கிள்ளான் முன்னாள் எம்பி சார்லஸ் சாண்டியாகோவுக்கு எதிராக முஸ்லீம் மத போதகர் ஜாகிர் நாயக் தொடுத்த அவதூறு வழக்கை விசாரித்த உயர்நீதிமன்றம், இரண்டு தனித்தனி அறிக்கைகளில் ஒன்று நாயக்கிற்கு அவதூறு ஏற்படுத்துவதாக இருந்தது என்று தீர்ப்பளித்துள்ளது.

தமிழீழ விடுதலைப் புலிகளுடன் (LTTE) தொடர்பு இருப்பதாகக் கூறப்படும் நாயக்கின் விமர்சனத்தைத் தொடர்ந்து 12 நபர்கள் தடுப்புச் சட்டத்தின் கீழ் கைது செய்யப்பட்டதாக சாண்டியாகோ கூறிய கருத்துகள் நாயக்கை அவதூறாகக் கருதுவதாக நீதிபதி அக்தர் தாஹிர் தீர்ப்பளித்தார்.

சாண்டியாகோவின் கருத்துக்கள் வெறும் யூககமான கருத்து என்றும் சரிபார்க்கப்படவில்லை என்றும் அவர் கூறினார்.

“எனவே, பிரதிவாதி (சாண்டியாகோ) கூறிய  அறிக்கை வாதிக்கு (நாயக்) அவதூறாக இருக்கும் என்று நீதிமன்றம் தீர்ப்பளிக்கிறது,” என்று நீதிபதி தனது காரணங்களை இன்று வாசித்தார்.

இருப்பினும், இந்த அறிக்கை நாயக்கின் புகழைக் கெடுக்கவில்லை என்றும் அவர் தீர்ப்பளித்தார்.

“இந்தக் கருத்துக்கள், உண்மையில், மலேசியாவில் செல்வாக்கு மிக்கவர் என்ற வாதியின் (நாயக்) நற்பெயரை உயர்த்தியுள்ளது,” என்று அவர் கூறினார்.

நீதிபதியின் வழிகாட்டுதலின் பேரில் இருவரும் நீதிமன்றத்தில் ஆஜராகிய நிலையில், சாண்டியாகோ நாயக்கிடம் மன்னிப்புக் கோரினார், அதை நாயக் ஏற்றுக்கொண்டார். எவ்வாறாயினும், நீதிபதி சாண்டியாகோவுக்கு எதிராக எந்த இழப்பீடும் வழங்கவில்லை.

இரண்டாவது அறிக்கை மீதான நாயக்கின் புகார் தள்ளுபடி செய்யப்பட்டது.

மலேசியாவின் உள்நாட்டு அரசியலில் நாயக் கருத்து தெரிவிக்க அனுமதிக்கப்பட வேண்டுமா என்பதை பரிசீலிக்குமாறு டாக்டர் மகாதீர் முகமட் தலைமையிலான அப்போதைய பக்காத்தான் ஹராப்பான் (PH) அரசாங்கத்தை வலியுறுத்தி சாண்டியாகோ தன்னை இழிவுபடுத்தினார் என்ற நாயக்கின் மற்ற புகாரையும் அக்தர் நிராகரித்தார்.

நாயக், ஆகஸ்ட் 8, 2019 அன்று கிளந்தான் கோத்தா பாருவில் ஆற்றிய உரையில், மலேசியாவின் சொந்தப் பிரதமரை விட இந்தியப் பிரதமரை ஆதரிக்க விரும்பும் மலேசிய இந்துக்களின் விசுவாசத்தை கேள்வி எழுப்பினார். சீன மலேசியர்கள் “பழைய விருந்தாளிகள்” என்றும் அவர்கள் தங்கள் மூதாதையர் நிலத்திற்குச் செல்ல வேண்டும் என்றும் அவர் கூறினார்.

நீதிபதி தனது தீர்ப்பில், “முஸ்லிமல்லாதவர்களால் இஸ்லாம் பற்றிய தவறான கருத்து” என்ற தலைப்பில் நாயக்கின் பேச்சுக்கு சாண்டியாகோவின் அறிக்கை பதிலளிப்பதாக கூறினார்.

ஒரு மதத் தளத்தைப் பயன்படுத்தி மலேசியர்களிடையே இனக் கலவரங்களையும் கசப்பையும் தூண்டும் சாத்தியம் உள்ளது என்ற கவலையின் வெளிப்பாடாக சாண்டியாகோவின் அறிக்கையைப் படித்ததாக அக்தர் கூறினார்.

“முஸ்லிம் அல்லாதவர்களால் இஸ்லாம் பற்றிய பரவலான தவறான எண்ணம் இருப்பதாகக் கூறுவதற்கு எதுவும் இல்லை என்பதால், மலேசியச் சூழலில் இந்த தலைப்பு பொருத்தமற்றது.”

“இது விவாதிக்க தேவையற்ற ஒரு தலைப்பு என்று நீதிமன்றம் கருதுகிறது,” என்று அவர் கூறினார்.

சீன சமூகத்தை மலேசியாவை விட்டு வெளியேறுமாறு கேட்டுக் கொள்ளப்பட்டது நாயக்கின் சுய விரக்தியின் பின்னனி என்று   அக்தர் கூறினார்.