திரும்ப அனுப்பப்படுவதற்கு முன், 5,000 மியான்மர் நாட்டினரை அடையாளம் கண்டு, அவர்களின் விவரங்களை ஆவணப்படுத்தி, சரிபார்க்கும் செயல்முறை மேற்கொள்ளப்படும்.
சமீபத்தில் பிரதமர் அன்வார் இப்ராஹிம், மலேசியாவில் உள்ள 5,000 ரோஹிங்கியா அகதிகளை மியான்மர் ஏற்றுக்கொள்ள ஒப்புக்கொண்டதாக அறிவித்தார்.
உள்துறை அமைச்சகம் ரோஹிங்கியா அகதிகளை அடையாளம் காணுதல், ஆவணப்படுத்துதல் மற்றும் தகுதிச் சோதனை செய்வதற்கான நடவடிக்கைகளைத் தொடங்கியுள்ளது. இதேவேளை, மியான்மார் தனது குடிமக்களை மீண்டும் ஏற்க ஒப்புக்கொண்டதைத் தொடர்ந்து, மலேசியா 5,000 மியான்மர் நாட்டவர்களை அவர்களது நாட்டிற்கு திருப்பி அனுப்பத் தயாராகி வருகிறது.
உள்துறை அமைச்சர் சைஃபுத்தீன் நசூத்தியோன் இஸ்மாயில் கூறுகையில், தற்போது நாடு முழுவதும் உள்ள 19 குடியேற்றத் தடுப்பு மையங்களில் சுமார் 22,000 பேர் தடுத்து வைக்கப்பட்டுள்ளனர். இவர்களில் சுமார் 4,000 மியான்மார் நாட்டவர்கள் இந்த மீள அனுப்பும் செயல்முறைக்காக ஏற்கனவே அடையாளம் காணப்பட்டுள்ளனர் என்று பெர்னாமா செய்தி நிறுவனம் தெரிவித்துள்ளது.
இன்று புக்கிட் காயு ஹித்தாமில் நடைபெற்ற செய்தியாளர் சந்திப்பில் அவர் கூறியதாவது:
“இந்த 4,000 பேரும் தகுதிச் சோதனைக்காக ஒரே குடியேற்றத் தடுப்பு மையத்தில் வைக்கப்படுவார்கள். தற்போது அவர்கள் 19 மையங்களில் சிதறிக் கிடக்கின்றனர்; ஒரே இடத்தில் இருப்பதால் செயல்முறையை எளிதாக மேற்கொள்ள முடியும்.”
மேலும், மலேசியாவும் மியான்மாரும் 5,000 பேரை திருப்பி அனுப்ப ஒப்பந்தம் செய்துள்ளதாகவும், ஆனால் அவர்கள் தேவையான தகுதிகளைப் பூர்த்தி செய்கிறார்களா என்பதை உறுதிப்படுத்த அடையாளம் காணல் மற்றும் பாதுகாப்புச் சோதனைகள் முதலில் மேற்கொள்ளப்பட வேண்டும் என்றும் அவர் தெரிவித்தார்.
தேசிய பாதுகாப்பு மன்றத்தின் (MKN) உத்தரவு எண் 23-ன் கீழ் செயல்படும் Refugee Registration Document (DPP) திட்டத்தின் மூலம் இந்த நடவடிக்கை நடைபெற்று வருகிறது. இதில் உள்துறை அமைச்சகம், சம்பந்தப்பட்ட பிற அரசு அமைப்புகளுடன் இணைந்து இந்தப் பணியை முன்னெடுத்து வருகிறது.
DPP செயல்முறையில் அகதிகளைத் தேடி கண்டறிதல், அவர்களின் அடையாளத்தை உறுதிப்படுத்தல், பாதுகாப்புச் சோதனைகள் நடத்தல், ஒவ்வொருவரின் சட்டபூர்வ நிலையை நிர்ணயித்தல் மற்றும் இறுதியில் அவர்களுக்கான உறுதிப்படுத்தல் ஆவணங்களை வழங்குதல் ஆகியவை இடம்பெறுகின்றன.
“காவல்துறையும் குடியேற்றத் துறையும் இணைந்து தகுதிச் சோதனைகளை நடத்தும். செயல்முறை முடிவில், ஒவ்வொருவருக்கும் அவர்களின் அகதி நிலை குறித்து அறிவிக்கப்பட்டு, அதை உறுதிப்படுத்தும் ஆவணங்கள் வழங்கப்படும்,” என்று அமைச்சர் கூறினார்.
தென்கிழக்காசியாவில் மிக அதிகமான ரோஹிங்கியா அகதிகளை தங்கவைத்துள்ள நாடுகளில் மலேசியாவும் ஒன்றாகும். மியான்மாரின் ரகைன் மாநிலத்தில் ஏற்பட்ட துன்புறுத்தல்களிலிருந்து தப்பி வந்தவர்களில், சுமார் 1,26,000 ரோஹிங்கியா அகதிகள் உள்ளனர். மலேசியாவில் தற்போது ஐக்கிய நாடுகள் அகதிகளுக்கான உயர் ஆணையர் (UNHCR) அலுவலகத்தில் பதிவு செய்யப்பட்டுள்ள மொத்த அகதிகள் சுமார் 2,15,000 பேர்.
இதனுடன், பங்காளதேசத்தில் தங்கியுள்ள சுமார் 3,00,000 ரோஹிங்கியா அகதிகளையும் மியான்மார் மீண்டும் ஏற்க இருப்பதாகவும் தகவல்கள் வெளியாகியுள்ளன.
இந்த வாரத்தின் தொடக்கத்தில், பினாங்கின் கெப்பாலா பாதாஸ் பகுதியில் உள்ள கம்புங் குவாலா மூடாவில் வசித்ததாகக் கூறப்படும் 100-க்கும் மேற்பட்ட ரோஹிங்கியா அகதிகள், அப்பகுதி மக்களால் வெளியேற்றப்பட்டதாகக் கூறி, கோலாலம்பூரில் ஜாலான் புக்கிட் பெட்டாலிங்கில் அமைந்துள்ள UNHCR அலுவலகத்தின் முன்பு கூடினர். அவர்கள் உதவி கோரி மனு அளித்தனர்.
அவர்களிடம் செல்லுபடியாகும் UNHCR ஆவணங்கள் இருந்ததாக காவல்துறையினர் தெரிவித்தனர். முதலில் அவர்கள் காவலில் எடுக்கப்பட்டாலும், பின்னர் அம்பாங்கில் உள்ள ஒரு அரசுசாரா அமைப்பின் (NGO) பொறுப்பில் விடுவிக்கப்பட்டனர்.
2021 ஆம் ஆண்டு, நீதிமன்றம் நாடுகடத்தலை தற்காலிகமாக நிறுத்த உத்தரவிட்டிருந்தபோதிலும், மலேசியா 1,000-க்கும் மேற்பட்ட மியான்மார் நாட்டவர்களை கப்பல் மூலம் நாடு கடத்தியது. அப்போது மனித உரிமை அமைப்புகள், UNHCR-ல் பதிவு செய்யப்பட்ட அகதிகளும் தஞ்சம் கோரியவர்களும் அந்தக் குழுவில் இருந்ததாக குற்றம்சாட்டின.
மேலும், மலேசியா 1951 ஆம் ஆண்டு ஐ.நா. அகதிகள் ஒப்பந்தத்தில் கையெழுத்திடாத நாடாகும். இதனால், தஞ்சம் கோருபவர்கள் சட்டவிரோத குடியேறிகளாகவே கருதப்படுகின்றனர். இம்மாத தொடக்கத்தில், அகதிகளை நிர்வகிக்க உள்நாட்டு அமைப்பை உருவாக்கும் பணியில் இருப்பதாகக் கூறி, புதிய அகதிகளை பதிவு செய்வதை தற்காலிகமாக நிறுத்துமாறு UNHCR-யிடம் மலேசிய அரசு கேட்டுக்கொண்டது.
