பினாங்கில் உள்ள செபராங் ஜெயாவில்(Seberang Jaya) காற்றின் தரம் ஆரோக்கியமற்ற நிலையிலும், இன்று மேலும் மூன்று இடங்களில் மிதமான அளவிலும் இருந்தது.

காலை 10 மணி நிலவரப்படி செபராங் ஜெயா 151 காற்று மாசு குறியீட்டு தரத்தைக் கொண்டிருந்ததாகச் சுற்றுச்சூழல் துறை (The Department of Environment) வலைத்தளம் தெரிவித்துள்ளது.

மிண்டன்(Minden) (95), செபராங் பேராய்(Seberang Perai) (91) மற்றும் பாலிக் புலாவ்(Balik Pulau) (82) ஆகியவற்றில் API(Air Pollutant Index) மிதமான அளவில் இருந்தது.

0 முதல் 50 வரையிலான API நல்ல காற்றின் தரத்தைக் குறிக்கிறது; 51 முதல் 100 வரை, மிதமானது; 101 முதல் 200 வரை, ஆரோக்கியமற்றது; 201 முதல் 300 வரை, மிகவும் ஆரோக்கியமற்றது மற்றும் 300 மற்றும் அதற்கு மேற்பட்டவை, ஆபத்தானவை.

இதற்கிடையில், கிளந்தானின் கோத்தா பாருவில், புகைமூட்டம் காரணமாகக் காற்றின் தரம் குறைந்ததைத் தொடர்ந்து நகர மக்கள் முகமூடிகளை அணியத் தொடங்கியுள்ளனர்.

43 வயதான ஆசிரியர் ரோஸ்மலைலி அப்துல் ரகுமான் கூறுகையில், API வாசிப்பு நேற்று இப்பகுதியில் ஆரோக்கியமற்ற நிலையில் இருந்தது.

8 முதல் 17 வயது வரையிலான எனது 4 குழந்தைகளையும் முக கவசம் அணிந்து பள்ளிக்குச் செல்லச் சொல்லியிருக்கிறேன். தங்களுக்கும் தங்கள் குடும்பங்களுக்கும் முன்னெச்சரிக்கை நடவடிக்கைகளை எடுப்பதைத் தவிர, இந்த நிகழ்வு மோசமடைவதைத் தடுப்பதில் பொதுமக்களும் ஒரு பங்கைக் கொண்டிருக்க வேண்டும், இதில் திறந்தவெளி எரிப்பு மற்றும் பலவற்றைச் செய்யக் கூடாது,” என்று அவர் கோத்தா பாருவில் பெர்னாமாவிடம் கூறினார்.

நேற்று, கோத்தா பாரு மற்றும் தனா மேரா ஆகியவை முறையே 107 மற்றும் 104 API பதிவு செய்தன.

34 வயதான ஹசிரா அஹ்மத் ஜைதி, “சமீபத்தில், வறண்ட மற்றும் மங்கலான வானிலை காரணமாக நான் தொண்டை புண் மற்றும் இருமல் ஆகியவற்றிற்கு ஆளாகியிருக்கிறேன், ஆனால் முகமூடியை அணிந்த பிறகு, அறிகுறிகளைக் குறைக்க முடிந்தது,” என்று கூறினார்.

கடந்த சில நாட்களாக மருந்தகத்தில் முகக்கவசங்களின் விற்பனை அதிகரித்து வருவதாக மெடிக்கல் பார்மசி செயல்பாட்டு மேலாளர் ஃபைஸ் சியாஹிரான் முகமட் தெரிவித்தார்.