40-க்கும் மேற்பட்ட நகைகள் காணாமல் போனது தொடர்பாக, லெபனானைச் சேர்ந்த ஜூவல்லர் குளோபல் ராயல்டி டிரேடிங் எஸ்ஏஎல் (Global Royalty Trading SAL), ரோஸ்மா மன்சூருக்கு எதிராகத் தொடர்ந்த 14.57 மில்லியன் அமெரிக்க டாலர் (ரிம67.46 மில்லியன்) மதிப்பிலான உரிமையியல் வழக்கில் ஜூன் 10-ஆம் தேதி தீர்ப்பு வழங்கப்படும் என கோலாலம்பூர் உயர் நீதிமன்றம் நிர்ணயித்துள்ளது.

மூன்றாம் தரப்பினரான – காவல்துறைத் தலைமை ஆய்வாளர் மற்றும் மலேசிய அரசாங்கத்தின் ஆறாவது சாட்சியான சோங் டோங் லியோங்கின் சாட்சியத்துடன் விசாரணை நிறைவடைந்ததையடுத்து, நீதிபதி குவே சூ சூன் இந்தத் தேதியை நிர்ணயித்தார்.

“எழுத்துப்பூர்வ சமர்ப்பிப்புகளைத் தாக்கல் செய்ய மே 13-ஆம் தேதியையும், அதற்கான பதில்களுக்கு மே 28-ஆம் தேதியையும் நீதிமன்றம் தற்போது நிர்ணயித்துள்ளது. தீர்ப்பு ஜூன் 10-ஆம் தேதி காலை 9 மணிக்கு ஜூம் செயலி மூலம் வழங்கப்படும்,” என்று அவர் கூறினார்.

முன்னதாக, 53 வயதான சோங், நட்சிஃப் என அடையாளம் காணப்பட்ட ஒருவரால் பணியமர்த்தப்பட்ட பிறகு, மார்ச் மற்றும் மே 2018-க்கு இடையில் பெவிலியன் ரெசிடென்சஸ் அடுக்குமாடி குடியிருப்பில் புதுப்பித்தல் பணிகளை மேற்கொண்டதாக சாட்சியமளித்தார்.

மே 14, 2018 அன்று, காலை 11 மணி முதல் நண்பகல் வரை, ஏர் கண்டிஷனிங் நிறுவப்படுவதற்கு முன்னதாக அந்த இரட்டை அடுக்கு வீட்டை ஆய்வு செய்யச் சென்றபோது, ​​தரைத்தள அறையில் இதற்கு முன்பு அங்கு இல்லாத சில பெரிய சூட்கேஸ்கள் இருப்பதைக் கண்டதாக அவர் கூறினார்.

“அதைப் பார்த்த பிறகு, நான் அந்த வீட்டை விட்டு வெளியேறி நட்சிப்பைத் தொடர்பு கொண்டேன், அவர் புதுப்பித்தல் பணிகளைத் தற்காலிகமாக நிறுத்துமாறு எனக்கு அறிவுறுத்தினார். பின்னர் வேலையை முடித்த பிறகு அணுகல் அட்டை (access card) மற்றும் சாவிகளைத் திருப்பித் கொடுத்தேன்,” என்று அவர் கூறினார்.

சுமார் ரிம 10,000 மதிப்பிலான அந்தப் புதுப்பித்தல் பணிகளில், ஏர் கண்டிஷனிங் நிறுவுதல் உள்ளிட்ட பொதுவான பழுதுபார்ப்புகள் அடங்கும் என்றும், கட்டிட நிர்வாக விதிகளின்படி தினமும் காலை 9 மணி முதல் மாலை 6 மணி வரை ஒரு உள்ளூர் தொழிலாளி மற்றும் ஐந்து மியான்மர் தொழிலாளர்களுடன் தான் அந்தப் பணிகளைச் செய்ததாகவும் சோங் கூறினார்.

இருப்பினும், ஏர் கண்டிஷனிங் யூனிட்கள் வருவதற்காகக் காத்திருந்ததால், 2018 மே மாத தொடக்கத்தில் இரண்டு வாரங்களுக்குப் பணிகள் நிறுத்தப்பட்டதாக அவர் கூறினார்.

“அந்த வீட்டிற்குச் செல்ல எனக்கு மட்டுமே அனுமதி இருந்தது, மேலும் ஒவ்வொரு நாளும் வேலை முடியும் வரை நான் எப்போதும் தொழிலாளர்களுடன் இருந்தேன்,” என்று அவர் கூறினார்.

‘தரை முழுவதும் சிதறிக் கிடந்தன’

நேற்று, வணிகக் குற்றப் புலனாய்வுத் துறையின் முன்னாள் இயக்குனர் அமர் சிங் ஈஷார் சிங் நீதிமன்றத்தில் கூறுகையில், மே 17, 2018 அன்று அந்த அடுக்குமாடி குடியிருப்பில் காவல்துறை நடத்திய சோதனையின் போது, பண மூட்டைகளும் நகைகளும் தரை முழுவதும் சிதறிக் கிடந்ததாகத் தெரிவித்தார்.

திங்கட்கிழமை தொடங்கிய இந்த மூன்று நாள் விசாரணையில், வாதி தரப்பு சாட்சியாக GRTS நிர்வாக இயக்குனர் சாமர் ஹசிப் ஹலிமே, பிரதிவாதியாக ரோஸ்மா மற்றும் மூத்த போலீஸ் அதிகாரிகள் உட்பட மூன்றாம் தரப்பினருக்கான ஆறு சாட்சிகள் சாட்சியமளித்தனர்.

மார்ச் 29, 2023 அன்று, GRTS நிறுவனம் ரோஸ்மாவுக்கு எதிராக ஒரு வழக்கைத் தாக்கல் செய்தது. அதில், நிறுவனத்தின் முகவர் மூலம் தன்னிடம் அனுப்பப்பட்ட வைர நெக்லஸ்கள், வளையல்கள் மற்றும் கிரீடங்கள் உள்ளிட்ட 44 நகைகளை, பணமோசடி தடுப்பு, பயங்கரவாத எதிர்ப்பு நிதியுதவி மற்றும் சட்டவிரோத நடவடிக்கைகளின் வருவாய் சட்டம் 2001-ன் கீழ் மலேசிய அதிகாரிகள் பறிமுதல் செய்ததாக அவர் பொய்யாகக் கூறுவதாகக் குற்றம் சாட்டியது.

அந்த 44 நகைகளில் ஒன்றை மட்டுமே போலீசார் வைத்துள்ளனர் என்றும், மீதமுள்ள 43 நகைகள் அவர்களின் வசம் இல்லை என்றும் நிறுவனம் தரப்பில் தெரிவிக்கப்பட்டது.

மேலும், நகைகள் காணாமல் போன நிலையில், ரோஸ்மா அந்தப் பொறுப்பை மலேசிய அரசாங்கத்தின் மீது சுமத்தியுள்ளதாக GRTS உறுதிப்படுத்தியது.