மியான்மர் நாட்டவர் 5,000 பேரை அவர்களின் சொந்த நாட்டிற்கு திருப்பி அனுப்பும் பணியின் முதற்கட்ட நடவடிக்கை செப்டம்பர் 29ஆம் தேதி தொடங்கும் என்று உள்துறை அமைச்சகம் தெரிவித்துள்ளது.

முதற்கட்டமாக 1,476 மியான்மர் நாட்டவர்கள் இரண்டு மலேசிய போர்க்கப்பல்கள் மற்றும் ஒரு மியான்மர் மருத்துவக் கப்பல் மூலம் திருப்பி அனுப்பப்படுவார்கள் என்று அமைச்சகம் கூறியது.

தளவாடங்கள் மற்றும் ஒருங்கிணைப்பு தேவைகளை பரிசீலித்த பிறகு, உள்துறை, வெளியுறவு மற்றும் பாதுகாப்பு அமைச்சகங்கள் மற்றும் தேசிய பாதுகாப்பு கவுன்சில் உள்ளடக்கிய கூட்டத்தில் இந்த தேதி ஒப்புக்கொள்ளப்பட்டது, என்று தெரிவிக்கப்பட்டுள்ளது.

இந்த 1,476 மியான்மர் நாட்டவர்கள் ஆகஸ்ட் 13 தேதியிட்ட தூதரக குறிப்பில் மியான்மர் அரசாங்கத்தால் அடையாளம் காணப்பட்டவர்கள்” என்று அமைச்சகம் தனது அறிக்கையில் தெரிவித்துள்ளது.

ஆகஸ்ட் 15 நிலவரப்படி, 10,388 மியான்மர் நாட்டவர்கள் குடிவரவு தடுப்பு முகாம்களில் அடைக்கப்பட்டுள்ளதாக உள்துறை அமைச்சகம் கூறியுள்ளது.

இந்த எண்ணிக்கை தடுத்து வைக்கப்பட்டுள்ள அனைத்து மியான்மர் நாட்டவர்களையும் உள்ளடக்கியது என்பதும், அவர்கள் அனைவரையும் அகதிகளாகக் கருத முடியாது என்பதும் வலியுறுத்தப்பட வேண்டும், என்று அது கூறியுள்ளது.

மேலும், இந்த ஆண்டு அகதிகள் பதிவு ஆவண முன்முயற்சியின் கீழ் பதிவு செய்வதற்காக 4,008 மியான்மர் நாட்டவர்கள் அனுப்பப்படுவார்கள் என்றும் அமைச்சகம் தெரிவித்துள்ளது.

அவர்கள் இந்த ஆண்டின் நான்காம் காலாண்டிற்குள் முழுமையாகப் பதிவு செய்யப்படுவார்கள் என்று எதிர்பார்க்கப்படுகிறது.

இந்தத் திட்டம் பின்னர் ஆவணமற்ற அனைத்து புலம்பெயர்ந்தோர், யுஎன்எச்சிஆர் அட்டைதாரர்கள் மற்றும் தங்களை அகதிகள் என்று கூறுபவர்களுக்கும் விரிவுபடுத்தப்படும் என்று அமைச்சகம் தெரிவித்துள்ளது.

பதிவுசெய்யப்பட்டவர்களுக்கு தற்காலிகமாக தங்குவதற்கு அனுமதிக்கும் டிபிபி அட்டைகள் வழங்கப்படும்; இது அரசாங்கத்தால் நிர்ணயிக்கப்பட்ட நிபந்தனைகள், கட்டுப்பாடுகள் மற்றும் கண்காணிப்பு நடவடிக்கைகளுக்கு உட்பட்டது, என்று அது கூறியுள்ளது.

ஐநா அகதிகள் மாநாடு மற்றும் நெறிமுறையில் மலேசியா பங்கேற்பதாகவோ அல்லது அதை அங்கீகரிப்பதாகவோ இந்த டிபிபி முன்முயற்சியை பொருள் கொள்ள முடியாது என்பதையும் அமைச்சகம் வலியுறுத்தியுள்ளது.

ஜூலை மாத இறுதியில், உள்துறை அமைச்சர் சைஃபுதீன் நசுத்தியோன் இஸ்மாயில் கூறுகையில், 5,000 மியான்மர் அகதிகளை திருப்பி அனுப்பும் மலேசியாவின் திட்டத்திற்கு முன்னதாக, அவர்களை அடையாளம் காணுதல், ஆவணப்படுத்துதல் மற்றும் பரிசோதிக்கும் செயல்முறைகளை தனது அமைச்சகம் தொடங்கியுள்ளதாகத் தெரிவித்தார்.

 

 

 

 

-fmt