரச்சினைகளுக்கும் நேரடியான தொடர்புகள் உண்டு. அந்தவகையில் எமக்கான அரசியல் தீர்வு கிடைக்கும்போது அந்தப் பிரச்சினைகள் இருக்காது.

இங்கே பல பிரச்சினைகளை பேசியிருந்தீர்கள். கடற் றொழிலாளர் பிரச்சினைகள், விவசாயிகளின் பிரச்சினைகள், மற்றும் பல பிரச்சினைகள் இங்கே பேசப்பட்டிருக்கின்றன. உண்மையில் இறமை பகிரப்பட்டதன் அடிப்படையில் எமக்கான தீர்வு ஒன்று கிடைக்கப் பெற்றிருந்தால் இவ்வாறான விடயங்கள் இன்றைக்கு பேசப்பட்டிருக்க வாய்ப்பில்லை.

மேலும் நாம் பிரிவினை கேட்கவில்லை. நாட்டை பிரிக்கவேண்டும் என நாங்கள் கேட்கவில்லை. நாங்கள் கேட்பது ஒன்றே உலகத்தில் பல இனங்கள், பல மதங்கள் சார்ந்த மக்கள் எப்படி தங்களை தாங்களே நிர்வகித்துக் கொண்டு வாழ்கிறார்களோ. அவ்வாறான ஒரு முறைசார் தீர்வையே நாங்கள் கேட்கிறோம்.

அவ்வாறான தீர்வை பெற்றுக் கொள்ள நாங்கள் தயார். இந்த விடயத்தில் நாங்கள் ஒற்றுமையாக செயலாற்றினால் சர்வதேசத்தின் நன்மதிப்பையும் நாங்கள் பெற்றுக் கொள்ள முடியும்.

மேலும் காணாமல்போனவர்கள் விடயத்தில் தீர்வு காணப்படவேண்டும், மக்களுடைய காணிகள் விடுவிக்கப்படவேண்டும் என்பவற்றில் நாங்கள் செய்ய கூடியவற்றை செய்து கொண்டிருக்கின்றோம்.

2015ம் ஆண்டு வரையில் எதுவுமே நடக்காத நிலையில் தற்போது சில விடயங்கள் நடைபெற்றிருக்கின்றன. அந்த விடயங்கள் மேலும் துரிதமாக நடைபெறுவதற்கு எங்களால் முடிந்தவற்றை தொடர்ந்தும்செய்வோம். மேலும் இன்றைய நாள் தொழிலாளர்களுக்கான நாள் வடகிழக்கு மாகாணங்களை சேர்ந்த தொழிலாளர்கள் மிகமோசமான இன்னல்களை சந்தித்திருக்கின்றார்கள்.

அவர்கள் எங்கள் சமூகத்தின் முதுகெலும்பாக திகழ்கிறவர்கள். அவர்களுடைய உரிமைகளுக்காக நாங்கள் எப்போதும் குரல் கொடுப்பதற்கு தயாராகவே இருக்கின்றோம். தொழிலாளர்களுடையவாழ்க்கை திருப்திகரமாக அமைந்தாலேயே சமூகம் திருப்திகரமானதாக இருக்கும்.

தொழிலாளர்களுடைய இந்த நாளை அவர்கள் அடைவதற்காக சர்வதேச மட்டத்தில் பல போராட்டங்களை நடத்தி வெற்றி பெற்ற நாளே இன்றைய நாள். இந்த நாள் இலங்கையில் அன்னியர் காலத்திலும், சுதந்திரம் பெற்றதன் பின்னரும் நினைவுகூறப்படுகின்றது.

இந்நிலையில் இந்த நாளின் முக்கியத்துவத்தை உணர்ந்து இந்நிகழ்வுகளை ஒழுங்கமைத்தவர்கள் உண்மையில் பாராட்டப்படவேண்டியவர்கள். இதேபோல் இப்போது அரசியலமைப்பு மறுசீரமைப்பிற்கான முயற்சிகள் மேற்கொள்ளப்பட்டுக் கொண்டிருக்கின்றன.

அதில் அடிப்படை உரிமைகள், மனித உரிமைகளுக்கான தனியான கோவை உருவாக்கப்படவேண்டும். அதில் தொழிலாளர் உரிமைகளும்உள்ளடங்கும். அந்த விடயத்தில் நாங்கள் கரிசனை செலுத்துவோம்.

மேலும் வடகிழக்கு மாகாணங்கள் அதிகம் போரினால் பாதிக்கப்பட்ட மாகாணங்கள் என்னும் அடிப்படையில் விசேடமாக வடகிழக்கு மாகாணங்களை மேம்படுத்த திட்டங்கள் மேற்கொள்ளப்படுவதாக அறிகிறோம்.

அந்த விடயத்தில் நாங்கள் பங்காற்றி நிபுணர்களின் கருத்துக்களையும் உள்வாங்கி செயலாற்றுவோம். அது எங்களுடைய கடமை என்றார்.

-http://www.tamilwin.com