உள்துறை அமைச்சர் அஹ்மட் ஜாஹிட் ஹமிடி, செய்தித்தாள்கள் இழுத்து மூடப்படும் என்று விடுத்த மிரட்டலை மீட்டுக்கொள்ள வேண்டும் என  சீன நாளேடுகளின் செய்தி ஆசிரியர்கள் சங்கம்  கோரிக்கை விடுத்துள்ளது. .

மலாக்காவில் ஒரு விளக்கமளிப்புக் கூட்டத்தில்  அமைச்சர் அவ்வாறு கூறியது வருத்தமளிப்பதாக  சீன நாளேடுகளின் ஆசிரியர்கள் நேற்று ஓர் அறிக்கையில் குறிப்பிட்டிருந்தனர்.

“அமைச்சரவை உறுப்பினர்களில் ஒருவரான அவர் சொல்வதிலும் செய்வதிலும் கவனமாக இருக்க வேண்டும். செய்தித்தாள்களை இழுத்து மூடுவேன் என்று மிரட்டக் கூடாது”, என்றவர்கள் கூறியிருந்தனர்.

இந்நாட்டில் சீன நாளிதழ்கள் மட்டும்தான் இருக்கின்றனவா? சீன நாளிதழ் ஆசிரியர்கள் மட்டும்தான் இருக்கின்றனரா? தாம் கூறியதை நாளிதழில் வெளியிட்டால் சோற்றில் மண்ணைப் போடுவேன் என்று செய்தியாளர்களை ஓர் அமைச்சர் மிரட்டி இருக்கிறார். அப்படிச் சொன்னவரின் வயிற்றில் மண்ணைப் போட முன்வராமல்,மௌனியாக இதர நாளிதழ்கள் இருப்பது ஏன்?

இன்னொன்றும் கவனத்தில் கொள்ள வேண்டும். நாளிதழ்களை மூடுவேன் என்று கூறிய உள்துறை அமைச்சரை கண்டித்தவர்கள் சீன நாளிதழ்களின் மூத்த ஆசிரியர்கள் மன்றத்தினர்கள்தான். அந்நாளிதழ்களின் உரிமையாளர்கள் மௌனமாகத்தான் இருக்கின்றனர்.