தீபாவளிப் பண்டிகையை முன்னிட்டு, இரண்டு நாட்களுக்கு வழக்கமான சுங்கக் கட்டணத்தில் இருந்து 50 விழுக்காடு தள்ளுபடி வழங்கப்படுவதாக அரசாங்கம் அறிவித்துள்ளது.

பொதுப்பணித் துறை அமைச்சர் அலெக்சாண்டர் நந்தா லிங்கி இன்று வெளியிட்ட அறிக்கையில், இந்தச் சுங்கக் கட்டண தள்ளுபடி நாளை நள்ளிரவு முதல் அமலுக்கு வந்து சனிக்கிழமை இரவு 11.59 மணியுடன் நிறைவடையும் என்று தெரிவித்தார்.

இந்தச் சுங்கக் கட்டணக் கழிவுக்காக சம்பந்தப்பட்ட நெடுஞ்சாலை சலுகை நிறுவனங்களுக்கு ரிம 20.11 மில்லியன் இழப்பீட்டுத் தொகை வழங்கப்படும் என மதிப்பிடப்பட்டுள்ளதாகவும், போக்குவரத்துத் தரவுகள் சரிபார்க்கப்பட்ட பின்னர் இந்தத் தொகையை அரசாங்கமே ஏற்கும் என்றும் அவர் கூறினார்.

இந்தச் சலுகை அனைத்து சுங்கச்சாவடிகளிலும் முதலாம் வகை தனியார் வாகனங்களுக்கும், பினாங்கு பாலத்தில் இரண்டாம் வகை வாகனங்களுக்கும் பொருந்தும்.

எனினும், தேசிய எல்லைப் பகுதிகளில் அமைந்துள்ள சுங்கச்சாவடிகளுக்கு இந்தக் கழிவு பொருந்தாது. குறிப்பாக, வடக்கு – தெற்கு நெடுஞ்சாலையில் உள்ள சுல்தான் இஸ்கந்தர் கட்டட சுங்கச்சாவடி மற்றும் மலேசியா – சிங்கப்பூர் இரண்டாவது இணைப்புப் பாலத்தில் உள்ள தஞ்சோங் கூபாங் சுங்கச்சாவடி ஆகியவை இதில் உள்ளடங்காது.

இனம், மதம், நம்பிக்கை ஆகியவற்றைப் பொருட்படுத்தாமல் மக்களின் நலன் மற்றும் வாழ்க்கைத் தரத்தைப் பாதுகாப்பதில் அரசாங்கம் கொண்டுள்ள தொடர்ச்சியான அக்கறையையும் அர்ப்பணிப்பையும் இந்த முடிவு பிரதிபலிக்கிறது. அதேவேளையில், பல்லின மக்கள் வாழும் மலேசியச் சமூகத்தினரிடையே ஒற்றுமை மற்றும் நல்லிணக்க உணர்வை மேலும் வலுப்படுத்தவும் இது உதவும்.

“குறிப்பாக, தீபாவளியைக் கொண்டாடுவதற்காகத் தங்களது சொந்த ஊர்களுக்குத் திரும்பும் அல்லது குடும்ப உறுப்பினர்களைச் சந்திக்கச் செல்லும் இந்து சமூகத்தினரின் பயணச் செலவைக் குறைக்க இந்த முயற்சி உதவும் என நம்புகிறோம். குடும்ப உறவுகள் மற்றும் ஒன்றுகூடலின் மூலம் பண்டிகையின் உண்மையான உணர்வை வெளிப்படுத்தவும் இது வழிவகுக்கும்,” என்று அவர் தெரிவித்தார்.

மலேசிய நெடுஞ்சாலை ஆணையத்தின் (LLM) மூலம் பொதுப்பணித் துறை அமைச்சு, சம்பந்தப்பட்ட நெடுஞ்சாலை சலுகை நிறுவனங்களுடன் இணைந்து இந்தச் சுங்கக் கட்டணக் கழிவுத் திட்டத்தை ஒருங்கிணைக்கும் என்றும், தகுதியுள்ள நெடுஞ்சாலைப் பயனர்கள் இதன் பலன்களைப் பெறுவதை உறுதிசெய்யும் என்றும் அலெக்சாண்டர் கூறினார்.

மேலும், இந்தச் சலுகையைப் பயன்படுத்திக் கொள்ளுமாறும், போக்குவரத்து நெரிசலைத் தவிர்க்க முன்கூட்டியே தங்களது பயணங்களைத் திட்டமிடுமாறும் அவர் நெடுஞ்சாலைப் பயனர்களுக்கு அறிவுறுத்தினார்.

அத்துடன், தங்களது Touch ’n Go அட்டைகள் அல்லது மின்னணுப் பணப்பைகளில் (eWallet) போதுமான தொகை இருப்பதை உறுதிசெய்தல், வேகக் கட்டுப்பாடுகளைக் கடைப்பிடித்தல், வாகனங்களுக்கு இடையில் பாதுகாப்பான இடைவெளியைப் பேணுதல், வாகனம் ஓட்டும்போது சோர்வைத் தவிர்க்கப் போதிய ஓய்வு எடுத்தல் ஆகியவற்றையும் அவர் வலியுறுத்தினார்.

பொதுப்பணித் துறை அமைச்சர் அலெக்சாண்டர் நந்தா லிங்கி

மேலும், நெடுஞ்சாலைகளில் நிலவும் தற்போதைய போக்குவரத்து நிலவரங்கள் மற்றும் ஏதேனும் விபத்துகள் அல்லது சம்பவங்கள் குறித்த சமீபத்திய தகவல்களைப் பெறவும், தங்களது பயணங்களைச் சிறந்த முறையில் திட்டமிடவும் மலேசிய நெடுஞ்சாலை ஆணையத்தின் அதிகாரப்பூர்வத் தகவல் வழிகளைப் பயன்படுத்துமாறு வாகனமோட்டிகள் கேட்டுக்கொள்ளப்படுகின்றனர்.

பண்டிகைக் காலப் பயணங்கள் சுமுகமாகவும், பாதுகாப்பாகவும், வசதியாகவும் அமைய அனைத்து சாலைப் பயனர்களும் பொறுப்புடனும் கவனத்துடனும் வாகனம் ஓட்டுவது மிகவும் அவசியம் என்றும் அவர் கூறினார்.

மலேசியாவின் இந்து சமூகத்தினருக்கு அமைச்சு தனது இனிய தீபாவளி 2026 நல்வாழ்த்துகளைத் தெரிவித்துக் கொள்கிறது. ஒளித் திருநாளான தீபாவளி அனைவருக்கும் மகிழ்ச்சி, செழிப்பு மற்றும் நல்லிணக்கத்தைக் கொண்டுவருவதுடன், மலேசிய மக்களிடையே ஒற்றுமை உணர்வையும் தொடர்ந்து வலுப்படுத்தட்டும்.

“பாதுகாப்புக்கு முன்னுரிமை அளியுங்கள். அனைத்து சாலைப் பயனர்களும் தங்களது இலக்குகளைப் பாதுகாப்பாகச் சென்றடைய வாழ்த்துகிறோம்,” என்றும் அவர் தெரிவித்தார்.