பெரிக்காத்தன் நேஷனல் நாடாளுமன்ற உறுப்பினர்களிடையே பெரும்பான்மை ஆதரவைப் பெற்றுள்ளதால், ஹம்சா ஜைனுதீன் எதிர்க்கட்சித் தலைவராகத் தேர்ந்தெடுக்கப்பட்டார் என்று தற்காலிகமாக நீக்கப்பட்ட பெர்சத்து தலைவர் ஒருவர் கூறினார். அவரது “நியமனம்” தொடர்பாக எழுந்த சர்ச்சைகளுக்கு விளக்கமளிக்கும் வகையில் அவர் இதனைத் தெரிவித்தார்.

முன்னாள் அமைச்சரான ஹம்சாவிற்கு பாஸ் கட்சியின் முழுமையான ஆதரவும், பெர்சத்து நாடாளுமன்ற உறுப்பினர்களின் பெரும்பான்மை ஆதரவும் இருப்பதாக ரொனால்ட் கியாண்டி கூறினார்.

எனவே, அவரது நிலைப்பாடு வலுவாக உள்ளது. கட்சியின் எந்தவொரு உள்நாட்டுத் தீர்மானங்களாலும் அதைச் சிதைக்க முடியாது என்று அவர் தனது முகநூல் பதிவில் குறிப்பிட்டுள்ளார்.

சனிக்கிழமையன்று, பாஸ் தலைவர் அப்துல் ஹாதி அவாங் கூறுகையில், லாருட் நாடாளுமன்ற உறுப்பினரான ஹம்சா, பதவியைத் துறந்த இரண்டு மாதங்களிலேயே மீண்டும் எதிர்க்கட்சித் தலைவராகப் பொறுப்பேற்பார் என்று தெரிவித்தார்.

ஹம்சாவுடன் இணைந்து செயல்படும் நாடாளுமன்ற உறுப்பினர்கள் மற்றும் இன்னும் பெர்சத்து கட்சியில் இருக்கும் 13 நாடாளுமன்ற உறுப்பினர்களின் கருத்துக்களை பாஸ் கட்சி கேட்டறிந்ததாக ஹாதி கூறினார்.

வெஸ்ட்மின்ஸ்டர் முறை மற்றும் காமன்வெல்த் மரபுகளின்படி, எதிர்க்கட்சித் தலைவரின் நியமனம் வேட்பாளருக்குக் கிடைக்கும் பெரும்பான்மை ஆதரவின் அடிப்படையிலானது என்று கியாண்டி கூறினார்.

கடந்த மார்ச் 6 அன்று தற்காலிகமாக நீக்கப்பட்ட பெர்சத்து கட்சியின் துணைத் தலைவரான கியாண்டி, இந்த நியமனம் எந்தவொரு அரசியல் கட்சியின் முடிவிற்கும் கட்டுப்பட்டது அல்ல என்றும் குறிப்பிட்டார்.

பெரிகாத்தன் நேஷனலில் பாஸ் மற்றும் பெர்சத்து கட்சிகளுக்கு இடையே நிலவும் தற்போதைய சூழ்நிலையைக் கருத்தில் கொண்டு, எதிர்க்கட்சித் தலைவர் யார் என்பதை எதிர்க்கட்சி நாடாளுமன்ற உறுப்பினர்களே தீர்மானிப்பதுதான் நியாயமானது,” என்று பாஸ் கட்சி பெர்சத்து உடனான உறவைத் துண்டிக்க எடுத்த முடிவைக் குறிப்பிட்டு அவர் கூறினார்.

தொடர்ந்து பேசிய கியாண்டி, எதிர்க்கட்சித் தலைவரின் பொறுப்பு என்பது ஒருவரின் அரசியல் படிநிலை (hierarchy) அல்லது அவரது அரசியல் கட்சி உறுப்பினர் பதவியின் அடிப்படையில் தீர்மானிக்கப்படுவதில்லை என்று தேவான் ராக்யாட் (மலேசிய நாடாளுமன்றத்தின் மக்களவை) நிலையான கட்டளைகள் குறிப்பிடுவதாகக் கூறினார். மேலும், எந்த எதிர்க்கட்சி நாடாளுமன்ற உறுப்பினருக்குப் பெரும்பான்மை ஆதரவு உள்ளது என்பதை இறுதி செய்து, அவரை அந்தப் பதவிக்கு நியமிக்கும் அதிகாரம் தேவான் ராக்யாட் சபாநாயகருக்கு உண்டு என்றும் அவர் கூறினார்.

மார்ச் 2 அன்று கியாண்டி, பெரிக்காத்தன் முதன்மை மக்கள் தொடர்பாளர் தக்கியுதீன் ஹாசனுக்கு அனுப்பிய கடிதத்தின் உள்ளடக்கங்களை உறுதிப்படுத்தினார். அதில், பெர்சத்து  நாடாளுமன்ற உறுப்பினர்களில் பெரும்பான்மையானவர்கள் ஹம்சாவை எதிர்க்கட்சித் தலைவராகத் தக்கவைப்பதை ஆதரிப்பதாகக் குறிப்பிடப்பட்டிருந்தது.

பிப்ரவரி 24 தேதியிட்ட அந்த கடிதத்தில், நாடாளுமன்ற நிலையான கட்டளைகளுக்கு ஏற்ப, லாருட் நாடாளுமன்ற உறுப்பினர் தொடர்ந்து அந்தப் பதவியில் நீடிப்பதற்கு 13 பெர்சத்து நாடாளுமன்ற உறுப்பினர்கள் ஒரு “கூட்டு மற்றும் பெரும்பான்மை” முடிவை எடுத்ததாக கியாண்டி கூறினார்.

அந்தக் கடிதத்தின் இணைப்பில், இந்த முடிவை ஆதரித்த 13 நாடாளுமன்ற உறுப்பினர்களின் பெயர்கள் பட்டியலிடப்பட்டிருந்தன: கியாண்டி, மாஸ் எர்மியாத்தி சம்சுடின், இக்மால் ஹிஷாம் அப்துல் அஜிஸ், ரோசோல் வாஹித், கு அப்துல் ரஹ்மான் கு இஸ்மாயில், முஸ்லிமின் யஹாயா, அப்துல் காலிப் அப்துல்லா, கைரில் நோர், ஜக்ரி ஹாசன், ரோஸ்லான் ஹாஷிம், நொருடின் அஹ்மத் இஸ்மாயில், கலாம் சாலான் மற்றும் இஸ்லாஹுதீன் அப்பாஸ்.

 

 

-fmt