பாஸ் தலைவர் அப்துல் ஹாடி அவாங்(Abdul Hadi Awang) மற்றும் பெர்மாத்தாங் பாவ் நாடாளுமன்ற உறுப்பினர் முகமட் பவாஸ் முகமட் ஜான்(Permatang Pauh MP Muhammad Fawwaz Mohamad Jan) ஆகியோரின் ஆத்திரமூட்டும் அறிக்கைகள்குறித்த விசாரணை ஆவணங்கள் மேலதிக நடவடிக்கைகளுக்காக அட்டர்னி ஜெனரல் சேம்பர்ஸிடம் (AGC) ஒப்படைக்கப்படும்.
அவர்கள்மீது காவல்துறை மற்றும் மலேசிய தகவல் தொடர்பு மற்றும் பல்லூடக ஆணையம் நடத்திய விசாரணைகள்குறித்து கேட்டபோது உள்துறை அமைச்சர் சைபுடின் நசூத் இஸ்மாயில் இதைக் கூறினார்.
“பல புகார்கள் பதிவு செய்யப்பட்டு விசாரணை ஆவணங்கள் திறக்கப்பட்டுள்ளன என்பதை மட்டுமே என்னால் உறுதிப்படுத்த முடியும்”.
“AGC இடம் ஒப்படைக்கப்படுவதற்கு முன்பு இந்தச் செயல்முறை தொடரட்டும்,” என்று சினார் ஹரியான் ஏற்பாடு செய்த டவுன்ஹால் அமர்வில் கலந்து கொண்ட பின்னர் அவர் செய்தியாளர்களிடம் கூறினார்.
முன்னதாக, புக்கிட் மெர்தாஜாமில் உள்ள தைமூர் லாட் போலீஸ் மாவட்ட தலைமையகத்தில் போலீசாரிடம் அவர் அளித்ததாகக் கூறப்படும் இனவெறி தொடர்பான அறிக்கைகள்குறித்த விசாரணைகுறித்து வாக்குமூலம் அளித்ததாகப் பவாஸ் கூறினார். கடந்த வெள்ளிக்கிழமை பிற்பகல் 3 மணிக்கு வாக்குமூலம் பதிவு செய்யப்பட்டது.
இதற்கிடையில், ஹாடி (மேலே), ஆகஸ்ட் 20, 2022 அன்று அவரது முகநூல் இடுகை தொடர்பாக விசாரிக்கப்பட்டார்.
மலேசியாவில் ஊழலின் வேர்களில் பெரும்பகுதி முஸ்லிம் அல்லாதவர்கள் மற்றும் பூமிபுத்ரா அல்லாதவர்கள் என்று ஹாடி கூறியதைத் தொடர்ந்து ஹாடிக்கு எதிராக 28 அறிக்கைகள் கிடைத்ததை போலீசார் உறுதிப்படுத்தினர்.
ஹாடி மற்றும் ஃபவாஸுக்கு எதிராகத் தண்டனைச் சட்டத்தின் பிரிவு 505 (c)இன் கீழ் விசாரணைகள் மேற்கொள்ளப்பட்டன என்று சைஃபுடின் முன்பு கூறியிருந்தார், ஃபவாஸ் முஸ்லிமல்லாதவர்களை அவதூறாகப் பேசியதாகக் குற்றம் சாட்டப்பட்டார்.
