வியாழன் அன்று தொடங்கிய தேர்வின் இரண்டாவது அமர்விற்கு SPM 2021 கேள்விகளின் அதே தொகுப்பு பயன்படுத்தப்பட்டதாக எழுந்த குற்றச்சாட்டைத் தொடர்ந்து எந்த நடவடிக்கையும் எடுப்பதற்கு முன், கல்வி அமைச்சகம் (MOE) மலேசிய தேர்வு வாரியத்தின் அறிக்கையை ஆய்வு செய்யும்.

துணைக் கல்வி அமைச்சர் மஹ் ஹாங் சூன் ( Mah Hang Soon) கூறுகையில், இவ்விவகாரம் சரியாகத் தீர்க்கப்படுவதை உறுதி செய்வதற்காக தொடர்புடைய எந்தவொரு தரப்பினருக்கும் தேவைற்றதை யூகிக்க வேண்டாம் என்றார்.

“எனக்கு இப்போதுதான் தகவல் கிடைத்தது, என்ன அனுமானம் இருந்தாலும், தேர்வு வாரியத்தின் அறிக்கைக்காக நாம் காத்திருக்க வேண்டும் என்று நினைக்கிறேன். அதன்பிறகு, தகுந்த தொடர் நடவடிக்கை எடுப்பதற்கு முன் நாங்கள் விவாதிப்போம், ”என்று அவர் இன்று ஈப்போவில் பேராக் சீன வர்த்தக மற்றும் தொழில்துறை உறுப்பினர்களுடன் ஒரு சந்திப்பை நடத்திய பின்னர் கூறினார்.

இரண்டாவது அமர்வில் பாஹாசா மேலாயு தேர்வு கேள்விகள் (listening test) பரவலாகப் பகிரப்பட்ட முதல் SPM அமர்வை ஒத்ததாகக் கூறப்படும் குற்றச்சாட்டுகளுக்கு பதிலளிக்குமாறு MOE மற்றும் தேர்வு வாரியத்தை பல தரப்பினர் வலியுறுத்தியதாக நேற்று ஒரு ஊடகம் செய்தி வெளியிட்டுள்ளது.

இரண்டாவது சிறப்பு SPM அமர்வு, சமீபத்தில் கோவிட்-19, வெள்ளம் காரணமாக தேர்வெழுத முடியாமல் போன மாணவர்கள் மற்றும் தேர்வுகள் இயக்குனரால் சிறப்பு விலக்கு அளிக்கப்பட்டவர்களுக்கானது.