உலக நாடுகளின் துணையுடன் சிங்கள பௌத்த பேரினவாத அரசு தமிழர்கள் மீது திட்டமிட்டு நிகழ்த்திய இனப்படுகொலைக்கு நீதிகேட்டு உலகத்தமிழர்கள் உறுதியுடன் ஒற்றைப்புள்ளியில் இயங்கிக் கொண்டிருக்கும் நிலையில் இனப்படுகொலைக் குற்றத்தின் நேரடிப்பங்காளர்களின் எண்ணங்களிற்கு செயல்வடிவம் கொடுக்கும் விதமாக சர்வதேச சுயாதீன விசாரணையை மறுத்து உள்ளூர் விசாரனைப் பொறிமுறையை சில சக்திகள்  ஆதரித்து வந்தமையை உலகத்தமிழர்கள் தளத்திலும் புலத்திலும் முறியடித்து வருகின்றனர்.

தேர்தல் முடிவடைந்தவுடன் ஐ.நா மனித உரிமைகள் அமைப்பினால் பரிந்துரைக்கப்படவிருந்த அனைத்துலக சுயாதீனமானபோர்க்குற்ற விசாரணையை மறுதலித்து ஒரு பக்கசார்பான உள்ளக விசாரணைக்குள் முடக்கும் திட்டம் அதிவேகமாக முடுக்கி விடப்பட்டது.  எனினும் மக்களாணையை மதித்து பெரும்பான்மையான தமிழ் வேட்பாளர்கள் தொடர்ந்தும் அனைத்துலக சுயாதீனமான விசாரணையை வலியுறுத்திக் கோரியிருப்பதை நாங்கள் வரவேற்கிறோம். இந்த வகையில் வடமாகாண சபையால் அண்மையில் நிறைவேற்றப்பட்ட  சர்வதேச சுயாதீன விசாரனையைக் கோரும் தீர்மானத்தில் தமிழ் மக்களுக்கு எதிராக கட்டவிழ்த்து விடப்பட்ட  போர்க்குற்றங்களையும், மனிதகுலத்துக்கெதிரான குற்றங்களையும், இனப்படுகொலையையும் உள்ளடக்கியிருப்பதை நாம் வரவேற்கிறோம்.

சிங்களப் பௌத்த பேரினவாதத்தின் இனவெறிப் போரின்மூலம் பறித்தெடுக்கப்பட்ட எங்கள் உரிமைகளை வென்றெடுக்கும் போராட்டத்தில் புலம்பெயர் தமிழர்களது பங்கேற்பானது அதிமுக்கியமாகும். அவர்களுடன் இணைந்து முன்னெடுக்கப்படும் முயற்சிகளின் மூலமாகவே பெருவலிமைகொண்ட உந்துசக்தியாக எமது உரிமை மீட்புப் போராட்டத்தை முன்னகர்த்திச் செல்ல முடியும் என்பதனை இவ்விடத்தில் அழுத்தமாக கூறிக்கொள்ள விரும்புகின்றோம்.

-http://www.pathivu.com