சீன மற்றும் இந்திய மலேசியர்களின் உரிமைகளைப் பாதுகாப்பது, இஸ்லாத்தையோ அல்லது மலாய்க்காரர்களுக்கு வழங்கப்பட்டுள்ள அரசியலமைப்பு ரீதியிலான பாதுகாப்பையோ பலவீனப்படுத்தாது என்று பிரதமர் அன்வார் இப்ராஹிம் கூறியுள்ளார்.

மலேசியா சுதந்திரம் அடைந்து கிட்டத்தட்ட 70 ஆண்டுகள் ஆகிவிட்டன என்றும், மக்களை சீனாவுக்கோ அல்லது இந்தியாவுக்கோ திரும்பிச் செல்லச் சொல்லும் வெற்றுப் பேச்சுக்களைக் கடந்து நாடு முன்னோக்கிச் சென்றிருக்க வேண்டும்.

இது மனிதர்களை அவமதிக்கும் செயலாகும். நான் ஒரு இந்தியக் குழந்தையிடம் இந்தியாவுக்குத் திரும்பிப் போ என்று சொன்னால், அவன் எங்கே போவான்? அவனுக்குத் தெரியாது. அவனுக்குத் தெரிந்ததெல்லாம் இது அவனுடைய நாடு என்பது மட்டும்தான், என்று இன்று நெகிரி செம்பிலான், பாரோயில் நடைபெற்ற ‘அன்வாருடனான சந்திப்பு’ நிகழ்வில் இளைஞர்களிடையே உரையாற்றியபோது அவர் தெரிவித்தார்.

ஒவ்வொரு இனத்தைச் சேர்ந்த மலேசியர்களுக்கும் ஒருவருக்கொருவர் உரிமைகளைப் பாதுகாக்க வேண்டிய கடமை உள்ளது என்று கூறிய அவர், அவ்வாறு செய்வது இஸ்லாத்தின் நிலையை எந்த வகையிலும் குறைக்காது என்றும் குறிப்பிட்டார்.

இஸ்லாத்தை கூட்டமைப்பின் சமயமாகவும், மலாய் ஆட்சியாளர்கள், மலாய் மொழி மற்றும் மலாய்க்காரர்கள் மற்றும் பூமிபுத்ராக்களின் சிறப்பு அந்தஸ்து ஆகியவற்றையும் கூட்டரசு அரசியலமைப்பு பாதுகாக்கிறது என்று அன்வார் கூறினார்.

இருப்பினும், இது அனைத்து இனத்தைச் சேர்ந்த மலேசியர்களின் உரிமைகளுக்கும் உத்தரவாதம் அளிக்கிறது என்றும், அவர்கள் அனைவரும் ஒரே குடும்பத்தின் உறுப்பினர்களாக ஏற்றுக்கொள்ளப்பட வேண்டும்.

மலேசிய அரசியலமைப்பில் மலாய்க்காரர்களுக்கு வழங்கப்பட்டுள்ள இடங்களை நீக்கவோ அல்லது இஸ்லாத்தைப் பலவீனப்படுத்தவோ அரசாங்கம் ஒருபோதும் முன்மொழியவில்லை என்று அவர் கூறினார்.

பக்காத்தான் ஹரப்பான் அல்லது மதானி அரசாங்கத்தின் கீழ், அரசியலமைப்பை மாற்றுவதற்கோ அல்லது அதில் உள்ள கொள்கைகளை நிராகரிப்பதற்கோ யாரும் இதுவரை முன்மொழியவில்லை, என்று அவர் கூறினார்.

 

 

-fmt