புதிய அரசியல் கட்சியைத் தொடங்குவது குறித்து அடுத்த இரண்டு மாதங்களுக்குள் முடிவெடுக்கப் போவதாகவும், இது ஒருதலைப்பட்சமான முடிவாக இருக்காது என்றும் முன்னாள் பிகேஆர் துணைத் தலைவர் ரபிஸி ரம்லி தெரிவித்துள்ளார்.

சீர்திருத்தங்களை முன்னெடுப்பதற்கு கட்சிக்குள்ளே இருப்பதா அல்லது வெளியிலிருந்து செயல்படுவதா, எது சிறந்த வழி என்பது குறித்து தாம் இன்னும் ஆராய்ந்து வருவதாக பாண்டன் நாடாளுமன்ற உறுப்பினர் கூறினார்.

இங்கு நடைபெற்ற ஆசம் பாக்கிக்கு எதிரான பேரணியில் கலந்து கொண்ட பின்னர் செய்தியாளர்களிடம் பேசிய அவர், “நண்பர்களுடன் கலந்துரையாடிய பிறகு ஜூன் மாதம் ஒரு முடிவை எடுப்பேன் என்று அவர்களுக்கு உறுதியளித்துள்ளேன்,” என்றார்.

எனது முடிவு நாடாளுமன்ற மற்றும் தொகுதி மட்டத்தில் உள்ள எனது நண்பர்களிடம் தாக்கத்தை ஏற்படுத்தும். எனவே, இது நாம் இணைந்து மதிப்பீடு செய்ய வேண்டிய ஒரு விஷயமாகும். இது அதிகாரத்தின் மீதுள்ள தாகம் பற்றியது அல்ல, நாங்கள் மாற்றங்களைக் காண விரும்புகிறோம்.”

கடந்த மே மாதம் நடைபெற்ற துணைத் தலைவர் தேர்தலில் மீண்டும் தேர்ந்தெடுக்கப்படத் தவறியதைத் தொடர்ந்து, பிகேஆர்  தலைமைத்துவத்துடனான ரஃபிஸியின் உறவு கசப்படைந்தது; அதிலிருந்து அவர் அரசாங்கத்தையும் கட்சியையும் பகிரங்கமாக விமர்சித்து வருகிறார்.

அரசாங்கத்தையும் கட்சியையும் அவர் விமர்சித்து வருவதால் பதவி விலகுமாறு பலமுறை கோரிக்கைகள் விடுக்கப்பட்ட நிலையில், தனது தொகுதியில் இடைத்தேர்தலை திணிக்க பிகேஆர் முயற்சிப்பதாக அவர் சமீபத்தில் குற்றம் சாட்டினார்.

நாடாளுமன்றம் கலைக்கப்பட்ட பிறகு பிகேஆர் கட்சியிலிருந்து விலகி, தனது பாண்டன் தொகுதியைத் தக்கவைத்துக்கொள்ளப் போவதாக ரபிஸி சூசகமாகத் தெரிவித்துள்ளார்; இருப்பினும் புதிய கட்சியைத் தொடங்குவதையோ அல்லது “மூன்றாவது சக்தியில்” இணைவதையோ அவர் நிராகரித்துள்ளார்.

இந்த மாத தொடக்கத்தில், பாண்டன் தொகுதி பிகேஆர் ஆண்டு பொதுக் கூட்டத்தில் அவரைத் தலைவர் பதவியிலிருந்து நீக்கும் முயற்சியிலிருந்து அவர் தப்பினார். அவரை நீக்க அல்லது இடைநீக்கம் செய்யக் கோரும் தீர்மானத்திற்கு எதிராக 42 தொகுதி உறுப்பினர்கள் வாக்களித்தனர் – இது ஆதரவாக வாக்களித்த 34 பேரை விட எட்டு வாக்குகள் மட்டுமே அதிகமாகும்.

 

 

 

-fmt