நாட்டின் பாதுகாப்பும் இறையாண்மையும் தொடர்ந்து பாதுகாக்கப்படுவதை உறுதிப்படுத்த, மத்திய அரசு எல்லைக் கட்டுப்பாடுகளை வலுப்படுத்துவதுடன், அகதிகள் நிர்வாகத்தையும் மேம்படுத்த வேண்டும் என்று பகாங் மாநில ஆட்சியாளர் சுல்தான் அப்துல்லா சுல்தான் அஹ்மத் ஷா வலியுறுத்தியுள்ளார்.

ஐக்கிய நாடுகள் சபையின் அகதிகளுக்கான உயர் ஆணையம் (UNHCR) மலேசியாவில் தொடர்ந்து செயல்பட வேண்டுமா என்பது குறித்து மத்திய அரசு விரிவான மதிப்பீட்டை மேற்கொள்ள வேண்டும் என்றும், அதன் செயல்பாடுகளும் செயல்திறனும் நாட்டின் தேவைகளுக்கும் நலன்களுக்கும் இனி பயனளிக்கவில்லை என்றால், அதன் செயல்பாடுகளை நிறுத்துவது குறித்தும் பரிசீலிக்க வேண்டும் என்றும் சுல்தான் அப்துல்லா கருதுகிறார்.

முறையான நிர்வாகமின்றி நாட்டில் தங்கியிருக்கும் அகதிகள் உள்ளிட்ட வெளிநாட்டவர்களின் எண்ணிக்கை அதிகரித்து வருவது தீவிர கவனம் செலுத்தப்பட வேண்டிய விவகாரம் என்று அவர் கூறினார். ஏனெனில், இது பாதுகாப்பு, சமூக நலன், சுற்றுச்சூழல் தூய்மை மற்றும் பொது ஒழுங்கு தொடர்பாகப் பல்வேறு சவால்களை ஏற்படுத்தக்கூடும்.

ஒரு சர்வதேச அமைப்பின் வருகை, நாட்டின் சுமையைக் குறைக்க உதவ வேண்டுமே தவிர, இறுதியில் அரசாங்கமும் உள்ளூர் மக்களும் சுமக்க வேண்டிய சூழ்நிலையை உருவாக்கக் கூடாது.

மனிதாபிமானக் காரணங்கள் ஒருபோதும் நாட்டின் இறையாண்மையை அலட்சியமாகக் கருதுவதற்கான காரணமாகப் பயன்படுத்தப்படக் கூடாது. அதேபோல், பாதுகாப்பு வழங்கும் நடவடிக்கைகள் நாட்டின் சட்டங்களுக்கு முன்னுரிமை அளிப்பதைப் பாதிக்கவும் அனுமதிக்கக் கூடாது என்று சுல்தான் இன்று பகாங் சுல்தானகத்தின் அதிகாரப்பூர்வ முகநூல் பக்கத்தில் வெளியிட்ட அறிக்கையில் தெரிவித்துள்ளார்.

மனிதாபிமானமும் இரக்கமும் கொண்ட நாடாக மலேசியா தொடர்ந்து திகழ வேண்டும் என்றாலும், மனிதாபிமானத்தின் பெயரால் நாட்டின் இறையாண்மையையும் பாதுகாப்பையும் ஒருபோதும் விட்டுக்கொடுக்கக் கூடாது என்று சுல்தான் அப்துல்லா கூறினார்.

கோலாலம்பூரில் ரோஹிங்யா அகதிகள்

“இந்த நாட்டில் வசிக்கும் ஒவ்வொரு தனிநபரும், அவர்களின் பிறப்பிடம் அல்லது பின்னணி எதுவாக இருந்தாலும், நடைமுறையில் உள்ள சட்டங்களையும் விதிமுறைகளையும் மதிக்க வேண்டிய கடமை கொண்டுள்ளனர்,” என்று அந்தப் பதிவில் குறிப்பிடப்பட்டுள்ளது.

தேசிய இறையாண்மையைப் பாதுகாப்பது, சட்டத்தின் ஆட்சியை நிலைநாட்டுவது மற்றும் மக்களின் நல்வாழ்வை உறுதிப்படுத்துவது ஆகியவை அரசாங்கத்தின் முதன்மைப் பொறுப்புகளாகும். இதற்கு ஏற்ப, அனைத்து அமலாக்க நடவடிக்கைகளும் உறுதியுடனும் நியாயமாகவும் சட்டத்திற்கு உட்பட்டும் மேற்கொள்ளப்பட வேண்டும் என்றும் சுல்தான் தெரிவித்தார்.

மாநில வருவாய் ரிம 1 பில்லியனை எட்டியது

இதற்கிடையில், மற்றொரு முகநூல் பதிவில், செப்டம்பர் 17ஆம் தேதியே ரிம 1 பில்லியன் மாநில வருவாயை வசூலித்து, தொடர்ந்து ஐந்தாவது ஆண்டாக இந்தச் சாதனையைப் பகாங் மாநில அரசு படைத்திருப்பதற்கு சுல்தான் அப்துல்லா மகிழ்ச்சியும் பெருமிதமும் தெரிவித்துள்ளார்.

மாநில முதலமைச்சர் வான் ரோஸ்டி வான் இஸ்மாயில் தலைமையிலான மாநில நிர்வாகத்தின் திறமையை இந்தச் சாதனை பிரதிபலிப்பதாக அவர் கூறினார்.

திறமையான நிர்வாகம், பயனுள்ள வரி இணக்க நடவடிக்கைகள் மற்றும் வருவாய் கசிவுகளைக் கட்டுப்படுத்தும் முயற்சிகள் மூலம் மாநிலத்தின் நிதி நிலையை வலுப்படுத்தியிருப்பதே இந்த வெற்றிக்குக் காரணம் என்றும் அவர் குறிப்பிட்டார்.

இதற்கிடையில், ஓர் அரசாங்கத்தின் வெற்றியை அது வசூலிக்கும் வருவாயின் அளவை மட்டும் அடிப்படையாகக் கொண்டு மதிப்பிடக் கூடாது என்றும், அந்த நிதி சாதனைகள் மக்களின் வாழ்க்கையில் எந்த அளவுக்குச் சாதகமான மாற்றங்களை ஏற்படுத்துகின்றன என்பதையும் கவனத்தில் கொள்ள வேண்டும் என்றும் சுல்தான் தெரிவித்தார்.

“மாநிலத்தின் வலுவான நிதி நிலை, விரிவான வளர்ச்சித் திட்டங்கள், அதிக வேலைவாய்ப்புகள், மக்களின் உயர்ந்த வருமானம், தரமான உட்கட்டமைப்பு வசதிகள் மற்றும் அனைத்துத் தரப்பு மக்களும் அனுபவிக்கக்கூடிய மேம்பட்ட நல்வாழ்வு ஆகியவையாக மாற்றம் பெறும் என்று நம்புகிறேன்,” என்று அந்தப் பதிவில் தெரிவிக்கப்பட்டுள்ளது.

மாநிலத்தின் நிதி சாதனைகள் சமநிலையான மாநில வளர்ச்சிக்கு தொடர்ந்து உந்துசக்தியாக அமைய வேண்டும் என்றும், பகாங் மாநில மக்கள் செழிப்பின் பலன்களைத் தொடர்ந்து அனுபவிப்பதை உறுதிப்படுத்த வேண்டும் என்றும் சுல்தான் அப்துல்லா நம்பிக்கை தெரிவித்துள்ளார்.