அம்னோவின் சுங்கை பெசார் தொகுதியின் தலைவரும் சிவப்புச் சட்டை அணியின் தலைவருமான ஜமால் முகமட் யுனுஸ் பெர்சேயின் தலைவர் மரியா சின் கோரியிருந்தவாறு தாம் அவரிடம் மன்னிப்பு கேட்கப்போவதில்லை என்று கூறினார்.

இஸ்லாமிய அரசு (ஐஎஸ்) பெர்சேயில் ஊடுறுவியிருப்பதாகவும் அது அரசாங்கத்தைக் கவிழ்க்கப் போவதாகவும் ஜமால் விடுத்திருந்த அறிக்கையை அவர் 48 மணி நேரத்திற்குள் திரும்பப் பெற்றுக்கொண்டு மன்னிப்பு கோர வேண்டும் என்று மரியா அவரின் வழக்குரைஞர் நிறுவனத்தின் மூலம்  ஜமாலுக்கு கடிதம் அனுப்பியிருந்தார்.

அக்கடிதத்தை குப்பை என்று வர்ணித்த ஜமால் அதை மலத்தொட்டியில் போட்டு நீரால் பீற்றியடித்தார்.

ஜமால் இன்று பிற்பகல் மணி 4.45 அளவில் சிலாங்கூர் அம்னோ கட்டடத்தில் ஒரு செய்தியாளர் கூட்டத்திற்கு ஏற்பாடு செய்திருந்தார்.

செய்தியாளர்கள் வந்து சேர்ந்ததும் அவர்களைப் பக்கத்திலுள்ள கழிவறைக்கு இட்டுச் சென்று மரியாவின் கடிதத்தைக் கிழித்து அங்குள்ள மலத்தொட்டியில் போட்டு விட்டு, இது குப்பை என்றார்.

தாம் மரியாவிடம் மன்னிப்பு கேட்கப் போவதில்லை என்று கூறிய ஜமால், சிவப்புச் சட்டையினர் ஜனநாயகத்திற்காக  போராடுவர் என்றும் அவர்கள் எங்கு சென்றாலும் அவர்களைத் தொடர்ந்து சென்று போராடுவோம் என்றார்.