அஜில் சட்டமன்ற உறுப்பினர் கசாலி தயிப் மாநில ஆட்சிக்குழுவிலிருந்து விலகிக்கொள்வது நல்லது என்று அம்னோ திரெங்கானு தகவல் தொடர்புப் பிரிவுத் தலைவர் வான் அப்துல் ஹகிம் வான் மொக்தார் அறிவுறுத்தியுள்ளார்.
அது ஒரு கடுமையான நடவடிக்கைதான் என்றாலும் திரெங்கானு மாநில அரசு மந்திரி புசார் அஹ்மட் ரசிப் அப்துல் ரஹ்மான் தலைமையில் சீராக செயல்பட அது அவசியம் என வான் அப்துல் ஹகிம் கூறினார்.
“கசாலி மாநில அரசின் கவுன்சிலர், கொள்கைகளை வகுத்து செயல்படும் முக்கிய குழுவில் இருப்பவர். அரசில் இருந்துகொண்டு அவரே அஹமட் ரசிப்பின் தலைமை செயல்படாதிருக்கிறது எனக் குறை கூறுவது ஏன்?
“அது அவரும் செயல்படவில்லை என்றுதானே பொருள். செயல்படவில்லை என்று பொதுப்படையாகக் கூறக் கூடாது, அது குழப்பம் தருகிறது. எது செயல்படவில்லை என்பதை அவர் தெளிவாக விளக்க வேண்டும்”, என்று வான் அப்துல் ஹகிம் கூறினார்.
