காபுல்: ஆப்கானிஸ்தான் நாட்டின் கான்ஸி மாகாணத்தில் இன்று டேங்கர் லாரி மீது 2 பேருந்துகள் மோதி வெடித்து சிதறிய விபத்தில், 73 பேர் பரிதாபமாக உயிரிழந்தனர். ஆப்கானிஸ்தான் நாட்டின் கிழக்கு மாகாணங்களில் ஒன்றான கான்ஸியில் உள்ள கந்தஹார்-காபூல் இணைப்பு நெடுஞ்சாலையில் பயணிகள் பேருந்து ஒன்று சென்று கொண்டிருந்தது. திடீரென அந்த பேருந்து எதிர் திசையில் வேகமாக வந்த பெட்ரோல் டேங்கர் லாரி மீது பயங்கரமாக மோதியது. மோதிய வேகத்தில் பெட்ரோல் டேங்கர் லாரியும், பேருந்தும் தீபிடித்து எரிந்தது. அப்போது பின்னால் வந்த பேருந்தின் மீதும் தீ பற்றிக் கொண்டது.
இந்த விபத்தில் மூன்று வாகனங்களும் முற்றிலும் எரிந்து சாம்பலானது. இந்த விபத்தில் குழந்தைகள், பெண்கள் உள்பட 73 பேர் உயிரிழந்தனர். படுகாயமடைந்த 52-க்கும் மேற்பட்டோர் அருகிலுள்ள பல்வேறு மருத்துவமனைகளில் சிகிச்சைக்காக அனுமதிக்கப்பட்டுள்ளதாக கான்ஸி மாகாண அரசு செய்தி தொடர்பாளர் தெரிவித்துள்ளார். இதில் பலரது நிலைமை கவலைக்கிடமாக உள்ளதால் பலியானோர் எண்ணிக்கை மேலும் அதிகரிக்கக்கூடும் என அஞ்சப்படுகிறது. விபத்து காரணமாக காபூல் மற்றும் காந்தகார் சாலைகள் துண்டிக்கப்பட்டுள்ளன.
