சுமூத் நுசாந்தாரா கட்டளை மையத்தின் (Sumud Nusantara Command Centre) தலைமை இயக்குநர் சானி அராபி அப்துல் அலிம் அராபி, தங்களுக்கு தற்போது துருக்கி அரசாங்கம் உதவி வழங்கி வருவதாகத் தெரிவித்துள்ளார்.

“கைது செய்து வைக்கப்பட்டிருந்தபோது, தடுத்து வைக்கப்பட்டிருந்தவர்களில் சிலர் அடித்துத் துன்புறுத்தப்பட்டு காயமடைந்ததாகக் கூறப்படும் அறிக்கைகளைத் தொடர்ந்து, GSF 2.0 கப்பலில் உள்ள ஆர்வலர்கள் துருக்கிய மருத்துவமனை ஒன்றில் மருத்துவப் பரிசோதனைக்கு உட்படுத்தப்படுவார்கள் என எதிர்பார்க்கப்படுகிறது.”

சர்வதேச கடற்பரப்பில் இஸ்ரேலியப் படைகளால் தடுத்து வைக்கப்பட்டிருந்த 29 மலேசியர்கள் உட்பட குளோபல் சுமுத் புளோட்டிலா (GSF) 2.0 கப்பலில் இருந்த அனைத்து 428 ஆர்வலர்களும் விடுதலை செய்யப்பட்டுள்ளனர். மலேசியக் குழுவினர் ஞாயிற்றுக்கிழமை தாயகம் திரும்புவார்கள் என்று எதிர்பார்க்கப்படுகிறது.

இஸ்ரேல் எல்லைக்குள் அமைந்துள்ள ரமோன் விமான நிலையத்திற்கு துருக்கிய அதிபர் ரக்சிப் தையிப் எர்டோகன் மூன்று துருக்கிய ஏர்லைன்ஸ் விமானங்களை அனுப்பியுள்ளதாகப் பிரதமர் அன்வார் இப்ராஹிம் தங்களுக்குத் தெரிவித்துள்ளதாகச் சுமுத் நுசந்தரா கட்டளை மையத்தின் (SNCC) இயக்குநர் ஜெனரல் சானி அராபி அப்துல் அலிம் அராபி கூறினார்.

அனைத்து 428 ஆர்வலர்களும் பேருந்து மூலம் ரமோன் விமான நிலையத்திற்கு அழைத்துச் செல்லப்படுவதாகவும், அங்கிருந்து துருக்கிய அரசாங்கத்தின் சிறப்பு நிதியுதவியுடன் கூடிய டிகே6919 (TK6919), டிகே6921 (TK6921) மற்றும் டிகே6925 (TK6925) ஆகிய மூன்று துருக்கிய ஏர்லைன்ஸ் விமானங்கள் மூலம் இஸ்தான்புல்லுக்குப் பயணிப்பார்கள் என்றும் அவர் கூறினார்.

“இந்த மூன்று துருக்கிய ஏர்லைன்ஸ் விமானங்களும் மலேசிய நேரப்படி இரவு 8 மணியளவில் இஸ்ரேலில் இருந்து புறப்படும் என்று எதிர்பார்க்கப்படுகிறது”.

“இவை மலேசிய நேரப்படி இரவு 10 மணிக்குச் சென்றடையும் என எதிர்பார்க்கப்படுகிறது. அங்கு துருக்கிக்கான மலேசிய தூதரகம், விஸ்மா புத்ரா (மலேசிய வெளியுறவு அமைச்சகம்) மற்றும் துருக்கிய அரசாங்கத்தின் பிரதிநிதிகள் அவர்களை வரவேற்பார்கள்,” என்று அவர் கூறியதாக பெர்னாமா செய்தி நிறுவனம் தெரிவித்துள்ளது.

காவலில் வைக்கப்பட்டிருந்தபோது சில ஆர்வலர்கள் தாக்கப்பட்டுக் காயமடைந்ததாகக் கூறப்படும் தகவல்களைத் தொடர்ந்து, மலேசியக் குழுவினர் துருக்கிய மருத்துவமனையில் மருத்துவப் பரிசோதனைக்கு உட்படுத்தப்படுவார்கள் என்று சானி அராபி தெரிவித்தார்.

அவர்கள் சனிக்கிழமையன்று இஸ்தான்புல்லில் இருந்து புறப்பட்டு, ஞாயிற்றுக்கிழமை கோலாலம்பூர் சர்வதேச விமான நிலையத்தை (KLIA) வந்தடைவார்கள் என்று எதிர்பார்க்கப்படுகிறது.

29 மலேசியர்களை விடுவிப்பதற்காகத் தொடர்ந்து அர்ப்பணிப்புடன் செயல்பட்ட பிரதமர் அன்வார், வெளியுறவு அமைச்சர் முகமட் ஹசான், தகவல் தொடர்பு அமைச்சர் பஹ்மி பட்சில் மற்றும் சிலாங்கூர் மந்திரி பெசார் அமிருடின் ஷாரி ஆகியோருக்குச் சானி அராபி தனது நன்றியைத் தெரிவித்துக் கொண்டார்.

“பேச்சுவார்த்தைகளுக்காக சர்வதேச தூதரக வழிகளைத் திரட்டுவதற்கும், அனைத்து 29 மலேசியர்களின் பாதுகாப்பான வெளியேற்றத்தை உறுதி செய்வதற்கும் மேற்கொள்ளப்படும் முயற்சிகள் இதில் அடங்கும்,” என்று அவர் கூறினார்.