ஐக்கிய நாடுகளின் பொதுச் சபையால் தடைகள் ஏற்றுக்கொள்ளப்படும் வரை, எந்தவொரு நாட்டின் மீதும் ஒருதலைப்பட்சமான தடைகளை மலேசியா அங்கீகரிக்காது என்று வெளியுறவு அமைச்சர் சைபுதீன் அப்துல்லா கூறினார்.

“இது எப்போதும் மலேசியாவின் கொள்கையாக இருந்து வருகிறது. ஒரு தடை இருந்தால், அது ஐ.நா.வின் வழியாக செல்ல வேண்டும், ஐ.நா-வால் தீர்மானம் நிறைவேற்றப்பட்டால், ஐ.நா.வின் உறுப்பினர் என்ற முறையில், நாம் மதிக்க வேண்டும், கடைப்பிடிக்க வேண்டும், ” என்று சனிக்கிழமை அவர் தனது அலுவலகத்தில் ஊடகங்களுக்கு அளித்த சிறப்பு பேட்டியில் கூறினார்.

உக்ரேனுடனான ரஷ்யாவின் தொடர்ச்சியான போரைத் தொடர்ந்து மேற்கு நாடுகளும் அதன் நட்பு நாடுகளும் ரஷ்யா மீது சுமத்தியுள்ள பரந்த அளவிலான சர்வதேச தடைகள் குறித்து அமைச்சர் கருத்து தெரிவித்தார்.

ரஷ்யா-உக்ரேன் மோதல் குறித்து சைஃபுதீன் கூறுகையில், மலேசியா எந்த தரப்பினருடனும் அணிசேரா நிலைப்பாட்டைத் தக்க வைத்துக் கொண்டுள்ளது, ஆனால் அதே நேரத்தில் இறையாண்மை அச்சுறுத்தும் எந்தவொரு நாட்டின் ஆக்கிரமிப்பையும் ஒருபோதும் மன்னிக்கவில்லை என்றார்.

“இந்த மோதலை முடிவுக்குக் கொண்டுவர இரு தரப்பினரையும் நாங்கள் தொடர்ந்து ஊக்குவிக்கிறோம். இரு தரப்புடனும் இணைந்து செயல்படும் நபர்கள் உள்ளனர் என்பதை நாங்கள் அறிவோம். அந்த அளவிற்கு நாங்கள் ஈடுபடவில்லை, ஆனால், அதற்காக செயல்படும் கட்சிகளுடன் தொடர்பில் இருக்கிறோம்,” என்றார்

மலேசியர்கள், குறிப்பாக ரஷ்யாவில் படிக்கும் மாணவர்கள் மீது பொருளாதாரத் தடைகளின் தாக்கம் குறித்து மேலும் கருத்து தெரிவித்த சைபுதீன், தற்போது அவர்களின் நலன் மற்றும் பாதுகாப்பு குறித்து கவனம் செலுத்தப்பட்டு வருவதாகக் கூறினார்.

இப்போதைக்கு, ரஷ்யாவில் உள்ள மலேசியர்கள் இன்னும் யூனியன் பே (Union Pay)  சேவை மூலம் நிதி பரிவர்த்தனைகளை செய்யலாம். இருப்பினும், யூனியன் பே சேவைகளை நடத்தும் ரஷ்ய வங்கிகள் இதுவரை மூன்று வங்கிகளுக்கு மட்டுமே.

வெளியுறவு அமைச்சகம் நிலைமையை உன்னிப்பாகக் கண்காணித்து வருவதாகவும், ரஷ்யா-உக்ரைன் மோதலின் தாக்கம் குறித்த சமீபத்திய முன்னேற்றங்கள் குறித்து சர்வதேச வர்த்தகம் மற்றும் தொழில்துறை அமைச்சகத்திடம் இருந்து தொடர்ந்து கருத்துக்களைப் பெற்று வருவதாகவும் அவர் கூறினார்.

ரஷ்யாவில் இதுவரை 816 மலேசியர்கள் உள்ளனர். இதில் 779 மாணவர்கள் மற்றும் 37 வெளிநாட்டவர்கள் உள்ளனர்.

ஐக்கிய நாடுகள் சபையின் மதிப்பீட்டின்படி, பிப்ரவரி 24 அன்று ரஷ்யா உக்ரைன் மீது போரைத் தொடங்கியதில் இருந்து குறைந்தது 3,309 பொதுமக்கள் கொல்லப்பட்டுள்ளனர், கிட்டத்தட்ட 3,500 பேர் காயமடைந்துள்ளனர்.

5.7 மில்லியனுக்கும் அதிகமான மக்கள் வேறு நாடுகளுக்குத் தப்பிச் சென்றுள்ளனர், சுமார் 7.7 மில்லியன் மக்கள் உள்நாட்டில் இடம்பெயர்ந்துள்ளனர்.