மலேசிய இந்திய உருமாற்றப் பிரிவுக்கான (மித்ரா) ஒதுக்கீடுகளையும் தாண்டி, இந்தியச் சமூகத்திற்கான அரசாங்க உதவி நீடிக்கிறது என்றும், முதன்மை உதவித் திட்டங்களைப் பெறுவதற்கும் அவர்கள் தகுதி பெற்றுள்ளனர் என்றும் பிரதமர் அன்வார் இப்ராகிம் தெரிவித்துள்ளார்.

நிதி அமைச்சருமான அன்வார், அரசாங்கத்தின் ஆதரவில் பண உதவி, வணிக நிதியுதவி, பள்ளி மேம்பாடுகள் மற்றும் வழிபாட்டுத் தலங்களுக்கான நிதி ஆகியவை அடங்கும் என்று கூறினார்.

இந்தியச் சமூகத்திற்கான ஒரே உதவி மித்ரா மூலமாக மட்டுமே கிடைப்பதாக சிலர் கூறுகிறார்கள். அது உண்மை அல்ல. சும்பங்கான் துனாய் ரஹ்மா, அமானா இக்தியார் மலேசியா மற்றும் தேக்குன் ஆகிய திட்டங்களும் உள்ளன, என்று அவர் இன்று பிரிக்பீல்ட்ஸ் தீபாவளி மெகா பஜாரிற்கு மேற்கொண்ட விஜயத்தின் போது கூறினார்.

கடந்த காலத்தில், தேக்குன் மற்றும் ஏஐஎம் ஆகிய திட்டங்கள் புமிபுத்ரா சிறு வணிகர்களுக்கு மட்டுமே வழங்கப்பட்டன. ஆனால் தற்போது அதனை நாங்கள் மற்ற சமூகங்களுக்கும் விரிவுபடுத்தியுள்ளோம். அதோடு, இந்திய தொழில்முனைவோருக்காக பிரத்யேகமாக மித்ரா அமைப்பின் ஒதுக்கீட்டை 150 மில்லியன் ரிங்கிட்டாக உயர்த்தியுள்ளோம்.

கிளுவாங்கில் உள்ள எஸ்.ஜே.கே.டி லாடாங் பாமோல் உட்பட தமிழ்ப் பள்ளிகளின் பராமரிப்பு மற்றும் புதிய பள்ளிகளின் கட்டுமானப் பணிகளுக்காகவும், நிறைவடையும் தருவாயில் உள்ள மேலும் ஆறு பள்ளிகளுக்காகவும் 50 மில்லியன் ரிங்கிட் ஒதுக்கப்பட்டுள்ளது என்றும் அவர் கூறினார்.

கடந்தகால அரசாங்கங்களின் கீழ் வழங்கப்பட்ட ஒதுக்கீடுகளுடன் ஒப்பிடுகையில், தற்போதைய அரசாங்கத்தின் உதவி ஒதுக்கீடுகள் பல மடங்கு அதிகரித்துள்ளதாக அன்வார் தெரிவித்தார்.

2018-இல் பந்துவான் ராக்யாட் 1மலேசியா திட்டத்திற்கு 6 பில்லியன் ரிங்கிட்டும், 2022-இல் பந்துவான் கெலுவார்கா மலேசியா திட்டத்திற்கு 8 பில்லியன் ரிங்கிட்டும் ஒதுக்கப்பட்டிருந்த நிலையில், 2024-ஆம் ஆண்டில் எஸ்டிஆர் மற்றும் சும்பங்கான் அசாஸ் ரஹ்மா திட்டங்களுக்கான ஒதுக்கீடுகள் 16 பில்லியன் ரிங்கிட்டாக உயர்ந்துள்ளன என்று அவர் குறிப்பிட்டார்.

கடந்த காலத்திலும் உதவிகள் வழங்கப்பட்டதாக சிலர் கூறுகிறார்கள். அது உண்மைதான், ஆனால் அப்போது எவ்வளவு ஒதுக்கப்பட்டது? 6 பில்லியன் ரிங்கிட். இப்போது மக்களுக்கு, குறிப்பாக குறைந்த வருமானம் பெறும் பிரிவினருக்கு 16 பில்லியன் ரிங்கிட் ஒதுக்கப்பட்டுள்ளது,” என்று அவர் கூறினார்.

தீபாவளியை முன்னிட்டு இன்று முதல் வழங்கப்படும் 1.1 பில்லியன் ரிங்கிட் மதிப்பிலான எஸ்டிஆர் கொடுப்பனவுகள், இந்தியச் சமூகத்தைச் சேர்ந்த 630,000 பேர் உட்பட பல்வேறு சமூகங்களைச் சேர்ந்த ஐந்து மில்லியன் பயனாளிகளுக்குப் பயனளிக்கும் என்றும் அவர் தெரிவித்தார்.

நாடு முழுவதிலும் உள்ள ஆலயங்கள் உட்பட வழிபாட்டுத் தலங்களின் பழுதுபார்ப்பு மற்றும் பராமரிப்புப் பணிகளுக்காக அரசாங்கம் கூடுதலாக 80 மில்லியன் ரிங்கிட்டை அனுமதித்துள்ளதாகவும் அன்வார் தெரிவித்தார்.

எழுத்தாளர் ஜானகி ராமன் மாணிக்கம் தனது மலேசிய இந்தியர்கள்: தாக்கம் மற்றும் வலி: ஓரங்கட்டப்பட்ட ஒரு சமூகத்தின் முடிவற்ற கதையின் விவரிப்பு என்ற புத்தகத்தில், மித்ரா அமைப்பிற்கு பல மில்லியன் ரிங்கிட் ஒதுக்கப்பட்ட போதிலும், இந்தியச் சமூகம் தொடர்ந்து ஓரங்கட்டப்பட்டு வருவதாகவும், தோட்டத் தொழிலாளர்கள் அரசாங்கத் திட்டங்களில் இருந்து தொடர்ந்து புறக்கணிக்கப்பட்டு வருவதாகவும் குறிப்பிட்டுள்ளார்.

மேலும், இந்த நிதி விநியோகத்தின் செயல்திறன் குறித்தும் கேள்வி எழுப்பிய அவர், உயர்கல்விக் கட்டணத்தைச் செலுத்த முடியாமல் பல மாணவர்கள் இன்னும் தவித்து வருவதாகவும், தொழில்முனைவோரால் வணிகக் கடன்களைப் பெற முடியாமல் இருப்பதாகவும் தெரிவித்தார்.

 

-fmt