ஆயர் கூனிங் இடைத்தேர்தலில் வெற்றி பெற்ற பிறகு, அரசாங்கம் அதீத தன்னம்பிக்கையுடன் இருப்பதற்கு எதிராக எச்சரித்த பிரதமர் அன்வார் இப்ராஹிம், பொதுமக்களின் கவலைகளை நிவர்த்தி செய்யத் தீவிர முயற்சிகளை மேற்கொள்ளுமாறு அழைப்பு விடுத்தார்.

இன்றைய அமைச்சரவைக் கூட்டத்தில் பிரதமர் இதை எழுப்பியதாகவும், வெற்றி பெற்ற BN சகாக்களை வாழ்த்தியதாகவும் தகவல் தொடர்பு அமைச்சரும் அரசாங்க செய்தித் தொடர்பாளருமான பஹ்மி பட்ஸில் தெரிவித்தார்.

“இந்த முடிவால் அரசாங்கம் அதிக நம்பிக்கையோ அல்லது நிம்மதியோ அடையக் கூடாது, மாறாக மக்களின் பிரச்சினைகளைத் தீர்க்கக் கடினமாக உழைக்க வேண்டும்,” என்று பிரதமர் வலியுறுத்தினார்.

“பொதுமக்கள் அரசியல் நிலைத்தன்மையை மட்டுமல்ல, நலனைப் பாதுகாக்கும் அதே வேளையில் பொருளாதார வளர்ச்சியை இயக்கும் நிர்வாகத்தையும் விரும்புகிறார்கள் என்பது தெளிவாகிறது,” என்று இன்று புத்ராஜெயாவில் நடந்த தனது வாராந்திர செய்தியாளர் சந்திப்பில் பஹ்மி கூறினார்.

அன்வார் வெற்றியை நேர்மறையானதாகக் கருதினார், முந்தைய பொதுத் தேர்தலுடன் ஒப்பிடும்போது குறைந்த வாக்குப்பதிவு இருந்தபோதிலும், இளம் மற்றும் மலாய் வாக்காளர்களிடையே ஆதரவு மாறி வருவதைக் காட்டுகிறது என்று அவர் கூறினார்.

20 வாக்குச் சாவடி மாவட்டங்களில், BN 19 இடங்களை வென்றது, பெரிகத்தான் நேஷனல் குறைந்த பெரும்பான்மையுடன் ஒரு இடத்தை மட்டுமே பெற்றது, Parti Sosialis Malaysia (PSM) மூன்று வாக்குச் சாவடி மாவட்டங்களில் PN – ஐ விடச் சிறப்பாகச் செயல்பட்டது.

மும்முனைப் போட்டியில், BN வேட்பாளர் யுஸ்ரி பக்கீர் 11,065 வாக்குகளைப் பெற்று கூட்டணிக்கான இடத்தைத் தக்க வைத்துக் கொண்டார். PN வேட்பாளர் அப்துல் முஹைமின் மாலெக் (6,059 வாக்குகள்) மற்றும் PSM வேட்பாளர் பவானி கேஎஸ் (1,106 வாக்குகள்) ஆகியோரை அவர் தோற்கடித்தார்.

இந்த வெற்றியின் மூலம், 1986 முதல் கூட்டணி கைப்பற்றி வரும் ஆயர் கூனிங்கில் BN-இன் கோட்டை தொடர்ந்து நிலைநிறுத்தப்பட்டுள்ளது.