சிலாங்கூரில் சமீபத்தில் பெண் ஆசிரியர் ஒருவர் உயிரிழந்த சம்பவத்தைத் தொடர்ந்து, பள்ளிச் சமூகத்திற்கான உளவியல் மற்றும் சமூக ஆதரவை வலுப்படுத்தும் முயற்சிகளை கல்வி அமைச்சு தீவிரப்படுத்தி வருகிறது.
கல்வி அமைச்சர் பத்லினா சிடெக், இந்தச் சம்பவம் தொடர்பாக ஆசிரியர்கள் மற்றும் பொதுமக்களிடையே எழுந்துள்ள கவலைகளை தாம் புரிந்துகொள்வதாகக் கூறினார். அரசியலுக்கு வருவதற்கு முன்பு மனநல ஆர்வலராக இருந்த தனது பின்னணியைக் கருத்தில் கொண்டால், இந்தச் சம்பவம் மிகவும் தனிப்பட்ட முறையில் தன்னை பாதிப்பதாகவும் அவர் தெரிவித்தார்.
கல்விச் சமூகத்தின் மனநல நலனை மேம்படுத்துவது அமைச்சின் முக்கிய முன்னுரிமைகளில் ஒன்றாக எப்போதும் இருந்து வருவதாகவும், இதற்காக அரசு சாரா அமைப்புகள் (NGO), சுகாதார அமைச்சு மற்றும் ஆலோசகர்களுடன் இணைந்து செயல்பட்டு வருவதாகவும் அவர் கூறினார்.
“இன்னும் நாம் செய்ய வேண்டியவை நிறைய உள்ளன. அதை நாம் தொடர்ந்து ஒன்றிணைந்து செய்வோம். நான் மிகவும் மதிக்கும் அனைத்து ஆசிரியர்களுக்கும், நீங்கள் தனியாக இல்லை என்பதை தயவுசெய்து நினைவில் கொள்ளுங்கள்,” என்று அவர் இன்று வெளியிட்ட முகநூல் பதிவில் தெரிவித்தார்.
மேலும், உயிரிழந்த ஆசிரியரின் குடும்பத்தின் தனியுரிமையை அனைவரும் மதிக்க வேண்டும் என்றும், ஊகங்களைத் தவிர்க்க வேண்டும் என்றும், சம்பவத்திற்கான காரணத்தை முழுமையாக விசாரிக்க காவல்துறைக்கு உரிய வாய்ப்பை வழங்க வேண்டும் என்றும் பத்லினா கேட்டுக்கொண்டார்.
ஆசிரியர்கள் ஒருவருக்கொருவர் கவனம் செலுத்த வேண்டும், நேரம் ஒதுக்கி கேட்க வேண்டும், மற்றும் தங்களது சக ஊழியர்களின் நலனைப் பற்றி விசாரிக்க வேண்டும் என்றும் அவர் ஊக்குவித்தார்.
“சில நேரங்களில், எளிமையான மற்றும் உண்மையான அக்கறையுடன் கேட்கப்படும் ஒரு கேள்வியே மிகப்பெரிய ஆறுதலையும் வலிமையையும் வழங்க முடியும்,” என்று அவர் கூறினார்.
ஆகஸ்ட் 1ஆம் தேதி, சிலாங்கூர் மாநிலத்தின் ஹுலு சிலாங்கூரில் உள்ள ஒரு பள்ளியில் பெண் ஆசிரியர் ஒருவர் இறந்த நிலையில் கண்டுபிடிக்கப்பட்டதாக தகவல்கள் வெளியாகின.
