மலாக்காவில், சுங்கை உடாங் சிறையில் உள்ள கைதிக்கு ட்ரோன் மூலம் புகையிலைப் பொருட்களை வழங்க முயன்ற இருவரைக் காவல்துறையினர் கைது செய்தனர்.
மலாக்கா காவல்துறைத் தலைவர் சுல்கைரி முக்தார் கூறுகையில், சந்தேக நபர்களில் ஒருவர், சிறையில் உள்ள ஒரு கைதியுடன் இணைந்து செயல்பட்டதாகக் கூறப்படும் நிலையில், இலக்கு வைக்கப்பட்ட தரையிறங்கும் இடத்தை ஆய்வு செய்வதற்காக ட்ரோனைப் பறக்கவிட்டதாக ஒப்புக்கொண்டார்.
ஜூலை 15ஆம் தேதி மலாக்காவில் உள்ள சுங்கை உடாங் சிறைச்சாலைக்குள் ட்ரோன் உதவியுடன் தடைசெய்யப்பட்ட பொருட்களை கடத்த முயன்ற சம்பவம் தடுக்கப்பட்டதைத் தொடர்ந்து, பாதுகாப்பு நடவடிக்கைகளை மேலும் வலுப்படுத்தப் போவதாக சிறைத்துறை தெரிவித்துள்ளது.
இந்தச் சம்பவத்தில் வேறு நபர்கள் அல்லது தரப்பினரின் தொடர்பு உள்ளதா என்பதை கண்டறிய உள்துறை விசாரணை ஒன்றையும் நடத்தி வருவதாக சிறைத்துறை கூறியுள்ளது.
இன்று வெளியிட்ட அறிக்கையில், சந்தேகத்திற்கிடமான நடவடிக்கை கண்டறியப்பட்ட உடனேயே காவல்துறையில் புகார் அளிக்கப்பட்டதாகவும், அதன் பின்னர் இரண்டு சந்தேக நபர்கள் கைது செய்யப்பட்டதாகவும் தெரிவித்தது.
வெள்ளிக்கிழமை, மலாக்கா காவல்துறை தலைவர் சுல்கைரி முக்தார் கூறுகையில், சிறைச்சாலைக்குள் புகையிலை பொருட்களை கடத்த முயன்ற சம்பவம் தொடர்பாக சுங்கை உடாங், தாமான் கெரிஸ் சத்ரியா பகுதியில் நடத்தப்பட்ட சோதனையில் 46 வயதுடைய ஆணும் 27 வயதுடைய பெண்ணும் கைது செய்யப்பட்டனர்.
12 குற்ற வழக்குகள் தொடர்பான பதிவுகளைக் கொண்ட அந்த ஆண், ட்ரோனை இயக்கி கடத்தல் பொருட்கள் தரையிறங்க வேண்டிய இடத்தை கண்காணித்ததாகவும், இது ஒரு கைதியுடன் இணைந்து செய்யப்பட்டதாக அவர் ஒப்புக்கொண்டதாகவும் காவல்துறை தலைவர் தெரிவித்தார்.
காவல்துறை விசாரணை தொடர்ந்து நடைபெற்று வருவதால், இந்த வழக்கு குறித்து மேலதிக கருத்து தெரிவிக்க முடியாது என சிறைத்துறை கூறியது. மேலும், பொதுமக்கள் ஊகங்களை வெளியிட வேண்டாம் என்றும் கேட்டுக்கொண்டது.
