நெகிரி செம்பிலான் மாநில ஒற்றுமை அரசாங்கத்திற்கு அம்னோவின் 14 சட்டமன்ற உறுப்பினர்களும் ஆதரவு வழங்குகிறார்கள் என்று அக்கட்சியின் தலைவர் அகமத் ஜாஹித் ஹமிடி தெரிவித்துள்ளார்.

நெகிரி செம்பிலான் மந்திரி பெசார் அமினுடின் ஹருனுக்கு வழங்கிய ஆதரவை அவர்கள் திரும்பப் பெற்றதைத் தொடர்ந்து, இன்று அந்தச் சட்டமன்ற உறுப்பினர்களுடன் நடத்திய ஆலோசனையின் முடிவில் இந்த நிலைப்பாடு எட்டப்பட்டதாக அவர் கூறினார்.

மேலும், அந்த 14 சட்டமன்ற உறுப்பினர்களும் மாநில நிர்வாகத்தைக் கைப்பற்றவோ அல்லது ஜனநாயகத்திற்குப் புறம்பான வழிகளில் புதிய அரசாங்கத்தை அமைக்கவோ எண்ணவில்லை என்றும் ஜாஹித் வலியுறுத்தினார்.

தவறான புரிதல்கள் மற்றும் அவர்களின் உண்மையான நோக்கம் குறித்த மாறுபட்ட விளக்கங்கள் இருந்த காரணத்தால், நான் அந்த 14 சட்டமன்ற உறுப்பினர்களுடனும் கலந்துரையாடல் நடத்தினேன்.

“நாங்கள் எதனையும் திரும்பப் பெறும் எண்ணத்தில் இல்லை.” “மாறாக, நெகிரி செம்பிலானின் அரச நிறுவனமும் அதன் பழக்கவழக்கங்களும் (Adat) அனைவராலும் மதிக்கப்படுவதையும், நிலைநிறுத்தப்படுவதையும் உறுதி செய்வதற்காக எடுக்கப்பட்ட ஒரு நல்லெண்ண நடவடிக்கையே இது என்பதை நாங்கள் தெளிவுபடுத்த விரும்புகிறோம்,” என்று இங்கு நடைபெற்ற ஒரு கருத்தரங்கைத் தொடக்கி வைத்த பின்னர் அவர் கூறினார்.

நெகிரி செம்பிலான் அரச நிறுவனம் மற்றும் அதன் பழக்கவழக்கங்கள் தொடர்பான நெருக்கடியை பிகேஆர் துணைத் தலைவர் அமினுடின் கையாண்ட விதம் காரணமாக, அவரது தலைமைத்துவத்தின் மீது தங்களுக்கு நம்பிக்கை இல்லை எனத் தெரிவித்து, கடந்த திங்கட்கிழமையன்று 14 சட்டமன்ற உறுப்பினர்களும் அவருக்கு வழங்கிய ஆதரவைத் திரும்பப் பெற்றனர்.

நெகிரி செம்பிலான் யாங் டி-பெர்துவான் பெசார் துவாங்கு முஹ்ரிஸ் துவாங்கு முனாவிரைப் பதவியிலிருந்து நீக்க நான்கு தலைவர்கள் முயற்சிக்கும் தற்போதைய நெருக்கடியுடன் இந்த முடிவு தொடர்புடையது.

பெரிகாத்தான் நேசனலின் (PN) ஐந்து சட்டமன்ற உறுப்பினர்களின் ஆதரவு கிடைத்தால், பாரிசான் நேசனல் (BN) 19 இடங்களுடன் எளிய பெரும்பான்மையைப் பெற்று மாநில அரசாங்கத்தை அமைக்க முடியும்.

மாநிலத்தின் அரசியல் ஸ்திரத்தன்மையையும் மக்களின் நலனையும் உறுதிப்படுத்தும் வகையில், நெகிரி செம்பிலான் ஒற்றுமை அரசாங்கத்திற்கு அம்னோ தொடர்ந்து ஆதரவு அளிக்கும் என்று அக்கட்சியின் பொதுச்செயலாளர் அஷ்ரப் வாஜ்டி துசுகி நேற்று இரவு தெரிவித்தார்.

சிகாமட் சட்டமன்ற உறுப்பினரான அமினுடின், ஆகஸ்ட் 2023-இல் இரண்டாவது முறையாக நெகிரி செம்பிலான் மந்திரி பெசாராகப் பதவியேற்றார்.

கடந்த மாநிலத் தேர்தலில், பாரிசான் 14 இடங்களையும், பக்காத்தான் ஹராப்பான் 17 இடங்களையும் வென்ற வேளையில், பெரிக்காத்தான் 5 இடங்களைக் கைப்பற்றியது.

 

 

 

-fmt