ஐக்கிய நாடுகள் மனித உரிமைப் பணியகத்தினால் மேற்கொள்ளப்படவுள்ள விசாரணை செயற்பாடுகளுக்கு தகவல் வழங்கும் நாடாளுமன்ற உறுப்பினர்களுக்கு எதிராக சட்ட நடவடிக்கை எடுக்கப்படும் என அரசாங்கம் தெரிவித்துள்ளமையானது. அவர்களை அச்சுறுத்தும் செயற்பாடாகும். அப்படியொரு சட்டம் நாட்டில் இல்லையென ஐக்கிய தேசிய கட்சியின் நாடாளுமன்ற உறுப்பினர் லக்ஷ்மன் கிரியெல்ல தெரிவித்தார்.
ஐக்கிய நாடுகள் மனித உரிமைப் பேரவையில் இலங்கை அரசுக்கு எதிராக நிறைவேற்றப்பட்டுள்ள பிரேரணையினை தாம் ஏற்றுக்கொள்ளவில்லை எனவும் அதற்கு ஒத்துழைப்பு வழங்கப் போவதில்லையெனவும் தெரிவித்துள்ள அரசாங்கம். அவர்களின் விசாரணை செயற்பாடுகளுக்கு தகவல் வழங்கும் நாடாளுமன்ற உறுப்பினர்களுக்கு எதிராக சட்ட நடவடிக்கை எடுக்கப்படும் என தெரிவித்துள்ளது.
இது அவர்களை அச்சுறுத்தும் செயற்பாடாகும். அப்படியொரு சட்டம் நாட்டில் இல்லையென ஐக்கிய தேசிய கட்சியின் நாடாளுமன்ற உறுப்பினர் லக்ஷ்மன் கிரியெல்ல தெரிவித்தார்.
இலங்கையில் ஆட்கடத்தல்கள், கொலைகள் மற்றும் அச்சுறுத்தல்கள் உள்ளிட்ட மனித உரிமை மீறல் செயற்பாடுகள் இடம்பெறுவதாக முதன்முதலில் 1990ம் ஆண்டு ஐக்கிய நாடுகள் மனித உரிமை பேரவைக்கு தகவல் வழங்கியவர்கள் தற்போதைய அமைச்சர் வாசுதேவ உள்ளிட்டவர்கள் என்பதை மறந்துவிட முடியாதெனவும் அவர் சுட்டிக்காட்டினார்.
ஐக்கிய நாடுகள் மனித உரிமை பேரவையின் விசாரணை செயற்பாடுகளுக்கு தகவல் வழங்கும் நாடாளுமன்ற உறுப்பினர்களுக்கு எதிராக சட்ட நடவடிக்கை எடுக்கப்படுமென அரசாங்கத்தின் அமைச்சர் ஒருவர் தெரிவித்திருந்தார்.
அதற்குப் பதிலளிக்கும் போதே நாடாளுமன்ற உறுப்பினர் லக்ஷ்மன் கிரியெல்ல இவ்வாறு தெரிவித்தார்.
இது தொடர்பில் அவர் மேலும் தெரிவித்ததாவது,
ஐக்கிய நாடுகள் மனித உரிமை பேரவையின் விசாரணைக்கு அரசாங்கம் முகம் கொடுக்க வேண்டும். எம்மீது சுமத்தப்பட்டுள்ள குற்றச்சாட்டுக்கள் நியாயமற்றவை என்பதை நிரூபிக்க வேண்டும். அதனை விடுத்து நாம் ஒருதலைப்பட்சமாக அதனை நிராகரிக்கின்ற போது அது எமக்குப் பாதகமாகவே அமையும்.
இலங்கை அரசாங்கம் ஐக்கிய நாடுகள் மனித உரிமை பேரவையின் விசாரணையில் கலந்து கொள்ளாவிட்டால் தனித்து விசாரணை நடத்தப்பட்டு தீர்ப்பு வழங்கப்படும். இவ்வாறானதொரு சந்தர்ப்பம் அமைந்தால் இலங்கை மீது பொருளாதாரத் தடை விதிக்க நேரிடலாம்.
பொருளாதார தடை எனும்போது சொத்துக்களை முடக்குவது, பயணத் தடை மற்றும் வெளிநாட்டு முதலீடுகளை நிறுத்துவது போன்ற செயற்பாடுகளை சர்வதேசம் மேற் கொள்ளும். எனவே, இதனால் ஏற்படும் பாதிப்பு நாட்டிற்கும் நாட்டு மக்களுக்குமேயாகும். எனவே, அரசாங்கம் இதனை உணர்ந்து கொள்ள வேண்டும்.
மனித உரிமைகள் குறித்து ஐக்கிய நாடுகள் மனித உரிமை பேரவைக்கு தகவல் வழங்கக் கூடாதென்று சட்டம் எதுவும் கிடையாது. இவ்வாறான நிலையில் இலங்கைக்கு எதிராக நிறைவேற்றப்பட்டுள்ள அமெரிக்க பிரேரணைக்கு தகவல் வழங்கும் நாடாளுமன்ற உறுப்பினர்களுக்கு எதிராக நடவடிக்கை எடுக்கப்படும் என தெரிவிக்கப்பட்டுள்ளது.
இவ்வாறான செயற்பாடுகளானது அரசாங்கத்திற்கு எதிராக உள்ள சகல வழக்குகளின் சாட்சிகளுக்கும் அச்சுறுத்தல் விடுத்து சட்டத்தையும் ஒழுங்கையும் இந்த அரசு மீறுகின்றது என்பதை உலக நாடுகளுக்கு ஒப்புவித்துள்ளது எனவும் தெரிவித்தார்.
