இது, இந்த ஆண்டுக்கான இலக்காக நிர்ணயிக்கப்பட்ட ரிம 19.92 மில்லியன் பற்றாக்குறையுடன் ஒப்பிடுகையில் குறைவாகும்.

2027ஆம் ஆண்டுக்கான பினாங்கு மாநிலத்தின் ரிம 1.074 பில்லியன் வரவு செலவுத் திட்டத்தை இன்று மாநில சட்டமன்றத்தில் தாக்கல் செய்வதற்கு முன்னதாக முதலமைச்சர் சோவ் கொன் இயோவ்.

2027ஆம் ஆண்டுக்கான பினாங்கு மாநில வரவு செலவுத் திட்டமாக ரிம 1.074 பில்லியனை மாநில அரசு தாக்கல் செய்துள்ளது. இதில் ரிம 5.26 மில்லியன் பற்றாக்குறை கணிக்கப்பட்டுள்ளது. இதுவே மாநிலத்தின் வரலாற்றிலேயே மிகக் குறைந்த பட்ஜெட் பற்றாக்குறையாகும்.

பினாங்கு முதலமைச்சர் சாவ் கொன் இயோவ் (பக்காத்தான் ஹராப்பான் – பாடாங் கோத்தா), அடுத்த ஆண்டுக்கான வரவு செலவுத் திட்டம், இந்த ஆண்டின் ரிம 1.088 பில்லியன் ஒதுக்கீட்டைவிட ரிம 14 மில்லியன் குறைவாக இருக்கும் என்று தெரிவித்தார். அடுத்த ஆண்டில் மாநில வருவாய் ரிம 1.069 பில்லியனாக இருக்கும் என எதிர்பார்க்கப்படுவதால், ரிம 5.26 மில்லியன் என்ற வரலாறு காணாத குறைந்த பற்றாக்குறை கணிக்கப்பட்டுள்ளதாக அவர் கூறினார்.

2026ஆம் ஆண்டுக்காக ரிம 19.92 மில்லியன் பற்றாக்குறை கணிக்கப்பட்டிருந்த நிலையில், தொடர்ந்து இரண்டாவது ஆண்டாக பினாங்கு தனது மிகக் குறைந்த பட்ஜெட் பற்றாக்குறையைப் பதிவு செய்துள்ளது.

ஜனவரி முதல் அக்டோபர் 30ஆம் தேதி வரை பினாங்கு மாநிலம் ரிம 847.53 மில்லியன் வருவாயைச் சேகரித்துள்ளதாக சாவ் தெரிவித்தார். இது ஆண்டுக்கான மொத்த வருவாய் இலக்கில் 79.35 விழுக்காடாகும்.

“2026ஆம் ஆண்டுக்கான ரிம 1.068 பில்லியன் வருவாய் இலக்கை எட்டுவதை உறுதிப்படுத்த, மாநில அரசு தொடர்ந்து வருவாய் வசூலைக் கண்காணிப்பதுடன், அதனை அதிகரிப்பதற்கான முயற்சிகளையும் தீவிரப்படுத்தும்,” என்று இன்று மாநில சட்டமன்றத்தில் 2027ஆம் ஆண்டுக்கான பட்ஜெட்டைத் தாக்கல் செய்தபோது அவர் கூறினார்.

இந்த ஆண்டு அக்டோபர் 29ஆம் தேதி நிலவரப்படி, மாநில நில வாடகை வருவாய் 44.41 விழுக்காடு அல்லது ரிம 51.54 மில்லியன் அதிகரித்து ரிம 167.59 மில்லியனை எட்டியுள்ளதாக சாவ் தெரிவித்தார். கடந்த 2025ஆம் ஆண்டில் இது ரிம 116.05 மில்லியனாக இருந்தது.

கடந்த 32 ஆண்டுகளில் முதன்முறையாக இந்த ஆண்டு மேற்கொள்ளப்பட்ட நில வாடகை மறுஆய்வின் காரணமாகவே வருவாய் அதிகரித்துள்ளதாக அவர் கூறினார்.

“2027ஆம் ஆண்டிலும், சம்பந்தப்பட்ட நிபந்தனைகளுக்கு உட்பட்டு, 50 விழுக்காடு நில வரி கழிவைத் தொடர்ந்து வழங்க மாநில அரசு ஒப்புக்கொண்டுள்ளது,” என்றார்.

மேலும், மாநில அரசு ஊழியர்களுக்கு ஒரு மாதச் சம்பளத்திற்குச் சமமான சிறப்பு நிதியுதவியையும் சாவ் அறிவித்தார்.

அடுத்த ஆண்டு i-Sejahtera உதவித் திட்டத்திற்காக ரிம 58 மில்லியனும், சமமான பொருளாதார மேம்பாட்டுக்கான Bantuan Agenda Ekonomi Saksama திட்டத்திற்காக ரிம 8 மில்லியனும் ஒதுக்கப்படும் என்று அவர் தெரிவித்தார்.

பொதுப் பேருந்து சேவைத் திட்டங்களுக்கான மானியமாக ரிம 16.8 மில்லியனும், மின்-வாடகை வாகன (e-hailing) ஓட்டுநர்களுக்கு ஒருமுறை வழங்கப்படும் ரிம 600 ஊக்கத்தொகைக்காக ரிம 9 மில்லியனும், டாக்ஸி மற்றும் பள்ளிப் பேருந்து ஓட்டுநர்களுக்கான ஊக்கத்தொகையாக ரிம 1.2 மில்லியனும் ஒதுக்கப்பட்டுள்ளன.

வெள்ளத் தடுப்புத் திட்டங்களுக்காக ரிம 16.45 மில்லியனும், விவசாய முயற்சிகளுக்காக ரிம 6.5 மில்லியனும் ஒதுக்கப்பட்டுள்ளன.

விளையாட்டு வீரர்களின் திறன் மேம்பாட்டிற்காக பினாங்கு மாநில விளையாட்டுக் கழகத்திற்கு (MSNPP) ரிம 7.15 மில்லியனும், விளையாட்டு உள்கட்டமைப்புகளை மேம்படுத்துவதற்காக பினாங்கு விளையாட்டு அரங்குகள் மற்றும் திறந்தவெளி வசதிகள் கழகத்திற்கு ரிம 5 மில்லியனும் ஒதுக்கப்பட்டுள்ளன.

அடுத்த ஆண்டு கோலாலம்பூர், ஜொகூர் மற்றும் சரவாக் ஆகிய மாநிலங்களுடன் இணைந்து பினாங்கும் தென்கிழக்காசிய விளையாட்டுப் போட்டிகளை (SEA Games) நடத்தவுள்ளதால், அந்தப் பிராந்திய விளையாட்டுப் போட்டிகளுக்கான தயாரிப்புகளை மேற்கொள்வதற்காக MSNPP-க்கு மாநில அரசு மேலும் ரிம 15 மில்லியனை ஒதுக்கியுள்ளது.