பிரதமர் அன்வார் இப்ராஹிம், ரோஹிங்கியா அகதிகளை கடந்த காலத்தில் வரவேற்றதற்காக முன்னாள் பிரதமர் நஜீப் அப்துல் ரசாக் மற்றும் PAS தலைவர் அப்துல் ஹாடி அவாங் ஆகியோர் மீது குற்றம் சாட்டியுள்ளார். தற்போதைய அரசாங்கம் அதன் விளைவுகளைச் சந்திக்க வேண்டியுள்ளது என்றும் அவர் குறிப்பிட்டுள்ளார்.

சமூக ஊடகங்களில் ரோஹிங்கியா சமூகத்தினருக்கு எதிராக அதிகரித்து வரும் குடியேற்ற எதிர்ப்பு உணர்வுகளுக்கு இடையே அன்வாரின் இந்த கருத்துக்கள் வந்துள்ளன. அவர்களின் வருகை, சட்டவிரோத நடவடிக்கைகள் மற்றும் உள்ளூர் வாழ்வாதாரத்தின் மீதான தாக்கம் குறித்து நெட்டிசன்கள் கவலை தெரிவித்து வருகின்றனர்.

நினைவில் வையுங்கள், முந்தைய அரசாங்கம் தான் அவர்களை அழைத்தது. அவர்களை வரவேற்று ஒரு பெரிய பேரணியை நடத்தியது, இது அவர்களை இங்கு வர இயல்பாகவே ஊக்குவித்தது.

அவர்கள் இங்கு வந்தார்கள், இப்போது நாம் அவர்களை வெளியேற்ற வேண்டியுள்ளது, என்று ‘செம்பாங் ஓ இயா’ (Sembang Ohh Yeahh) சிறப்பு நிகழ்ச்சியில் போட்காஸ்டர் இஸ்கந்தர் இப்ராஹிமுடனான நேர்காணலின் போது அன்வார் கூறினார்.

“அவர்கள் வரவேற்கப்பட்டார்கள். அங்கு ஒரு பெரிய பேரணி நடைபெற்றது. சமூக ஊடகப் பயனர்கள் PAS தலைவர்கள் உட்பட அன்றைய தலைவர்கள் ஆற்றிய உரைகளை மீண்டும் ஒளிபரப்புவார்கள் என்று நம்புகிறேன்.

மற்றவர்கள் அவர்களை இங்கு அழைத்து வந்த போதிலும், என் மீதே பழி சுமத்தப்படுகிறது. இது என்ன மாதிரியான நிலைமை?” என்று அவர் கேட்டார்.

டிசம்பர் 2016 இல் கோலாலம்பூரில் நஜீப் மற்றும் ஹாடி ஆகிய இருவரும் கலந்து கொண்ட ரோஹிங்கியாக்களுடனான உம்மா ஒற்றுமை பேரணியை அன்வார் சுட்டிக்காட்டினார்.

இருப்பினும், ரோஹிங்கியா சமூகம் குறித்து பொதுமக்கள் மத்தியில் அதிகரித்து வரும் விரக்தியை அன்வார் ஒப்புக்கொண்டார். சில அகதிகள் சட்டத்தை மீறியுள்ளதாகவும், கிராமங்களை ஆக்கிரமித்துள்ளதாகவும், சட்டவிரோத கூட்டங்களை நடத்தியுள்ளதாகவும் மற்றும் உள்ளூர் வணிகங்களை கைப்பற்றியுள்ளதாகவும் அவர் கூறினார்.

சுமை மற்றும் பாதுகாப்பு கவலைகள்

“அவர்கள் தெளிவாக ஒரு சுமையாக மாறியுள்ளனர் – பாதுகாப்பு சுமை, பொருளாதார சுமை மற்றும் மக்களிடையே பகைமைக்கு ஒரு காரணம்,” என்று கூறிய அன்வார், அவர்களைத் தாக்கவோ, அச்சுறுத்தவோ அல்லது அவமானப்படுத்தவோ வேண்டாம் என்று மலேசியர்களிடம் கேட்டுக்கொண்டார்.

ரோஹிங்கியாக்கள் சட்டத்தை மீறினால், நாங்கள் அவர்களைக் கைது செய்வோம். ஐ.நா அகதிகள் முகமையின் (UNHCR) அலுவலகத்திற்கு வெளியே அவர்கள் திரண்டபோது நான் ஏற்கனவே உத்தரவு பிறப்பித்துள்ளேன். தாமதிக்காமல் உடனடியாக நடவடிக்கை எடுக்குமாறு காவல்துறையிடம் கூறியுள்ளேன்.

இருப்பினும், மலேசியா ஒரு மனிதநேயமிக்க நாடு என்ற தன் பிம்பத்தைக் காப்பாற்ற வேண்டும். நாம் அவர்களைக் கைது செய்யலாம், ஆனால் அவர்களை அடிக்கவோ, அச்சுறுத்தவோ அல்லது அவமானப்படுத்தவோ கூடாது என்று அவர் வலியுறுத்தினார்.

ரோஹிங்கியா குடியிருப்புகள் உட்பட ரோஹிங்கியா சமூகம் தொடர்பான பிரச்சினைகளில் பொதுமக்களும் இன்ஃப்ளூயன்சர்களும் (influencers) சட்டத்தைக் கையில் எடுக்க வேண்டாம் என்று புக்கிட் அமான் குற்றத் தடுப்பு மற்றும் சமூகப் பாதுகாப்புத் துறை இயக்குநர் நூர் ஹிசாம் நார்டின் கேட்டுக்கொண்டுள்ளார்.

மியான்மார் தலைவருக்கான அதிகாரப்பூர்வ அழைப்பு

ரோஹிங்கியா அகதிகளை கட்டம்பட ஏற்றுக்கொள்வது தொடர்பான பேச்சுவார்த்தைகளை முன்னெடுப்பதற்காக, மியான்மர் தலைவர் மின் ஆங் ஹ்லைங்கை (Min Aung Hlaing) மலேசியாவிற்கு அதிகாரப்பூர்வ விஜயம் செய்ய அழைப்பு விடுக்க விரும்புவதாக அமைச்சரவை மற்றும் உள்துறை அமைச்சிடம் அண்மையில் தெரிவித்ததாக அன்வார் கூறினார்.

நாம் நண்பர்களாக இருக்கலாம், வர்த்தகம் செய்யலாம், மியான்மாரை ஏற்றுக்கொள்ளலாம், ஆனால் மியான்மார் அகதிகளை ஏற்றுக்கொள்ள வேண்டும்.

“ஒரே நேரத்தில் 200,000 பேரையும் ஏற்றுக்கொள்ள முடியாவிட்டால், கட்டம்பட அவர்களைத் திரும்பப் பெறலாம். நாங்கள் உதவுவோம்,” என்று அவர் கூறினார்.

ராக்கினில் (Rakhine) நிலநடுக்கத்தைத் தொடர்ந்து கொலைகள் மற்றும் வான்வழித் தாக்குதல்களை நிறுத்துமாறு கோருவதற்காக தாய்லாந்தின் பாங்காக்கில் மின் ஆங் ஹ்லைங்கைச் சந்தித்ததாக அன்வார் கூறினார்.

மலேசிய கள மருத்துவமனை மற்றும் நிவாரண நிதிகள் உட்பட மனிதநேய உதவிக்கு ஈடாக, பாதிக்கப்பட்ட பகுதியில் தாக்குதல்களை நிறுத்தவும், குடியிருப்பாளர்கள் மருத்துவ வசதிகளை அணுக அனுமதிக்கவும் மியான்மார் ஒப்புக்கொண்டதாக அவர் கூறினார்.

சுமார் 18 மாதங்களுக்கு முன்பு பெய்ஜிங்கில் அவர்கள் மீண்டும் சந்தித்தபோது, மலேசியா தனது வெளியுறவு அமைச்சரை மியான்மருக்கு அனுப்புவது குறித்து பேசினார் மற்றும் அகதிகளை ஏற்றுக்கொள்ளுமாறு மீண்டும் கோரிக்கை விடுத்தார்.

ஜூண்டாவுடனான (Junta) உயர்மட்ட உறவுகளுக்கு ஆசியான் அமைப்பின் கட்டுப்பாடுகள் இருந்தபோதிலும், அகதிகள் நெருக்கடிக்கு தீர்வு காண நேரடி பேச்சுவார்த்தை அவசியம் என்று அன்வார் வாதிட்டார்.

மியான்மார் 5,000 பேரை ஏற்றுக்கொள்ள ஒப்புக்கொள்கிறது

இதன் விளைவாக, மலேசியாவிலிருந்து 5,000 ரோஹிங்கியாக்களை ஏற்றுக்கொள்வதற்கு மியான்மார் இதுவரை ஒப்புக்கொண்டுள்ளதாக அன்வார் மீண்டும் உறுதிப்படுத்தினார், அவர்களில் 1,500 பேர் அடுத்த ஒன்று அல்லது இரண்டு வாரங்களுக்குள் தாய்நாடு திரும்புவார்கள்.

மியான்மார் ஒரு கப்பலை அனுப்பும், மலேசியா அகதிகளின் உணவு, உடை மற்றும் போக்குவரத்து செலவுகளை ஏற்கும் என்று அன்வார் கூறினார். குடிவரவு தடுப்பு முகாம்களில் அவர்களை காலவரையின்றி வைத்திருப்பதை விட இது மிகவும் நடைமுறைக்குரியது மற்றும் செலவு குறைந்தது என்று அவர் வாதிட்டார்.

ரோஹிங்கியாக்களை தங்களது குடிமக்களாக ஏற்க மியான்மார் நீண்டகாலமாக மறுத்து வருவதால், அவர்களைத் திருப்பி அனுப்புவது கடினமாக உள்ளது என்பதை அன்வார் சுட்டிக்காட்டினார்.

தாய்நாடு திரும்பும் அகதிகள் மீண்டும் வன்முறையை எதிர்கொள்வதைத் தடுக்க பாதுகாப்பு உத்தரவாதங்கள் வழங்கப்பட வேண்டும் என்று பிரதமர் வலியுறுத்தினார்.

“அவர்களை மனிதநேயத்துடன் நடத்துகிறோம், உணவும் உடையும் வழங்குகிறோம் – ஆனால் அவர்கள் தாயகம் திரும்ப வேண்டும். இது உங்கள் நாடு அல்ல. இது மலேசியா, மலேசியர்களே இதைத் தீர்மானிக்க வேண்டும்,” என்று அவர் அழுத்தமாகக் கூறினார்.