முன்மொழிவுகளில் குடும்ப அவசரநிலைகளுக்கான சிறப்பு கட்டணங்கள், முக்கியமான வழித்தடங்களில் முன்கூட்டியே பயணச்சீட்டுகளை வாங்குவதற்கான சலுகைகள், மேலும் பண்டிகைக் கால விமானப் பயண மானியங்களை பள்ளி விடுமுறைகளுக்கும் விரிவுபடுத்துவது ஆகியவை அடங்கும்.

சபா PAS தகவல் பிரிவு தலைவர் முஸ்தமான் முஸ்தைன் கூறுகையில், தீபகற்ப மலேசியாவுக்கான விமானப் பயணம் சபா மக்களுக்கு, குறிப்பாக குறைந்த வருமானம் கொண்டவர்களுக்கு, அத்தியாவசியத் தேவையாக மாறியுள்ளது.

சபா PAS கட்சியின் தலைவர் ஒருவர், கிழக்கு மலேசியாவுக்கான விமானக் கட்டணங்களில் ஏற்பட்டுள்ள கடும் உயர்வை சமாளிக்க, மத்திய அரசு பல்வேறு நடவடிக்கைகளை மேற்கொள்ள வேண்டும் என்று முன்மொழிந்துள்ளார். அவற்றில் அவசரகால விமானக் கட்டணத் திட்டம் மற்றும் முன்பதிவு செய்யப்பட்ட தொகுதி இருக்கைகள் (block bookings) ஆகியவையும் அடங்கும்.

சபா PAS தகவல் பிரிவு தலைவர் முஸ்தமான் முஸ்தைன் கூறுகையில், சபாவாசிகளுக்கு விமானப் பயணம் தற்போது அத்தியாவசிய தேவையாகிவிட்டது. குறிப்பாக குறைந்த வருமானம் பெறுபவர்கள் வேலை, கல்வி மற்றும் அவசரகால தேவைகளுக்காக தீபகற்ப மலேசியாவுக்கு விமானத்தில் பயணம் செய்கின்றனர்.

விமானக் கட்டணப் பிரச்சினைக்கு அவர் முன்மொழிந்துள்ள நடவடிக்கைகள்:

குடும்ப அவசரநிலைகளுக்கான சிறப்பு விமானக் கட்டணத் திட்டம் அறிமுகப்படுத்தப்பட வேண்டும்.

பண்டிகைக் காலங்களில் வழங்கப்படும் விமானக் கட்டண மானியத்தை, பள்ளி விடுமுறைகள் மற்றும் பல்கலைக்கழக செமஸ்டர் இடைவேளைகள் போன்ற பிற அதிகப் பயணக் காலங்களுக்கும் விரிவுபடுத்த வேண்டும்.

அதிகப் பயணத் தேவை உள்ள காலங்களில், கிழக்கு–மேற்கு மலேசியா வழித்தடங்களில் நியாயமான கட்டணத்தில் குறிப்பிட்ட அளவு விமான இருக்கைகள் ஒதுக்கப்பட வேண்டும்.

கோலாலம்பூர்–கோத்தா கினபாலு, சண்டகான் மற்றும் தாவாவ் போன்ற முக்கிய வழித்தடங்களில் முன்கூட்டிய கொள்முதல் திட்டம் அல்லது தொகுதி முன்பதிவு (block booking) முறையை அறிமுகப்படுத்த வேண்டும்.

குடும்பத்தில் ஒருவர் இறந்துவிட்டால் இறுதிச்சடங்கில் கலந்துகொள்ள வேண்டிய நிலையில், அதிக விமானக் கட்டணம் காரணமாக பயணத்தை ரத்து செய்ய வேண்டிய குடும்பங்களுக்கு, குடும்ப அவசரநிலைக்கான சிறப்பு கட்டணத் திட்டம் உதவும் என்று முஸ்தமான் கூறினார்.

அதிக விமானக் கட்டணங்களால் சில குடும்பங்கள் தங்களுடைய சொந்த ஊர்களில் கிட்டத்தட்ட இரண்டு மாதங்கள் வரை சிக்கித் தவித்த சம்பவங்கள் உள்ளதாகவும் அவர் தெரிவித்தார். அதேபோல், பல்கலைக்கழகங்களில் படிக்கும் மாணவர்கள் தங்களது கல்வி நிறுவனங்களுக்கு மீண்டும் திரும்ப முடியுமா என்ற கவலையில் உள்ளனர்.

“அதிகமான விமானக் கட்டணங்கள் மக்களின் வாழ்க்கையில் உண்மையான தாக்கத்தை ஏற்படுத்துகின்றன என்பதை இது காட்டுகிறது,” என்று கிழக்கு மற்றும் மேற்கு மலேசியாவுக்கு இடையிலான விமானக் கட்டணங்கள் 200%-க்கும் அதிகமாக உயர்ந்துள்ளதாக வெளியான செய்திக்கு பதிலளித்தபோது, முஸ்தமான் கூறியதாக போர்நியோ செய்தி வெளியிட்டுள்ளது.

பண்டிகைக் காலங்களில் வழங்கப்படும் மானிய விலையிலான விமானப் பயணத் திட்டத்தை, பள்ளி விடுமுறைகள் மற்றும் செமஸ்டர் இடைவேளைகள் போன்ற அதிகப் பயணத் தேவை உள்ள காலங்களுக்கும் விரிவுபடுத்த வேண்டும் என்றும் அவர் கூறினார்.

தற்போது, பண்டிகைக் காலங்களில் கிழக்கு–மேற்கு மலேசியா விமானப் பயணங்களுக்கு அரசாங்கம் ரிம 599 என்ற அதிகபட்ச கட்டண வரம்பை நிர்ணயித்துள்ளது.

அதிகப் பயணத் தேவை உள்ள காலங்களில், சபா–தீபகற்ப மலேசியா வழித்தடங்களில் குறிப்பிட்ட அளவு விமான இருக்கைகளை நியாயமான கட்டணத்தில் விமான நிறுவனங்கள் ஒதுக்க வேண்டும் என்றும் முஸ்தமான் வலியுறுத்தினார்.

“மானியங்களை மட்டும் அதிகரிப்பதைவிட இது சிறந்ததாக இருக்கும். ஏனெனில் பிரச்சினை கட்டணத்தைப் பற்றியது மட்டுமல்ல. விமானங்களின் இருக்கை எண்ணிக்கையும் இதில் முக்கியப் பங்கு வகிக்கிறது,” என்று அவர் கூறினார்.

மேலும், விமானக் கட்டணங்களில் வழக்கத்திற்கு மாறான விலை உயர்வுகளை முன்கூட்டியே கண்டறியும் வகையில் அரசாங்கம் ஒரு கண்காணிப்பு அமைப்பை உருவாக்க வேண்டும் என்றும், அதன் மூலம் உடனடியாக நடவடிக்கை எடுக்க முடியும் என்றும் அவர் தெரிவித்தார்.

கடந்த சனிக்கிழமை, சபா மற்றும் சரவாக் விவகாரங்களுக்கான அமைச்சர் முஸ்தபா சக்முட், இந்த இரு மாநிலங்களுக்கான விமானக் கட்டணங்களில் ஏற்பட்டுள்ள திடீர் உயர்வை சமாளிப்பதற்கான வழிமுறைகளை கண்டறிய போக்குவரத்து அமைச்சுடன் தனது அமைச்சகம் பேச்சுவார்த்தை நடத்தும் என்று தெரிவித்திருந்தார்.

உலகளாவிய எரிசக்தி நெருக்கடியைத் தொடர்ந்து விமான நிறுவனங்களின் இயக்கச் செலவுகள் அதிகரித்துள்ளதாகவும் அவர் கூறினார்.