பிரதமர் இஸ்மாயில் சப்ரி யாக்கோப், சுற்றுச்சூழல் மீறல்களுக்கு கடுமையான சட்டங்களைக் கொண்டு தீர்வு காண வேண்டும் என்கிறார்.

நேற்று(5/6), கோலாலம்பூரில் உள்ள தாமன் துகுவில்(Taman Tugu) உலக சுற்றுச்சூழல் தின கொண்டாட்டத்தை நிறைவேற்றிய பின்னர் செய்தியாளர்களிடம் பேசிய இஸ்மாயில் சப்ரி, முன்பு நன்கு பராமரிக்கப்பட்ட வனப்பகுதியாக இருந்த பூங்காவை, பொறுப்பற்ற தரப்பினரால் குப்பைக் கிடங்காக மாற்றியதை மேற்கோள் காட்டினார்.

“எனவே, சுற்றுச்சூழல் அழிவுக்கு வழிவகுக்கும் விதிமீறல் சம்பவங்கள்  எதுவும் இல்லை என்பதை உறுதிப்படுத்தும் முயற்சியில் சுற்றுச்சூழல் தொடர்பான சட்டங்கள் விரைவுபடுத்தப்பட வேண்டும்”.

“சுற்றுச்சூழல் சட்டம் பற்றி நீண்ட நாட்களாக பேசி வருகிறோம்… இருப்பினும், என்னால் முழுமையான தகவல்களைப் பெற முடியவில்லை. புதன்கிழமை (அமைச்சரவைக் கூட்டத்தில்) இந்த சுற்றுச்சூழல் சட்டம் விரைவுபடுத்தப்பட வேண்டும் என்பதை நான் வலியுறுத்துகிறேன், ஏனென்றால் நிறைய அத்துமீறல்கள் ஏற்படுகின்றன,” என்று அவர் கூறினார்.

இஸ்மாயில் சப்ரி இது தவிர, உலகம் தற்போது காலநிலை மாற்றத்தை அனுபவித்து வருவதால், மக்கள் சுற்றுச்சூழலை தொடர்ந்து கவனித்துக் கொள்ள வேண்டும் என்றும், அதன் விளைவுகள் ஏற்கனவே உணரப்பட்டுள்ளன என்றும் கூறினார்.

மேலும் விவரித்த பிரதமர், காலநிலை மாற்றம் காரணமாக முன்னர் ஏற்பட்ட பெரும் வெள்ளம் எந்த நேரத்திலும் ஏற்படலாம் என்றார்.

பிரதமர் இஸ்மாயில் சப்ரி யாக்கோப்

“உதாரணமாக, கடந்த ஆண்டு வெள்ளம் எதிர்பாராத வெள்ளம் மற்றும் சில பகுதிகளில்  வெள்ளம் ஏற்பட்டன, அவை இதற்கு முன்பு ஒருபோதும் வெள்ளத்தை அனுபவித்ததில்லை. கடந்த காலங்களில், வடகிழக்குப் பருவமழை நவம்பர், டிசம்பர் மற்றும் ஜனவரி மாதங்களில் ஏற்படும் என்று நாம் எதிர்பார்க்கலாம், ஆனால் இப்போது இது நேரத்தைப் பொருட்படுத்தாமல் நிகழ்கிறது”.

“கோலாலம்பூரில் திடீர் வெள்ளம் ஏற்பட்டது. பருவநிலை மாற்றம் ஏற்கனவே தொடங்கிவிட்டதை இது காட்டுகிறது, அடுத்த 10 ஆண்டுகளில் இது இன்னும் மோசமாக இருக்கும் என்று எதிர்பார்க்கிறோம்,” என்றார்

முன்னதாக, இஸ்மாயில் சப்ரி, உலக சுற்றுச்சூழல் தினத்துடன் இணைந்து ஆற்றிய உரையில், “ஒரே ஒரு பூமி” என்ற கருப்பொருளில், உலகளாவிய காலநிலை மாற்றத்தை எதிர்கொள்வதில் குறுகிய மற்றும் நீண்ட காலத்திற்கான அரசாங்கத்தின் செயல் திட்டம் மற்றும்  முயற்சிகளை மீண்டும் விளக்கினார்.

2025 ஆம் ஆண்டுக்குள் புதுப்பிக்கத்தக்க எரிசக்தித் திறனின் பங்கை 31%, மறுசுழற்சி விகிதத்தை 40% உயர்த்துவதும், நாட்டின் வனப் பரப்பில் குறைந்தது 50% பராமரிப்பதும் அரசாங்கத்தின் இலக்குகளில் அடங்கும் என்றார்.