பெர்சத்துவான் ஹிண்ட்ராப் மலேசியா (ஹிண்ட்ராப்) ஸக்கீருக்கு மலேசிய அரசு வழங்கிய நிரந்தர தங்கும் சிறப்புரிமை (பிஆர்) பற்றி ஐநா பாதுகாப்பு மன்றத்தின் பயங்கரவாத எதிர்ப்பு குழுவுக்கு (சிடிசி) புகார் கடிதம் ஒன்றை அனுப்பியிருந்தது. அதற்கு சவால் விடும் வகையில் மலாய்க்காரர் உரிமைகளுக்காக போராடும் அமைப்பான பெர்காசாவும் சிடிசிக்கு கடிதம் ஒன்றை அனுப்பியுள்ளது.

ஹிண்ட்ராப்பின் கடிதம் மலேசியாவின் தோற்றத்திற்கு கலங்கத்தை ஏற்படுத்தியுள்ளது என்று பெர்காசா தலைவர் இப்ராகிம் அலி கூறுகிறார்.

வேதமூர்த்தியின் கடிதத்தில் பல அடிப்படையற்றவை கூறப்பட்டுள்ளன. ஆகவே, ஸக்கீரை தற்காப்பதற்கு மட்டுமில்லாமல் நாட்டின் கௌரவத்தையும் பாதுகாப்பதற்காக தாம் அக்கடிதத்திற்கு பதில் அளிப்பதாக இப்ராகிம் அலி கூறினார்.

வேதமூர்த்தி அவரது கடிதத்தில் கூறிகொண்டவற்றில் மலேசியாவுக்கு ஏதோ பங்கு இருப்பது போலவும், மலேசியா ஒரு பொறுப்பற்ற நாடு போலவும் அதனால் மலேசியாவிலுள்ள முஸ்லிம்கள் பயங்கரவாதம் சம்பந்தப்பட்டவற்றில் அக்கறை கொண்டிருக்கவில்லை என்பதாகவும் அறியமுடிகிறது என்று இப்ராகிம் அலி கோலாலம்பூரில் ஒரு செய்தியாளர் கூட்டத்தில் கூறினார்.

ஹிண்ட்ராப் தலைவர் வேதமூர்த்தி சிடிசிக்கு அனுப்பியுள்ள கடிதத்தில் மலேசியா ஒரு சிடிசி உறுப்பினராக இருப்பதால் ஸக்கீரால் ஏற்படவிருக்கும் “ஆபத்துகள்” குறித்து சிடிசி மலேசியாவுக்கு ஆலோசனை கூற வேண்டும் என்று கேட்டுக்கொண்டிருந்தார்.

இதனிடையே, தாம் இந்த எதிரான கடிதத்தை அனுப்பியது ஹிண்ட்ராப்புடன் சச்சரவில் இறங்க வேண்டும் என்பதற்காக அல்ல என்று அலி கூறினார்.

“அவர் ஒரு கடிதம் எழுதியிருக்கிறார் என்பதால், நானும் கூட, உண்மையைத் தற்காப்பதற்காக, ஒரு கடிதம் எழுத முடிவு செய்தேன்” என்று அலி மேலும் கூறினார்.

ஐநாவுக்கு அனுப்பியுள்ள இப்ராகிம் அலியின் கடிதத்தின் நகல் பிரதமர் நஜிப், உள்துறை அமைச்சர் ஸாகிட் ஹமிடி, வெளிவிவாகார அமைச்சர் அனிஃபா அமன், போலீஸ் படைத் தலைவர் காலிட் அபு பாக்கார், இந்திய ஹைகமிஷனர் டி.எஸ். மூர்த்தி மற்றும் பலருக்கு அனுப்பப்பட்டுள்ளது.