வெளியுறவு அமைச்சகம், காத்மாண்டுவில் உள்ள தனது தூதரகம் நேபாள அதிகாரிகளுடன் இணைந்து, வெள்ளத்தால் பாதிக்கப்பட்ட மலேசியர்களின் இருப்பிடத்தை கண்டறியும் பணியில் ஈடுபட்டுள்ளதாக தெரிவித்துள்ளது.

நேபாளத்தின் ராசுவா மாவட்டத்தில் போதே கோசி(Bhote Koshi) ஆறு கரைபுரண்டு ஓடியதைத் தொடர்ந்து ஏற்பட்ட பேரழிவுகரமான வெள்ளத்தில், நேற்று குறைந்தது 332 பேர் உயிரிழந்தனர்.

வெள்ளப்பெருக்கு காரணமாக நேபாளத்தின் ரசுவா மாவட்டத்தில் காணாமல் போயுள்ள 55 மலேசியர்கள் தொடர்பாக, அவர்களில் யாரேனும் உயிரிழந்திருக்கக்கூடும் என்ற தகவல் குறித்து இதுவரை எந்தவொரு அதிகாரப்பூர்வ உறுதிப்படுத்தலும் கிடைக்கவில்லை என விஸ்மா புத்ரா தெரிவித்துள்ளது.

சமூக ஊடகங்கள் மற்றும் பிற அதிகாரப்பூர்வமற்ற வழிகளின் மூலம் பரவி வரும் உறுதிப்படுத்தப்படாத தகவல்கள் குறித்து வெளியுறவு அமைச்சகம் அறிந்துள்ளதாக தெரிவித்துள்ளது.

மலேசியத் தூதரகம், காத்மாண்டுவில் உள்ள நேபாள அதிகாரிகளிடமிருந்து உறுதிப்படுத்தப்பட்ட தகவலை அவசரமாகப் பெறுவதற்கான நடவடிக்கைகளை மேற்கொண்டு வருகிறது.

“இந்த நிலையில், மலேசியர்கள் உயிரிழந்ததாக எந்தவொரு அதிகாரப்பூர்வ உறுதிப்படுத்தலையும் அமைச்சகம் பெறவில்லை,” என்று அது அறிக்கையில் தெரிவித்துள்ளது.

பொதுமக்கள் ஊகங்கள் செய்வதையோ அல்லது உறுதிப்படுத்தப்படாத தகவல்களைப் பகிர்வதையோ தவிர்க்க வேண்டும் என்றும், ஊடகங்கள் இதுபோன்ற தகவல்களை வெளியிடவோ அல்லது பெரிதுபடுத்தவோ வேண்டாம் என்றும் அமைச்சகம் கேட்டுக்கொண்டுள்ளது.

“உறுதிப்படுத்தப்படாத தகவல்கள் சம்பந்தப்பட்ட குடும்பத்தினருக்கு தேவையற்ற அச்சத்தையும் மன உளைச்சலையும் ஏற்படுத்தக்கூடும்,” என்று அது தெரிவித்தது. அதிகாரப்பூர்வ தகவல்கள் வெளியாகும் வரை அனைவரும் காத்திருக்க வேண்டும் என்றும், பாதிக்கப்பட்ட குடும்பங்களின் தனியுரிமையை மதிக்க வேண்டும் என்றும் அது வலியுறுத்தியுள்ளது.

காணாமல் போன மலேசியர்களின் பாதுகாப்பு மற்றும் இருப்பிடத்தை உறுதிப்படுத்தும் நோக்கில், காத்மாண்டுவில் உள்ள மலேசியத் தூதரகம் நேபாள அதிகாரிகள், தேடுதல் மற்றும் மீட்புக் குழுக்கள், நேபாள சுற்றுலா வாரியம், பயண முகவர்கள் மற்றும் காத்மாண்டுவில் உள்ள முக்கிய மருத்துவமனைகளுடன் தொடர்ந்து தொடர்பில் இருப்பதாக அமைச்சகம் தெரிவித்துள்ளது.

புதுடெல்லியில் உள்ள மலேசிய உயர் ஆணையத்தின் தூதரக அதிகாரிகளும், பெய்ஜிங்கில் உள்ள மலேசியத் தூதரக அதிகாரிகளும் தத்தமது நாடுகளின் சம்பந்தப்பட்ட அதிகாரிகளுடன் தொடர்பு கொண்டு வருகின்றனர்.

ரசுவா மாவட்டத்தில் நேற்று ஏற்பட்ட திடீர் வெள்ளப்பெருக்கைத் தொடர்ந்து, 55 மலேசியர்கள் இன்னும் தொடர்புகொள்ள முடியாத நிலையில் இருப்பதாக இன்று முன்னதாகத் தெரிவிக்கப்பட்டது.

அவர்களில் தீயணைப்பு மற்றும் மீட்புத் துறையைச் சேர்ந்த இரு அதிகாரிகளும், புனிதப் பயணத்திற்காக திபெத்துக்குச் சென்ற 17 மலேசியர்களும் அடங்குவர்.

நேபாளத்தின் ரசுவா மாவட்டத்தில் நேற்று போதே கோசி ஆறு கரைபுரண்டு ஓடியதைத் தொடர்ந்து ஏற்பட்ட வெள்ளப்பெருக்கில் குறைந்தது 332 பேர் உயிரிழந்துள்ளதாக காத்மாண்டு போஸ்ட் செய்தி வெளியிட்டுள்ளது.

தேடலும் மீட்புப் பணிகளும் தொடர்ந்து நடைபெற்று வரும் நிலையில், நூற்றுக்கணக்கான வெளிநாட்டு சுற்றுலா பயணிகள் உட்பட 820-க்கும் மேற்பட்டவர்களைப் பற்றி இன்னும் எந்தத் தகவலும் தெரியவில்லை.

காணாமல் போனவர்களைத் தேடும் குடும்பத்தினருக்கு உதவும் வகையில், மருத்துவமனையில் அதிகாரிகள் தகவல் சேகரிப்பு மையங்களை அமைத்துள்ளனர். அங்கு அனுமதிக்கப்பட்டவர்களின் பட்டியல்களும், உயிரிழந்தவர்களின் புகைப்படங்களும் வெளியிடப்பட்டுள்ளன என்று பெர்னாமா செய்தி வெளியிட்டுள்ளது.