1எம்டிபி,  ரிம2.6பில்லியன் ‘நன்கொடை’  பற்றிப்  பகிரங்கமாகக்  கேள்வி  எழுப்பியதற்காக  பிரதமர்  நஜிப்  அப்துல்  ரசாக்  நேரடியாக  தம்மைக்  கண்டித்ததாக  கெடாவின்  முன்னாள்  மந்திரி  புசார்  முக்ரிஸ்  மகாதிர்  கூறினார்.

“நான் (1எம்டிபி,  ரிம2.6பில்லியன்  பற்றிப்)  பேசியதால்  பிரதமர்  அதிருப்தி  அடைந்திருந்தார்,  ஆத்திரப்பட்டார்…”, எனக்  காணொளி  ஒன்றில்  முக்ரிஸ்  கூறினார். தம்  ஆதரவாளர்களிடம்   முக்ரிஸ்  பேசியபோது  பதிவு  செய்யப்பட்ட  காணொளி  அது.

ஏழு-நிமிடம்-52-வினாடிகளுக்கு  ஓடும்  அக்காணொளி  முக்ரிஸ்  மகாதிர் எஃப்சி(ரசிகர் மன்றம்) முகநூல்  பக்கத்தில்  காணப்பட்டது.

“ஒரு  எம்பி  என்ற  முறையில்  பிரதமரான  அவரைப்  பற்றிப்  பேசியது  முறையாகாது  என  என்னிடம்  அவர்  நேரடியாகக் கூறினார். அதன்  காரணமாக  நான்  எம்பி  பதவியிலிருந்து  விலக  வேண்டும்  என்றார்.

“லங்காவியில்  ஒன்றரை  மணி  நேரம்  அவருடன்  இருந்தேன். நான் மாநில  அம்னோவைக்  கவனிக்கவில்லை  மாநில  நிர்வாகத்தைக்  கவனிக்கவில்லை  என்பதற்காக  என்மீது  ஏமாற்றம்  கொள்வதாக  ஒருமுறைகூட  அவர்  குறிப்பிடவில்லை.

“என்னுடைய  பேச்சில்  அவரைக்  கண்டித்தேனாம். அந்த  ஆத்திரம்தான்  அவருக்கு”, என்  முக்ரிஸ்  அக்காணொளியில்  கூறினார்.